ZEFANIA 3
3
Jerusalem Xine eno Xakulupu
1Jerusalem ye ahasapue, tiye vimokeu, hekibide eno pawu timi qaqhi chekeu phughi! 2Hiye AMPEU tsa ini tsumoe momu shikithe tsukeu ikhilutsumoe. Hiye AMPEU shou pukhukeu kuhae momu pa kukuphu mu khumoe. 3Tipaulo kijemi akeqoye abongushu igha akeu toike; tipaulo kughakuthami qoye muzuthi akeu tine lojino mihemuzakeu lono inaqhe tomphi lono aghi lakhimu qhimovekeu toike. 4Tungkupumino lahilazake eno akupulupu kuhake; achinemino akimthe kitiqevetsu cheni eno pano kivipu shianiaye Alhou yezah suchighive cheni. 5Ikemu AMPEU ye aphughilo aphike; paye kiuno achipi keno tipau shicheni eno achipi kumou khilemu shichemoe. Ina atsu-tsu pawu timiqo lau pano kuchou xakutha sughi cheni. Tishi keghi tilehi achipi kumomino akumou shi acheni eno kujochemoe.
6AMPEU no pi, “Ino ashiayeh qhoi joleve; ino panoqo phughiqo kutsalevetsu eno panoqono putu muxakeu ngo aghukhu qogheqo ixapiniyi qhivetsuke. Aphughiqoye piyighive; alaghilaye kumsa shivetsu nani, timi lakhimu qhitsumo nani. 7Ino kumsukeuye iwu timiqoye tileno isumsa nani eno ino shikithe keu ikhilu nani eno panonguye ino shikapiye keu khilemu kumsumamo nani kepi kumsuke. Ikemu paikhavino panonguye puzuu toi alomokeu shiuve anike.”
8AMPEU no pi, “Ino ithupuzu ashiayehqo ngukunikeu tsala kutolo khe-aghilo. Niye ashiayehqo ngo akukaqhaqo hekutsu nike xathaluvae, eno panoqo shou iloghu agho-shi pipekeu ithipe nani. Ayeghiqha kumtsu iloghu mikuyiquno pitileve nani.”
9“Tithiuno ino ashiayeh qolo timiqo tsapi kilive tsu nani eno panonguno ivilo likhi khuini nani kethono alhou kutau vilo khuinimo nani. Panongu kumtsu igholu nani. 10Putou akeu Sudan lono ghi iwu timi apanagha akeqono akumllagho ilau peighi nani. 11Tipa ghulokiloye nongu, iwu timiqoye ishou hebide kepi kujovekepu kuhave nani. Aqhekuza eno akulakimi kumtsu ino ikhive nani eno ikimthe naghuto loye nonguye khilemu ishou hebide kithemo nani. 12Tilehi ino akumtshami eno aqhokighemi qhipua nani; panonguno akukuphu phususu ilau ighi nani. 13Israil lo khunoqono puxupe puaghini keno tipaqoye khulaumu akumou shimo nani, mikimo nani, pishiqhi keu tsa pimo nani. Panonguye kinikulu shi nani eno sushokulu anani, khuumu musakepu kuha nani.”
Alokivi Le lakhi
14Israil lo akemiqo, alokivi launo shipili
ighalo!
Jerusalem, omlo kuchopu pe alovilo!
15AMPEU no nono aghimeshi akeu kishekhave
tsuae;
oghumi kumtsu pano ikhive tsuake.
AMPEU, Israil lo Akukauye ogholo ani;
itehiye musa akepu akiqi kuhake.
16Panonguno Jerusalem vilo pinikeu tsala
cheni;
“Zion phughi, musa kevilo!
O-u pelo ijunayi ihi ape kevilo!
17AMPEU oLhou ye ogholo ani;
pa kukano tokulu otsuke.
AMPEU no oshou azukuvu shi nani,
eno pa kikimiye lono pano akuxu kithe
otsu nani.
Pano ojupe alephe alokivi shive nani,
timino tiqhetini tsalalo alovi akeshi
nani.”
18AMPEU no pi,
“Niye puhavenikeu pesu kichikeu ashekha
shivae eno okukujopu ikhisuwuvetsuae.
19Aghuloki wocheni!
Ino onedaqhi chekemiqo ghimeqhi nani;
Aphi-au kinitave kemiqo kumtsu ino hakho
sughi nani eno halephe sawuvekemiqo
aghakhulo saghi nani.
Ino pano kukujo pesu agigihupu shivetsu
nani,
eno ayeghiqha kumtsuno panoqo sheqhe
nani.
20Aghuloki wocheni!
Ino notimi apanagha akemi aghakhulo
saghi nani.
Ino ayeghiqhalo akemi zulo nonguye
ajekipipu shi tsu nani,
eno nongu pelo itaghi kini kulu shilupe
nani.”
AMPEU no pivae.
Currently Selected:
ZEFANIA 3: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
