HABAKUK 1
1
1Hiye AMPEU no Habakuk tungkupu lau piyesutsu keu sutsake.
Habakuk no Muchho
2O AMPEU, nono chilutsumoke kutolo eno heqhi buqhi keu lono nono nixalu tsumoke kutolo niye khitotohi ovilo kuphulepi igha amasa nani kya? 3Kushiye noye ipelo shiluksa eno akupuna ithulupe kya? Noye kishi puzu akumoushi akeu jupukulu acheni kya? Shikupsa eno heqhi buqhikeuno isuhope ani eno aqha kumtsulo kichighi kukuo eno mutokeu anie. 4Ayezah miqemilei eno adou shiauvae eno kuchou xakutha shitsukeu kuhae. Alhoksamino amikuchomi kopuhavae eno tishikehu kuchou xakuthaye shichighivae.
AMPEU no Khochile
5Tileno AMPEU no pawu timiqo vilo pike, “Ashiayeh nongu sukumxalo akeqo jukuto alo, nonguno ithulu keulo akichiqhive nani. Ino kiu kela lakhi shini chenike nonguno tipau ghili chilu kelo nonguye pulutsumo nani. 6Ino Babilon ayikusau eno ngosukumlau pesu akuka tsuno kutami yeghi lelupe nike puwuni cheni. 7Panonguye akumsa eno ichivekeu pekulha cheni eno pano qhekuza launo panono kiu yezah penishi keno pano gho shive nani.
8“Pano wu khurshiqoye angushu nguno akumthuu, muzuthi akeu tine nguno ayikusauke. Pano wu khurshi shou ikuno ala kushuwa lono ighi ani; pano khurshiqono ayeghi pighe. Aluquno achuyi yiluni kelo toi panonguno fufushi iqighi cheni.”
9“Pano wu aghushimino heqhi buqhi leluno azuu hawuke eno panonguno kupunu ighive kelo timi kumtsu thughuive cheni. Panoqono kughaluvekemiye asaye toi phikhamlake. 10Panonguno kukami phitsumoe eno kijemi junuqhi cheni. Aliwo qoghe kiu nomu panoqo lakhamla, panonguno tipa shou ayeghi puwo suno tipau bothasuluve cheni. 11Tipathiu panonguno amlhu toi jolesu cheve cheni, timi hipaqo lhouye pano kuka kumtoke.”
Habakuk no Muchho Kithe
12O AMPEU, noye abothu lono Alhou ke. Noye iLhou, akimthe eno lhoktake. AMPEU, iLhou eno sushokuluu, nono Babilonmi kishelu eno panoqo mutotoi shitsu, tishi anguno panoqo pelo nighimeqhi peniyeke. 13Ikemu noye kishino lhoksa kugha hekibidemi hipaqo jualu cheni kya? Onhethi ye shishe akimtheke kishino alhoksa shou jupukuni kya? Noye timino akumou shiaghi keu shou jupukumlake. Tishiaye panonguno panoqo nguno amikuchomi kutsaleve akeulo noye kushiye inaqhoi ani kya?
14Noye kishino akha momu tikha ninga loji ayehkipeu kuhakeqo peitha keshi timi peitha cheni kya? 15Babilonmino akha kumsupuyi pesu akha jikeshi timiqo jisawu cheni. Panonguno akhame lono timiqo sunhesawuve cheni eno panono melukeulo alokivishi igha cheni! 16Panonguno lhoxu heqhi pe akhame mlla cheni kughengu panoqo khameno thime kivi pesu panoqo loji achenike. 17Panonguye alhokupujulo pano zutakihi peitha anani eno kupukeu kuhano ashiayehqo kutsaleqhi acheuve nani kesha?
Currently Selected:
HABAKUK 1: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
