IPEKULU 14
14
Akuhu Zughi Kathakeu
1Tileno AMPEU no Muse vilo pi, 2“Israilmi vilo tsughu ideighi puzu Pi Hahirot zulo aphiki shilo pilo, tiye Migdol ngo Akuhu Zughi kuma dolo Bal Zefon kupunuloke. 3Akukauye ishi kumusu nanike, ‘Israilmiye aghakhulo kupunapughai eno asayelino lakhasupe aghinanike.’ 4Ino pa mlo hekikeve tsu nani eno pano panongu ha nani eno ino akukau ngo pawu ghushimiqo shou toluve keu huno ije kipipu shilunike. Tileno Ijipmi no ino AMPEU kepi ithi nani,” Panongu vilo pive keu toi Israilmino tipatho lono shike.
5Kughono Ijip lo akukau vilo timiqoye pokhavae pi pekeno, pa eno pawu kijemiqoye akukumsu kilive eno ishi pi, “Ninguye kiu shivea kela: Ninguno Israilmi pelo poveapeke eno niqemi shichekeu puhakhavae:” 6Akukauno pawu aghushi khurkulu eno ghushimiqo kutopesu ighive. 7Pawu aghushi khurkulu kumtsu tipa gholo pawu kijemiqo akiviu 600 sachekeqo ghi kuqhano sasuwu. 8AMPEU no akukau mlo hekikevetsu eno pano Israilmi hauve ke, panoqoye ahukulushi wuve che kelauye, 9Ijipmi aghushimino khurshi ngo, khurkulu eno tipau sache kemiqo kumtsu panoqo papesu hake eno panonguno khilehi aphiki shipuzu ngo akeno, Akuhu Zughilo Pi Hahirot ngo Bal Zefon kupunu lono panoqo haluve.
10Akukau ngo pawu ghushi miqono Israilmi kudau kuhapo chekeu ithulukelo timiqoye msakhokho shive eno AMPEU vilo kuphu lopi ighamuku ighae. 11Panonguno Muse vilo pi, “Ijip lo akumoki kuhave kesheno noye hilau asayeqha lono ningu sawo pithi niye shi kya? Nono Ijip lono ningu saipeghikeu lono kiu shive ani keno julo! 12Ninguno wumiphi lono hikithipu shinani kepi ovilo pikekumo kesha? Ninguno ovilo nikishi shivelo pivae eno nipelo Ijipmi qemi shi ache pelo pike. Hilau asayeqha lono thi akepuye tilau aqemi shi ache keumu pavini cheke.”
13Muse no ishi khochile, “Musaichi kevilo! Nonguno khile anikeno ithakevilo eno nonguno ishi tsalalo AMPEU no nongu xalunike kiu shinikeno ithulu nanike, nonguye Ijipmi hipaqo khilemu ithulu kithe move nanike. 14AMPEU no nongu ghenguno aghu shive tsu nani eno nonguye kiumu shiakepu kuha.”
15AMPEU no Muse vilo pi, “Nonguye kushiye kuphulo pi igha ani kya? Timiqo vilo azuu kudau wulo pilo. 16Okusu ikhiqhe pesu azughi shou pe ngolo. Azuye kije thaveno Israilmiye ayeghi qhai keu lono azughi katha chesusu wulu nani. 17Ino Ijipmiqo mlo hekike vetsu nani ikehu panonguno timiqo papesu wunani eno akukau ngo pawu ghushimi, pawu aghushi khurkulu eno tipau kusami qo shou toluve keu lono ije kipi shilunike. 18Kughou ino panoqo shou toluve nikeno Ijipmino niye AMPEU kepi ithi nani.”
19Alhou wu kungumi khuno Israilmi aqokitikhi zulo achekeno iqesusu athiu kudau wuve. Khungkusu tsukucho ghi iqesusu 20Ijipmi ngo Israilmi dolo wuve. Khungkusuno Ijipmi ghenguno zumoivetsu ikemu Israilmi lau akuvu tsuke ikehu putho kupujulo lakhi nomu lakhi lau kupunu wumlaveke.
21Muse no pau azughi shou chhopuwo eno AMPEU no kipelau mulhu kuloghi pesu azughi ghakide puwuvetsu. Tipauno puthotsu mulhu eno azughi pesu qhaikeu yeghi shitsu. Azuye kijetha vetsu, 22eno Israilmiye azuno hula hilau puwu pesu akeu qhaikeu yeqhi mta lono chesu wuluve. 23Ijipmino panoqo hawu eno panoqo papesu khurshi qo ngo khurkulu eno tipau sakichemi azughilo iloe. 24Tsukutho shinike zulo AMPEU no ami ngo khungkusu tsukucho lono Ijipmi ghushimiqo shou jupiqi eno panoqo pelo avehu izuvepe. 25Pano panoqo wu khurkulu kuluho qo medaluvepe ikehu tipaqoye ithamulano kupnave. Ijipmiqono pi, “AMPEU no Israilmi saphu puzu nisasu aghushi auvae. Ningu hileno ipevenie.”
26AMPEU no Muse vilo pi, “Azughi shou ou chhopuwo kithelo ishi aye azuno Ijipmiqo shou eno panoqo wu khurkulu ngo tipau sakichemi qo shou ikughive nanike.” 27Ikehu Muse no azughi shou pau chhopuwo kelo azuye qoidewo puzuu tholo kumtsaluve. Ijipmiqono azu lono poveniye pukaputsa ke, ikemu AMPEU no azughipelo panoqo vesuve. 28Ijipmi khurkulu, tipaqo sakichemi eno Ijipmi ghushimi khijehino azughilo Israilmi ha che keno azuno qoideghi puzu tipaqo yimve; panoqo gholo lakhimu puxu tsumoe. 29Ikemu Israilmiqoye azughilo qhaikeu yeghi lono chesu wulue, azuno hula hila puwu pesu akeu lono wuke.
30Tipa tsalalono AMPEU no Ijipmi launo Israilmi xaluve eno tipaqo thiveno azughi mukulo akumo yipe ighi keu Israilmino ithulu, 31AMPEU no akuka kije pesu Ijipmi leluvekeu Israilmino ithulu puzu AMPEU msaveke eno panonguye AMPEU lau eno pa qeu Muse shou akupulu auve.
Currently Selected:
IPEKULU 14: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
