2 KORINTHIAMI 8
8
Khristomi wu Tsukini
1Athikuzumiqo, Makedonia qhalo akukuhouqo lau Alhou wu kupukinino kiu shitsu ani keno ninguno nongu pelo ithipenishi ani. 2Panonguye akijikusa kitikhi sasu kusholue, ikeghi panongu lokiviye shishe kijeke eno panonguye kumlhomi shi anamu kupukunoshi pephetsuke. 3Kughengu ino ashepe tsulu nani ke, panonguno aghike qhemi tsuke,panongu likhi panongu gho apulou lono aghikeu qhemi nguno alau ghi 4Judia lo Alhou wu timiqo kuphunikeulo kusajelupe nikeu do kivi tsulepi panonguno ningu qhuinijuke. #Rom 15.26 5Hiye ninguno laju akeu vekiye tsuke, kughengu panonguno atughushi Ampeu lau panongu likhi panongu tsuve eno tishi puzu Alhou pulou lono ningu lau ghi panongu likhi panongu ikhiphetsu anike. 6Tipau kiqi lono ninguno Tito hakitekeuno pano abothu lono peitha ighiveke toi nongu gholo ghi hi kikimiye kumla hekutsukiyive tsulo pike. 7Nonguye thwokhalo: akupululo, atsapilo, akighithilo, kuphunishi kutukeulo eno nonguno ningu kimiyekeulo namu akini boghi shi acheni, titoi kimiyekeu kumla hipaulo ghi nongu kini boghi shi akeu pephepiyelo.
8Hiye ahza kutsu shi amoe. Ikemu kutamino kuphunishi kutu akeu nongu vilo pikeu lono nongu wu kikimiye ye kucho kepi ino ithiveniyeke. 9Kughengu nonguno Ampeu Jisu Khristo kupukini ithi anike, paye akini boghi shi ake, ikeghi nongu ghenguno pa likhi pano akumlhou shive, tishianguno pa kumlho pesu nonguye akini boghi shilupeniyeke. 10Avehu hipau ghenguno ikukumsu hipau tsu ani, wovekeu mipelo nongu paghino kiu shiphetsu eno kiu kumsuphetsu keno tipau itehiye shikupuve tsukeu pavike. 11Ikehu nonguno kiu anikeno tipau pesu puloniqhiyi kumsupu akeu shikuputsulo. 12Kughengu timi lakhino puloniqhiyi tsunishi aye, Alhou ye timi tipauno kuhakeu khuamo puzu pano kiu tsuluniye anikeno tipau ikhilutsu nani. 13Niye kutami makho kumthuvetsu puzu nongu makho kimshivetsuniyeke kumoe, 14ikemu kumtsu aqhemi shikepushi nonguno itodolo pofushi akeu hu kutamino avehupushi akeulo tsukepue, tishianguno kutamino pofushi kelo nongu vehupulo tsulupe kepue, tino aqhalo aqhemi shi ananike. 15Kuchoyesulo pipuake toi:
“Timi khuuno kutomo kichekutsu keno kiumu kutomo kutu aghimoe,
Khuno kitila kichekutsu keno kitila kutu aghimoe.” #Ipe 16.18
16Ninguno nongu hejunishiqhiyi akeu Alhou no Tito mlolo ghi tipau supuaghi tsukehu ninguno shishe Alhou shikimthi ani. 17Kughengu ninguno pa vilo qhuiniju kelauye paye tipau alopike likhi kumono pa ampino puloniqhiyi aghi, ikehu pa pulou lono pano nongu lau wuni cheni. 18Tito gholo athikuzuu khuu atsakiviu pikulhakeu ghenguno akukuhouqo kumtsuno akishe tsu acheni keno tipau pelo wupenikeu shi ani.
19Tilikhi kumono athikuzuu huye ninguno hi kimiyekini kumla shiakeulo ningu gholo kicheghuzu shipeniye akukuhouqono kishepe susuke, hipa kumlaye Ampeu jukuvupulo ninguno amlo tsuqhiyi akeu piyeni kehuke. 20Hi kumsano tsukeu gho ninguno peithatsukeulo timi khuu pelomu ni pulupusa pemonike kutokupuyi anike. 21Kughengu ningu kimijiye, Alhou zulo likhi kumono timi zulo ghi kiuno achipiu keno tipau shinikeu shi ani. #Ahole 3.4 22Panongu gholo nithikuzuu lakhi puwu ani; ninguno aghuloki jeli kutomo lono pa peithajuveake paye kiu kiulo namu hejunikeulo amlo tsuqhiyikeu ani, eno paye nongu shou pulubekeu kije ani kehu hejunishi qhiyi anike. 23Tito ye nongu ghenguno isasu kuloji kumtsa mla kuqhachekemi ke; eno athikuzumi kutamiqoye Khristo jukuvupu ghenguno akukuhouqono kishepuwukemiqo ke. 24Ikehu panoqo lau nongu kimiyekini eno nino nongu jupe akijivilo chekeu mutsuqheyi shipiyelo, tishianguno akukuhou kumtsuno tipau ithipenike.
Currently Selected:
2 KORINTHIAMI 8: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
