2 KORINTHIAMI 7
7
1Nikusamiqo, piqhipuakeu hipaqo ye nisala ghenguno aphiashi eno angu gha kitiqeve mono thwokhalo akimthe kupukulu shinike Alhou sukumsa lono xuni nolo.
Xaideghikeu Kukuhou Lokivi
2Nongu mlo ningu lau khaqhi tsulo. Ninguye milakhi shou mu pimi puamoe, ninguye khuumu shipusa puamoe momu khuumu pishiqhi puamoke. 3Niye nongu peveniaye hipatsa piamoke, kughengu ino puzuu piveke toi nino xuana thive namu nimlolo nongu kumsulu acheni. 4Niye nongu shou amlo tsuqhiyi bepe acheni, nongu jupe ikijivilo achenike. Niye amlolo alokughuno chhitoi acheni; nino akijikusa sholukeu kumtsulo niye alokivino chhitoi acheni.
5Ninguno Makedonia lo ighive kethiu ghi ningu shiaji pelo kitilamu akulho qhilu pemoke. Aqha kumtsulo kupunakeu aghive, ashouno kutami sasu mutokeu eno nimlolo akumsa ake. #2 Kori 2.13 6Ikemu amlo hauveno akemi shikumtotsu chekeu Lhou no Tito no ighilupekeu vechewo ningu mlo shikumto tsuke. 7Pano ighi keu likhino kumoe, ikemu nonguno kiu toikeu lokughuno pesu pa lokughunotsu keno tipau sutsa ghengu ghike. Nonguye kiutoi isasu kushonishi ani, nonguye ilau amlo ghime shiakeu, nonguno isaphu akeu pano ivilo pike, ikehu niye itehiye alovi kithe ani. 8Kughengu iwu yesu lakhiu huno nongu mlo kusapu shivetsue pinamu tiye imloghime shiamoe. Kughou yesu tipauno nongu mlo ghimevekeu ino ithulu keno, ado hitohi likhi kemu tiye imlo ghimeveni cheke. 9Itehi niye alovi ani, tiye ino nongu mlo ghimeqhitsu keghenguno kumoe, ikemu nongu mlo kusa huno nongu pelo akuxu xakidelu peke, kughengu amlo ghimeqhikeu tipau huye Alhou launo peithaluveke, ikehu nighenguno nonguno kumu puhapiyighive keu shipuamoe. 10Kughengu Alhou launo amlo ghime peithaluvekeu huye akuxu xakidelukeu sughitsu cheni, tino xakulupu lau sawu cheni eno tipau loye amlo ghimepu kuhake. Ikemu ayeghilo gholauno amlo ghime shikeu huye akithi sughi cheni. 11Alhou launo nongu mlo ghime kishi peithaluve akeno julo: hino nongu pelo amlo tsushekeu shiveapeke, nonguye kiumu pimi puamokeu mutsuqheyive nike khekulho shipeke. Achipikumomi ghime alo nongu pelo axuidepe, thughuyilupe. kumsulupe, amlo tsulupe eno kutolupeke! Hipau vehulo nonguye pimi puamo kepi alaghi thwokha lono nonguno mutsuqheyi piyevae. 12Ikehu niye nongu lau yesu yevea kemu ino yekeuye khuno pimivekeno timi tipau ghenguno kumoe momu khuu shou pimikeno tipau ghenguno kumoe, ikemu Alhou zulo nonguye nilau kishi amlo tsu achenikeno nongu lau pephepeniyeke. 13Tighenguno ningu mlo shikumtove tsuae.
Ningu mlo shikumtotsuke likhi kumo puzu Tito lokivi ithulu puzu ninguye alaushi alovivae, kughengu nongu kumtsuno pa mlo kiqipu shitsuke. 14Ino nongu ghili pa vilo ikijivilo ghi pikeulo nonguye kujovekepu shitsumoke. Ninguno thwokhalo nongu vilo kuchou picheke toi Tito zulo nikijivilo tsa pikeu hughi kuchou shi aghiveke. 15Nonguno msa khokhoshi puzu pa ikhilukeu ngo nongu kumtsuno aghokulushi keu pano kumsuchilelu puzu paye nongu shou kimiyeqhiyi keu shishe alau auvae. 16Ino nongu shou pukhubekulu shiluniake ghenguno niye alovi auvae.
Currently Selected:
2 KORINTHIAMI 7: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
