2 KORINTHIAMI 12

Paul Wu Kungunhetsu

1Qhezakeu lono kiumu ala shimla kemu itehi niye Ampeu no kungunhetsu ngo piyekusu qo ghili pini cheni. 2Ino ithi ani, ike ampe chighi-bidi shiveake Khristo timi lakhiye kungugha jolha akuthuulo sasu ikuveke, tiye aphimpino iku keo aphimpi pumono iku keno niye mthae, Alhou likhino ithi ani. 3Ino ithi akeuno timi tipauye kungugha lo sasu ikuve, tiye aphimpino iku keo aphimpi pumono iku keno niye mthae, Alhou likhino ithi ani, 4eno tilauno timi kichi lono pimlakepu tsa eno timi kichi no pimlakepu pano pilu eno chiluke. 5Timi tipau ghenguno ino qhezanike, ikemu ilikhi ighengunoye iwu tomo chhimokeqo kumo aye niye qhezamo nani. 6Ino qheza nishi aye, niye kughuzumi shivemo nani, kughengu niye kuchou tsa pini chenike; ikemu niye qhezamo nani, kughengu ino mlaitha aghike lono ni ithulu eno piake lono chilukeu nguno alauye kutami pelo niye kiu keno akumo akukuhau alau kumsupu aghipenishi moke. 7Piyekusu akumzapu jeli ipiyekeu pesu ino qhezauve nosake launo iphi ashilo akusupu lakhi supuatsue, tino Satan ghinimi lakhike eno tino iheqhipeniye eno ipelo ihulo qheza pemoniyeke. 8Ino ghuthu kuthu kutolo Ampeu vilo hipau ikhisuwuvetsu lopi qhuinijuke. 9Ikemu pano ivilo ishipi, “Iwu kupukiniye oghenguno lukumkha; kughengu ikukaye tomo chhimokeu lono akumto kije shilucheni.” Tishiaye niye ino tomo chhimono akeulo qhezani cheni, tishianguno Khristo kuka igholo achepe niyeke. 10Tishikehu Khristo ghenguno tomo chhimokeu, phimo gihumokeu, ghichhe ghime, akijipusakeu eno amlo kighishi sholu kelo niye amlo qiqhiyi cheni; kughengu kughou ino tomo chhimono ani keno tilehino ino mutotoilu cheni.

Korinthiami lau Paul Lokumsu

11Niye kughuzumi lakhi shiauvae! Nonguye ikughape peqhepuku akepu kelauye nonguno anguka lono ipelo aghuzuu shi anipeke. Kughengu niye kiumu kumokemu, niye kiu laghi lonomu ti “Apostolmi” akhotomi ipichekeqo nguno aqhokigheu kumoe. 12Niye apostolmi lakhike ipikeu michi nongu gholo shishe kutuo kutuu keu lono amchipu ngo akumzapu eno akichiqhipu kumla pesu mla puanike. 13Nongu vilo ikuphulo ipimovekeu ghenguno kumo aye, niye kiu lono akukuhou kutau nguno alhoksau shi nongu peitha puani kya? Hino achipikumove ake ikipimi pevetsulo.

14Hi ghuthu akuthuu niye nongu putsa ighinike kutope ani; niye nongu ghimeqhini chemoe, kughengu niye nongu kuakini phuchemoe ikemu nongu phuchenike, kughengu apuazano atianuli ghenguno pekikepe qhitsu cheni kethono atianulino apuaza ghenguno pekikepe qhitsu chemoe. 15Ino kiu aghi keno eno ikuxu kumtsu pesu nongu kuxupu ghenguno pevetsuni keuno ilokivi ke. Ino shishe nongu kimiyeke ghenguno nonguye akimkheu shi ikimiyeni kesha? 16Niye nongu punaqhi puamokepi nongu ghi pulo kuqhatsu aghiluvi. Ikemu nonguno niye amqu kinike eno akimiki lono nongu meluve ipike. 17Kiu lono tishi pikepu anikya? Ino nongu lau aghinikishimi puwukeqo vechewo nongu shou akumou shive kesha? 18Ino Tito vilo wulopi inijuke eno ino athikuzumi hu pa gholo puwuke. Tito no nongu shou akumou shive kesha? Ikujoye akukumsu akimiji aphiphi lono mlaitha eno apukhu nepa lakhi shi acheni ke kumo kesha?

19Ishiake, itehi kutolo nonguno kumsukeuye ninguye nongu zulo nilikhi ningu shokhaniye pukaputsa ani kughashi ani kesha? Tishiamoe! Alhou zulono ke ninguye Khristo no ningu pelo kishi pipenishi keno titoi pianike, ino kimiyechekeqo ninguno mla ithakeu kumtsu nongu kuphunikeu ghengunoke. 20Kughengu kughou ino ighini keno nonguye kiu toikemi shipenishi anikeno tipau nguno kutau shiaghivekeu musa ani eno nonguno niye kiutoi kemi shipenishi anikeno tipau nguno kutau shiaghivekeu musa anike. Ishiake, anhekushu, mutokeu, axukighide, aghukha shikeu, thaighakeu, timi ghili kughakeu, lahilazakeu eno kuthamlakeu aghi nani keniake. 21Ino tilau ighikelo itaghi iLhou no nongu zulono ishikukujokeu musa anike, eno timi kutomo ghenguno niye qa-mloni chenike, wovekeulo khunoqomi axine shive ti mithemokeu jeli ngo kipti toti dolo xine ngo ghasu hasumlakeu panonguno shipuani eno xukithe lumono anike.

Currently Selected:

2 KORINTHIAMI 12: SUMIBSI

Highlight

Copy