2 KORINTHIAMI 11

Paul ngo Kichileu Apostolmi

1Niye kitila aghuzu anikha shiniakemu nongu pelo kutuutsu penishi ani. Qeti kutuulo! 2Nongu ghenguno niye Alhou no anheshu akeshi nongu jupe inheshu ani; kughengu ilimi amikuchomi lakhi timi lakhino luniye inipe puakeshi niye nongu sawo Khristo tsuniye shiake. 3Ikemu apighino muqumugha vesu puzu Eva pishiqhive ketoi nongu kukumsu ghi mutsumishei eno tsaqutsaleyi Khristo lau amlo tsuchekeu launo sakughuzuve nike ino msatsu ani. #Bothu 3.1-5 4Kughengu timi khualano ighi puzu ninguno nongu vilo pikulhavekeu nguno kutau Jisu nongu gholo pikulha, angugha nonguno ikhiluvekeu nguno kutau ngugha ikhilu, atsakiviu nonguno ikhiluvekeu nguno kutau tsakiviu ikhilu ishive aye nonguye mulalei tipaqo gholo ilovae! 5Ino kumsuluakeuno niye “Kichileu apostolmi atomi” nguno aqhokigheu ke kumoe. 6Niye atsapilo shitsa shi aghimoluvi ikemu akighithi loye tishimoe; ninguye alaghi thwokha lono nongu vilo mutsuqheyi pivetsuake.

7Ino Alhou tsakiviu nongu vilo pikulha kelo nongu launo ame lupuamoe; nongu kughape suqhepuku nike ghenguno ilikhi isunheqhiveke, ike tiye achipikumo kesha? 8Niye nongu gholo mla chekelo akukuhou kutami launo akukuphu ithulu cheke, ike pinikeu loye nongu qeniaye niye kutamiqo ghesuqhi cheke. 9Kughou ino nongu gholo achekeno ino kiu avehupu shikeno niye nongu ghimeqhi puamoe, kughengu Makedonia kudauno athikuzumi ighikeqono ino avehupu shi aghikeu sughitsu cheke. Ike wovekeulo na ighinikeu tsalalo pinamu niye khilemu nongu ghimeqhimo nani. #Fili 4.15-18 10Khristow kuchou ilolo akehutoi, Akhaya qhalo khile khile pimu ino akijivilo chekeu hipau lakhave pemo nani. 11Niye kushiye hi piani kya? Ino nongu kimiye chemokehu kesha? Alhou kighithi: niye nongu kimiye chenike!

12Ino itehi kiu shiani keno niye tipau shi anani, tishianguno khunoqono pano kumlalo qhezaghi nino shichekeu toi pano ghi shichenie pi pichekeu akiqi lakhimu kuhave penike ghengunoke. 13Kughengu timi titoi keqoye kichileu apostolmiqo ke, pishikiqhimi akumlamiqo eno Khristo wu apostolmi kena ipi peniye muqumughashi ighikeqo ke. 14Tile akumza akepu kuhae, kughengu Satan thotsu akuvu akeu kungumi lakhi kena ipi peniye muqumugha shi cheni. 15Tishiaye Satan qemi ghi amikucho akeu qemi kena ipi peniye muqumugha shikelo akichiqhi akepu kuhae. Ashekha lono panongu kumla qhemi ajume ithulu nani.

Paul Apostol Ghime

16Ino pikithe ani, timi khumu niye kughuzumi ipikepu kumoe, ikemu nonguno tishi pikepu shiaye kughuzumi lakhi kemu ni ikhilutsulo tishianguno kitila iqhekuza shilupelo. 17Ino itehi aqhekuza kiu piani keno tiye Ampeu no pipenishikeu kumoke, ikemu kughuzumi lakhino piakeu paphi shiauvae. 18Tishimu timi kutomono timino kiqikululo qheza cheni keke nighi qhezanike. 19Nonguye alokutsumi kehu kughuzumi lau alokivishi kutuulu auvae! 20Tsala timi khamino nongu ahza tsu na, qhasuve na jukunathave na, agilo ghatsue pinamu nonguye ti kutuuluve cheni. 21Niye kujo pulaghi pini keuye ninguye tikithipulo miqemileyi kemike!

Ikemu timi khualano kiuala ghenguno ighumono qheza kepushi aye nighi tipau ghenguno ighumono qhezakulupu anike, niye kughuzumi lakhi toi pianike. 22Panonguye Ibrimi kesha? Nighi kethono. Panonguye Israilmi kesha? Nighi kethono; panonguye Abraham polo kughukomi kesha? Nighi kethono. 23Panonguye Khristo ghinikishimi kesha? Niye panongu nguno aghinimi akiviuke! (Niye izuphokicheyive kemi lakhi toi pianike.) Panongu nguno ino alau aghichhe ghime shipuani, ghuthu kutomo akughu shipuani, pikhamla kepushi timino iheqhipuani eno ghuthu kutomo thiveke kumlho shipuani. #Aposto 16.23 24Judamino ghuthu pungu kutolo shighi toku-ku hechighi chekeu ihepe puani; #Zaki 25.3 25Rommi no asulu pesu ghuthu kuthu ihe puani eno ghuthu lakhiye atupesu iveqhi puani. Ghuthu kuthu ino chechekeu shuka-ki kubolekeu sholu puani eno ghuthu lakhiye ghulo lakhi puthopucho azughilo ngo puani. #Aposto 16.22; 14.19 26Ino hijejehi kicheghuzu shichekelo, aghoki kumsapu sholu, suxakulumi kumsapu sholu, nilikhi niwu timiqo kumsapu sholu, ashiayeh kutamiqo kumsapu sholu, aphughilo kumsapu sholu timi kughunamokealo kumsapu sholu, azughilo kumsapu sholu eno kichile kusami kumsapu sholu ishi puani. #Aposto 9.23; 14.15 27Niye aghichhe aghime eno shilukusa shipuani, ghuthu kutomo zuhupe puamoe, amzu-atughu shi puani, ghuthu kutomo achuqupu kuhakeu, kusuqho kepu kuha eno aphimini kuhakeu shipuani. 28Hipaqo kumtsu nguno alauno, akukuhouqo ghenguno imlolo kumsu kimigheyikeu huno tsalakipetsu ikutakihiqhi acheni. 29Khuala tomo chhimono aghi aye nighi tomo chhimo ke kumo kesha? Khuala axinelo ikiqi ilove aye imlo pitipuza chemo kesha?

30Ino qheza kepushi aghi aye, ikutokumo kichepiye keulono qheza nani. 31Ampeu Jisu paPuh eno Alhou, paye alhokupujulo sheqhe akepu likhike, pano ithianike niye mikiamoe. 32Ino Damaska lo akelo, akukau Areta qholo akeu Ahng no itshuluve nike ghenguno aphughi khagholo aghukhumi qhipe puae. 33Ikemu aphughi liwo kighipe lakhi lono ashoghi lakhilo ilovepeno aliwo kighipe lono kighitipiqike eno niye tileno poluveke.

Currently Selected:

2 KORINTHIAMI 11: SUMIBSI

Highlight

Copy