HOSEA 7
7
1“Ai rui Ephraim khatni Samaria tuang paap khatni khuay guay ta how e. Kaniw khat khat ta guat the; kaniw rui kai swra gutna houc tu e; kaniw chaengdai chaengdai khou meic nunc tuang asut tat re. 2Mi simei guay ti hei ai ningtow bam puni twmei kaniw py khou gut zat mak ge; kaniw paap rui kaniw ta duam liam the, mi guay ta tei ai phaengc how tanh tan e.”
Saengcdaihmei nunc ta Guatmei
3 Ringhpouc rui sa e, “Meic nunc rui guangh ta khatni katuang meicdaihmei nunc ta simei taanv rui tineihlalouna kaniw ta guat the. 4Kaniw kaguayna meic guatmei e khatni kaipouc nunc ta nzian makmei nunc e. Ntyan kasiamhmei rui ntyan dwm tei nthiu khang biuh mak saanv katum thaulou makmei maimangc kumcna kaniw tuang karaengmei tei kagutc re. 5Guangh tuang khumngai nungc kaniw rui guangh khatni katuang meicdaihmei nunc ta zouh tizangv mba the khatni zouh rui sw mpanglou the. 6NgGuay, kaniw lungc tei sw kasic nimei raeng rui maimangh kumc chuangc the. Zingbangc saanvsaengh kaniw lungpuam tei kagutc the, kumna lauthwan thau pwkhou kabwang chuangc pat the.
7“Kaniw lungpuam thiu khou kaniw rui kaniw tuang dihsinpouc nunc ta swluai swtiat the. Kaniw guangh nunc ta akhat akhat swna swluai kan the, tiki kaniw gaanv khat na rui sini nkhavlou khang akhou ney mak ge.”
Isaraelmei khatni Zaatc guay
8 Ringhpouc rui sa e, “Isaraelmei hei kapaek raw minh makmei ntyan dwm kumc the. Kaniw hei kaniw daeng khou bam nkuay bammei zaat guay khou ngangvlou e. 9Kumna mi zaatc baihmei nunc khou lwmloumei hei rui kaniw tuang pumtan ntimh bam the twmei kaniw thay mak ge. Kaniw khang kaganv maek khe, tiki hei tei nganvna kaniw thay mak ge. 10Isaraelmei nunc tuang daihriw swmei rui kaniw khuay tei lyan bam the. Ramh kaguay tei patna bam tisini, kaniw akhou hanc guang dat mak ge twna Ringhpouc kaniw Racguangc rui sa e, 11Isaraelmei hei Izipmei khou paklou guai, Asiriamei khou paklou guaina mpangmei aphyna kumcna samc tat bam e. 12Tiki ai rui kaniw khang phah hynglou puni the kumna kaniw tatpat pwkhou nruayna manc kumhna manc puni the. Kaniw rui taanc kanmei simei taanv zaeng rui ai rui kaniw ta dandi tii puni the.
13“Kaniw sansi e dav! kaniw ata ganclou the khatni alat liam the! kaniw ta swmutlou puni the! Ai rui kaniw ta kanlou nii e, tiki kaniw ata ntwnna kalum mak khe. 14Kaniw zy zaengh khou pui huayna bammei ganv khou tei kaniw lungsyng thangc rui ata kaw mak ge, kaniw rui nap-bi khang khatni drakhadui khang ney pwkhou ravmaengc kalummei nunc thiak kumcna kaniw ta kazam kazei tipatna ney the. Kaniw hei adih latliam kanmei nunc cho! 15Ai hei kaniw ta makuat thauloumeipu khatni titancloumeipu e, tiki kaniw rui aruc khou si khang rana sw the. 16Kaniw hei akhou rui tatpatna pumtan maekmei rav nunc khou tat bam e. Kaniw hei nkhuaimei sauhpai kumc lwmnuh mak khe. Kaniw tuang kapy nunc kaniw gaengh swna sa bammei zaeng rui, kaniw buy-baeng mun khou theic puni, kumna Izipmei nunc rui nuiclou puni.”
Currently Selected:
HOSEA 7: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
