THAUREYMEI 1
RONGMEI-BSI
1
Mbaanv Damhmei Pary
1Thaurey khou, Ravguangc rui tingpuk lev kandih damclou khwan e. 2Mi ganv khou tei kalwn maekna khatni nsa karaeng bam khwan e. Duipui ta zinghmei rui gum zingh zing bam khwan e, kumna Ravguangc tuang bumaengc rui dui ruc khou tei kalung bam khwan e. 3Ravguangc rui “Gaanhmei nai kan di tho” twna sa the; khoutei gaanhmei pat the.#2 Ko 4.6 4Gaanhmei tei gay the twmei Ravguangc rui how the; kumna Ravguangc rui gaanhmei lev zinghmei ta kalangv baicna tipatlou the. 5Kamei rui gaanhmei ta “Kalaanv” khatni zinghmei ta “Zingbangc” twna kaw the. Zingbangc tat kan the, lauthwan guang dat the. Hei tei reymei tingmik the.
6Khoutei Ravguangc rui “Dui kak khou tingraeng nai kandi tho kumna hei tei rui dui ta sw ntamv kandi tho,” twna latdanv pat the.#2 Pi 3.5 7Kumna Ravguangc rui tingraeng damclou the, kumna hei tei rui tingraeng ruc khou khatni tingraeng bangc khou sw ntamvlou the. 8Kamei rui tingraeng ta tei “Tingpuk” twna kaw the. Zingbangc tat kan the kumna lauthwan guang dat the. Hei tei zaeng neih neimei tingmik the.
9“Tingpuk bangc khou naimei dui guay hei kabamv akhat khou guang kaduai kan di tho, kumna ramvkiang nai kan di tho” twna Ravguangc rui sa the. Hei tei kumna pat the. 10Kamei rui ramvkiang ta tei “Kandih” khatni guang kaduailoumei dui ta tei “Duipui” twna kaw the. Ravguangc rui hei tei gay the twna how the.
11“Kathai nthaimei, thingnuy paannu, phunling phunlu kazaat guayna kandih khou pat kan di tho” twna Ravguangc rui sa the, kumna hei tei pat the. 12Kumna kandih rui thingnuy paannu kazaat kaguayna tipat the. Ravguangc rui hei tei gay the twna how the. 13Zingbangc tat kan the kumna lauthwan guang dat the. Hei tei kathumhmei tingmik the.
14Ravguangc rui kumna sa the, “Zingbangc kalaanv nai khang khatni kating kaneic kakwm kaganv thay khang tingpuk khou gaanhmei pat kan di tho. 15Hei tei kandih khou tigaanh khang tingpuk khou gaanc bam kan di tho.” Hei tei kumna pat kan the. 16Ravguangc rui gaanhmei daihmei kanei damclou e, gaanc ranvmei kalaanv khang neihmik khatni gaancnaumei zingbangc khang bw kasiamhlou the. Kamei rui gaanchuangcna guay ta ni damclou the. 17Kandih khou gaanclou khang, 18zingbangc kalaanv kaipouc sw bam khang, khatni zinghmei khou rui gaanhmei ti-ntamv pat khang kamei rui tingpuk khou gaanhmei kanei damclou the. Ravguangc rui hei tei gay the twna howlou the. 19Zingbangc tat kan the, lauthwan guang dat the. Hei tei padeihmei tingmik the.
20“Dui khou tei ringhmei ramhkui zaat mpeyna rui padik kan di tho, khatni kandih ruc khou nruay thauruay rui padik kan di tho,” twna Ravguangc rui sa the. 21Kumna Ravguangc rui duipui khouringc daihmei nunc, dui khou bammei ramhkui guay kazaat kazaat swna damclou the. Ravguangc rui hei tei gay the twna how the. 22“Kingckiuc pat tho kumna duipui tipadik tho, nruay thauruay ni kandih ruc khou padik pat tho” twna Ravguangc rui suaihiamlou the. 23Zingbangc tat kan the kumna lauthwan guang dat the. Hei tei zaeng panguhmei tingmik the.
24“Kandih rui khouringh zaat guayna tipat kan di tho: kai khouringc khatni nwmbangc khouringc, khouringh daihmei ni nthyammei ni” twna Ravguangc rui sa the. Kumna hei tei pat the. 25Ravguangc rui mi guay tei damclou the, kumna mi guay tei gay the twna how the.
26Khoutei Ravguangc rui sa the, “Aniu maengc khou, aniu ta luihmei maansei kasiamh di kho; kaniw rui khav, nruay, khouringh kaguayna, khatni kai khouringc nwmbangc khouringc, daihmei nthyammei kapwmna ruc khou ngamv nai kan di tho.”#1 Ko 11.7 27Kumna Ravguangc rui maansei ta damclou the; kata luicna; damclou the. Kamei rui nggaanvmei lev ntumei damclou the.#Tha 5.1,2 #Met 19.4; Mrk 10.6
28Ravguangc rui kaniw khou heikumna suaihiamlou the, “Lungckingc lungckiucna lungcpat tho, kandih kapwm hei lungc padikpat tho kumna kandih ti hei sin tho; duipui khav, ga, nruay thauruay khatni kandih nam ruc khou kalung bammei khouringh katana ruc khou kaipouc sw tho. 29Nap-bi zaat kaguayna khatni tingthai paannu zaat kapwmna nangniw taektw khang tiilou the.
30“Nwmbangc khouringc guay khang khatni nruay thauruay, nku-nrui guay khang thingnuy paannu khatni ndiakcmei thingbang kaniw taektw khang tiilou the.” Hei tei kumcna pat kan the. 31Ravguangc kamei rui damcloumei puat guay ta tei zauc the, kumna kamei mpeyna pian the. Zingbangc tat kan the lauthwan guang dat the. Hei tei zaeng charukmei the. Kumna kamei pian the.

Rongmei Naga Bible (Revised) - NTHANMEI BAIBAL (Revised)

Copyright © 2013 by The Bible Society of India
Used by permission. All rights reserved worldwide.

Learn More About NTHANMEI BAIBAL (Revised) - BSI