1 KORINTHNYI 16
16
Kenondithu ghena Keben Khukechi
1 #
Rom 15.25-26
Khili nthu na Judea wi Anyiza nyithu ghena apisa khukechi cüki zhükechi tsü khi waden. Nthu na hi Galatia kemehuthu wi kekiza tsü nsathu yishü. 2Nthu tsüdila Apvüwa tsathang kaghapenla nthu apisa mukeya qei wina pahan pi theng lalo, isathu hi kegho wi nthu apisa nsaghula mehai. 3Hi gho lethu nthu na kessi ketheng anyithu tsü ghena lesü zhüchi nu mathu kesun pi nthu na keben khukechi tsü sen nu Jerusalem wi wa thsüben. 4Keujüla hi la kewa-u sa lethu, hi mathu gweghe waben.
Paul Kemeshen
5 #
Kek 19.21
Hi Macedonia hhainan wa keculi ccüla nthu wi ghoden, kepaghenanye hi Macedonia hhainan nwathu yishüben. 6Hi matsü pahan, saya mehaithu pathsü chuli nthu gweghe benla mechü, isanu tsaseng wi hi kijünyi khiewa waten khe nthu yala hi kiqa thsüden. 7Hi kewalen sala nthu hhainan mele ketan sa mvu nben; Apvüwa kemeshen ti lethu, hi matsü kesie nthu gweghe benden.
8 #
Lev 23.15-21; Aye 16.9-11 Hi Pentekost tsathang npi kecu chu he Efesa wi benden. 9#Kek 19.8-10 Kepaghenanye he wi hi keshun nyi na kejon ben lela kekuli keti nu kemehai sa keya matsü na ben.
10 #
1 Kor 4.17
Keujüla Timothi na nthu wi gho lethu, nthu nonkeghe sala ma ssiyalo, kepaghenanye ma la hi ti Apvüwa kekuli saden. 11Thola ma n-nansala, isala ma kiqa pi ma yala mehaitsü hi wi gho thsülo; kepaghenanye ma acünyuthu pahan ssi nu hi wi ghoben kesa nondiben.
12Hi ithu cünyuwa Apollo na acünyuthu pahan ssi wa nthu hhainan chilo ma kechü-kenong benden, isala ma hajü wale kesa tsü ma kemeshen nsa laben. Isala matsü kemehai muya lethu, ma ghaben.
Ajüh sakhenthu
13Meghe-metsa ben, kenondi wi zükeqhe nganya, kempvüza sa nu zükeqhe benya. 14Nthu kekuli tsüdi wi nanketizen wina salo.
15 #
1 Kor 1.16
Nthu na Stefana nu ma theghi cüki chüben; mathu na Akhaya yyi wi Khristanyi sakeya atuwa nu mathu tsü tsüdi pi Anyiza nyithu ghena kuli ketenthu. Icünyuthu, hi nthu wi khieben, 16anyi hathu ccülikesa kekhu wi ben, nu mathu gweghe kekuli sa ketenthu jüh kinalo.
17Hi Stefana, Fortunata, nu Akhaika mathu kegho ghena inonghe ben; kepaghenanye mathu na nthu nkemiwa tsü sacü, 18nu nthu sa pi anonghe kecü ti hi sa pi anonghe cüdha. Tsalina anyi hathu ha kechü-u le!
19 #
Kek 18.2
Asia yyi wi kemehuthu na nthu shalom saben; Aquila nu Piskilla nu manyi jjen wi kemehu nyithu na Apvüwa nyan wina nthu shalom saben. 20He wi acünyuthu tsüdila nthu shalom saben. Kemetha kekimangli wina khokho shalom satenlo.
21Hi Paul ikwen pi ha zhü pi nthu shalom saben.
22Thowa na Apvüwa tizen nten khe kishen-keshi ma miwi benlo!
Marana tha — Ithu Pvüwa, gholo!
23Apvüwa Jisu nanketizen ya nthu ssiben ketenwa salo.
24Jisu Khrista wi hi ketizen yala nthu tsüdi ssiben ketenwa salo.
Currently Selected:
1 KORINTHNYI 16: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
