1 KORINTHNYI 15
15
Khrista Hangneng-keshagha
1Icünyuthu, hi khili Jühtheü Kemehaiwa hi pi nthu sansi nu nthu na tsü yaya nu tsü miwi na nthu kenondi zükeqhe kebenwa tsü pi nthu kiza neng chi mvu ben. 2Tsüwa tsüna hi Ajühkemehaiwa ketsijüh pi nthu kesansiwa tsü. Keujüla nthu na zükeqhe tsü ghansen nu nthu kenondi tsü pi ma men nkemi nsa lethu, nthu hangsha yaben.
3 #
Isa 53.5-12
Hi mukeya ti pi nthu wi kiza, nu tsüna aghuti ntsawa: Ntsawajüh wi zhü ketheng ti Khrista na ithu kesami ghena shü; 4#Zak 16.8-10; Mat 12.40; Kek 2.24-32 Ntsawajüh wi zhü ketheng ti ma pi vhüa nu kecheng ghanan seng wi ma sa pi hang shagha thsüa; 5#Luk 24.34; Mat 28.16-17; Mrk 16.14; Luk 24.36; Jhn 20.19 ma Pitor tu wi gho nu tsaseng wi apostelthu taghakeni tsüdi tu wi gho. 6Tsaseng wi ma kutitan na ma senkeniethu meza manga gilli tu wi gho, mathu pahan na shüdha, isala kejiwa na khili la hangben. 7Tsaseng wi ma James tu wi gho, nu tsaseng wi apostelthu tsüdi tu wi gho.
8 #
Kek 9.3-6
Asakhenwa ma hi atsathang ncenla pvüghakeya ti kesawa ha tuwi la gho. 9#Kek 8.3 Kepaghenanye hi apostelthu tsüdi jawi kizza ntsawa, hi pi apostel kesü lela nci qo, kepaghenanye hi Anyiza kemehu metenmesha. 10Isala Anyiza nanketizen wina hi hati saben, nu ma nanketizen pi hi kecü tsüna ma men nkemi nye. Tsü miwi la hi apostel kepathu miwi apiketsü sa kuli, tsüna ntsakhiwa hi kulikeya nye, isala Anyiza nanketizen na hi gweghe kuliben. 11Tsalina tsüwa tsüna hi wina ghole mathu wina lela ithu tsüdila tsü pi sansiden, nu nthu na hawa ha nondiden.
Ithu Hangneng-keshagha
12Khili ithu ketsijüh na keshü wina Khrista sa pi hang shagha thsüdha kesa pi sansiben, isathu khati nu nthu pahan na keshü wina hang shagha nbenle khiya mehai nu? 13Keujüla keshü wina hangneng-shagha nben lethu, tsü ma jjügi keshü wina Khrista sa pi hang nshagha thsü; 14nu keujüla keshü wina Khrista sa pi hang nshagha thsü lethu, ikhang na pi nyu sansi keten ha mang men la nmi, nu nthu kenondi tsü la mang men la nmi. 15Tsü miwi la ikhang na Anyiza na keshü wina Khrista sa pi hang cüle kekhi ghena nyu na ikhang Anyiza cüki milikemesa khibenle khia kesa; isala keujüla keshüthu na hang shagha nbenle kesa tsüna ntsakhiwa lethu, Anyiza na Khrista sa pi hangneng ncü. 16Kepaghenanye keshüthu na hang shagha nben lethu, Khrista la sa pi hang shagha thsü nkesa. 17Keujüla Khrista sa pi hang nshagha thsü lethu, nthu kenondi na kaghacang kesü nu nthu na khilila kejang wi benla kesa. 18Isalethu, Khrista wi shü kesathu la dedia kesa. 19Keujüla ithu Khrista kenondi hana kepa wi nmila kahang hawa ghena ketan kemehai lethu, #15.19: Keujüla ithu kemehai lethu; nyelela Keujüla ithu tsüdila kahang hawa wi kenondi na Khrista wi ketan lethu ithu na ayyi nyi tsüdi miwi la ketizen kesawa sa kesa.
20Isala atsentsawa tsüna keshü wi jen kebenthu bi atuwa sala keshü wina Khrista sa pi hangya thsüdha. 21Kepaghenanye anyi kesü ghena keshü na gho kesa tsü makesü anyi kesü ghena keshü wi hang keshagha la ghodha. 22Kepaghenanye anyi tsüdila Adam wina shü kesa tsü makesü Khrista wina sa pi kahang wi shaghaya thsüaben. 23Isala tsüdila mehaitsü kesenniela shaghaben: Khrista na tsüdi wila atuwa; tsaseng wi Khrista kegho wi ma wi kebenthu. 24Tsaseng wi asakhenwa na ghoben; Khrista na kekhang kesenthu, kekhang kebenthu, nu kekhangthu tsüdi miwi khang yaben, nu Kadiyyi pi Abawa Anyiza cüaben. 25#Zak 110.1 Kepaghenanye Anyiza na aghinyithu tsüdila chaya nu pi ma ccü kekhu wi npi kechi chu Khrista na kedi nsathu yishü. 26Ghinyi asakhenwa yasa keten tsüna keshü. 27#Zak 8.6 Kepaghenanye Ntsawajüh na khiben, “Anyiza na pala tsüdi pi Khrista ccü kekhu wi chidha.” Isala “pala tsüdi” kekhi tsüna pala tsüdi pi Khrista ccü kekhu wi kechiwa Anyiza ma pi ciwi saghu nben kesa chütiben. 28Isala pala tsüdi pi Khrista ccü kekhu wi chi lethu, tsaseng wi Atsawa ma la ma ketanla ma pi pala tsüdi pi ma ccü kekhu wi kechiwa Anyiza kekhu wi chiaben; isanu Anyiza na tsüdi miwi kedi saben.
29Anyithu na keshü mithon wi baptaiz sa kebenthu tsü khati saben nu? Mathu na kaghang mangwa sacen yale saben nu? Keujüla pahan na kekhi ti keshüthu na hang shagha nben lethu, mangkesa na anyi tsüthu na keshü mithon wi baptaiz saben nu? 30Mangkesa na ikhang ketanla matsü tsüdi wi ikhang pi kemessi wi chiben ten nu? 31Icünyuthu, hi keshüthangla keshü metu benle! Hi nthu miwi kapvü ben, ithu kahang Apvüwa Jisu Khrista wi keben ghena hi ha khishiben. 32#Isa 22.13 Keujüla hi asajjü wi kaghang ketan ghena Efesa wi “aghangsa nkemehaithu” ssikaghashen lethu, hi kekiyi mangwa ben nu? Isala keujüla keshüthu na hang shagha nben lethu, hati khi keben ti,
“Ithu dhitsü wi shü wa keben ghena dsa nu jjü nalo.”
33Nyu ya nthu nmechu thsüla, “Kegweghethu nkemehai na ayencüki kemehai yasaden.” 34Nthu leben metsashhu sa nengya nu nsamila yilo. Kepaghenanye nthu pahan na Anyiza npi chüyale, hi ha khi pi nthu kejügheya thsüben.
Hangneng-keshagha Gwowa
35Pahan na keüben, “Khati keshü na hang shagha ben nu? Mathu agwo khati kesa pvüben nu?” 36Nthu kejüphon! Nthu na palacü pi ayyi wi yang kechi wi tsüna shü nkesa tsü hang shagha nten. 37Nu nthu pi yang kechiwa tsüna asu nyelela pala kepa wi cü kesü sabenla metsi khe nthu na maton pi sheng nchi. 38Anyiza na ma kemeshen wina palacü tsü pi maton sa cüden; nu ma palacü kesüsü kenie wina maton sa cüden.
39Nu kahangli kebenthu sajjü tsüdila makesü nye; anyi sajjü kepa, aghangsathu sajjü kepa, awathu sajjü kepa, nu anga sajjü kepa.
40Nu ciwi tang wi gwothu nu ayyi wi gwothu ben; tang wi gwothu tsikemehai nu ayyi wi gwothu tsikemehai kepapa. 41Aghani tsikemehai kepa, asha tsikemehai kepa, nu ghotsithu tsikemehai kepa; nu ghotsithu jawi lela tsikemehai kepapa na ben.
42Keshüthu na hangneng-keshagha wi hati saben. Agwo pi vhü kesawa tsüna shüden; hang shagha lethu, tsüna shü nben. 43Pi vhü kesa wi tsüna atsi nmehai nu nzü; hang shagha lethu, tsüna atsimehai nu zü yaben. 44Pi vhü kesawa tsüna agwo sajjü; hang shagha lethu, tsüna aghamulen wi gwo saben. Keujüla agwo sajjü ben lethu, ciwi aghamulen wi gwo benben. 45#Ade 2.7 Kepaghenanye Ntsawajüh na khiben, “Anyi atuwa, Adam tsüna kahangli keben kesü sahangchi”; isala Adam sakhenwa na kahang khukechiwa Aghamu. 46Aghamulen wi atuwa nye, isala agwo sajjü, nu tsaseng aghamulen wi. 47Adam atuwa tsüna ayyi pi zhü, nu ayyi wina shhugho; Adam keniwa tsüna tang wi na gho. 48Anyi thothu na ayyiwa ji sa khe ayyi pi zhü kechiwa tsüti kesa; thothu na tang wi ji sa khe tang wi na keghowa tsüti kesa. 49Ithu na anyi ayyi pi kezhüwa tsi ti kesa pvü keten tsüti anyi tang wi na keghowa tsi ti la pvü yaben.
501cünyuthu, hi khi kebenwa na asa nu ajjü hana Anyiza Kadiyyi ghongya nben, nu shü ketenwa tsüna shü nketenwa tsü pvüya nben.
51-52 #
1 Th 4.15-17
Kekuthi tsentsawa ha kinachilo: ithu tsüdila shü nben, isala khathansha wi tutuwa sakhen tsü khou chi khe ithu tsüdila wan anyon kekama kesü jüwi kemiliaben. Kepaghenanye khathansha wi tutuwa sakhen tsü khou chi khe keshü na hang shagha nu khiela shü neng nben, nu ithu tsüdila kemiliaben. 53Kepaghenanye dedi ketenwa ha kemili pi dedi nketenwa sa, nu shü ketenwa ha kemili pi shü nketenwa sa nsathu yishü. 54#Isa 25.8 Tsalina khathansha wi hati sa, nu shü ketenwa ha kemili pi shü nketenwa saya khe Ntsawajüh kekhi tsü cenyaben:
55 #
Hos 13.14
“O keshü, no khangkeya khie nu?
O keshü, no nyu patena ya kemehai kekhang tsü
khie wi ben nu?
56Keshü na kesami wi kekhang muya den, nu kesami na Ayenwa wi kekhang muya den. 57Isala ithu Pvüwa Jisu Khrista wina kekhang pi ithu kecüwa Anyiza seng ben. 58Tsalina hi ketizen icünyuthu, kiden-kesha nu zükeqhe ngan benlo. keshüthangla nthu Apvüwa kekuli kesa wi dhamang benlo, kepaghenanye nthu na Apvüwa kekuli kesa wi ma men nmi nsa kesa nthu na chüben.
Currently Selected:
1 KORINTHNYI 15: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
