EZEKIEL 7
7
Gwünkho Keni Le Israel Khonni Laso
1Npugü le aka zo, 2“Silakehü temi gü, Aphu sokekvu Npugü a higü le johi zope Israel kazü ki shü: Hile kazü gü apentha genyu keni so!
3“Israel, kenkhin gü le ryü laso. Ale nle thyükeshü dan ge jokera kebin genyu nle anyunkenta sha loti. Nle kentsükenchen tha thyü kela aphu genyu ale npu kethun ti. 4Ale n nrhoshü nmvue shwikenjün lope nhishü loho. Nle kentsükenchen tho thyü keshü genyu ale shaja pe ntsüti, tson-o nno ale Npugü le tse shalo nrün genyu.”
5Hile Aphu sokekvu Npugü le zobin nyo, “Kenke kebinbin kethyü le nge ryü hü. 6Tsü le lihikae. Hile kenkhin gü so. Nle ndi so. 7Kenkhin gü le hagun kazü tsügü nyu kebin aphu genyu ryü jüso. Gwünkho nni laso tsünyü kazüthun ki kenshünbin nme nyue shekerhün khwen ndi lao kevükeben nti lati.
8“Hagun le whütse anyunkenta aphu sha tiso. Ale hagun tho thyükeshü ge jokerabin, lo nle ketsükenchen tho thyü kela aphu genyu ale kethun nishü ti. 9Ale nrhoshü nmvue shwikenjün pe nhishü loho. Nle kentsükenchen tho thyü keshü genyu ale shaja pe ntsü ti, tson-o nno ale Npugü, shaja pe ntsü kehü gü tsü le tse shati.”
10Kenke jon le Israel nyu genyu ryü jüso. Kevükeben le ryü bin so. Kemakin le chonri laso. 11Kevükeben le gwakemvu chon kvu nsüshü bin. Anyugun kenya, teshwen nmvue zan kechwi thame bin loho.
12Gwünkho gü le ryüjü, tha kehei lo kejwe le a-min ndila nrün jon le khonni laso, kechamvule Sunggigü shaja le aphu ge ryü lati. 13Ha kethyü nyue yhun tho-o a-le nke kela sun hyu loho, kechamvule Sunggigü nyunkenta le aphu ge bin laso. Gwamvu kehü nyu nme-e rhün loho. 14Shukhun shülo aphu ndo lohü. Ai nme-e terinyu gümvu, kechamvule Sunggigü nyunkenta le aphu ge ryü lati.
Israel Nyu Kemu Genyu Shaja
15Tsonda nyu kega bin, kehokenyü lo kenyon le ka nyu bin laso. Lihigüe tegwenki kehü nyu le kega kethyü nyu si, lo lihigüe nyida nyu kebin nyu le kehokenyü lo kenyon nyu si lati. 16Temi peha le nsu le kazü ketejon nyu a-kerükeshü hontse tin sen-o kazüthun ki gü ti. Anyugun aphu anyu kemu genyu chüti. 17Temi aphu ben le kvumvu lo anyu kho le ndün ti. 18Tsü dan le ronphi ben lo ndün küti. Anyugun pe thula, lo anyugun aphu kemeni lati. 19Anyugun rakagi lo suna lope khekela kanyü hontseo pe tsonda nyu shwen ti, kechamvule Npugü le anyunkekhü jakeshü ka suna lo rakagi le anyugun kenilo mvula. Anyugun le tsü dan lope anyugun kenyü thyü lomvu, nmvue anyu ginnyülo mvula. Suna lo rakagi genyu anyugun le mula. 20Gwüngwa we anyugun le tso minketsen kezegwa dan genyu anyu sü thyü hü, ai anyugun le tsü lope kentsükenchen teromen thyüla. Tsügenyu Npugü le anyugun kenya lope anyugun le shwinyü kemvu nme thyü la.
21Npugü le zo, “Ale sinrünyi nyu no anyugun hon seülo, lo tejvü gwünkerho nyu no anyugun kenya aphu khilo-o nrhu lati. 22Kerühu nyu le a Kershvuka minketsen gü nrhu, lo tsü rhen yüo bonrhu bin-e ale nrimvu lati.
23“Tha aphu kevükeben bin laso-kazü gü nyu temi dukeshvu le sü- lo thagwakemvu le nyida dan sü laso. 24Ale senye gwamvu ritsin kethyü dan zenryüo anyugun no hagun ka dan nkhenlo lati. Ale senye dan no hagun kershvubin da nrhu keryü ka hagun dan nyu kenkotsin nyue anyun kun lati. 25Shekesi le ryüjü nyo. Hagun le gwaketha füe hyu loho. 26Kenke le kethen then ti, jolo gwakemvu le züri ketsun thyü yüryü ti. Hagun le sidyükezonyu no nyu sha loyo pe tesha lotse hiti. Püshükeda ju le thame pe temi senthyü lo nrün ndi, lo Peshünyu le thame pe me tsontsinlo nrün ndi lati. 27Raja gü le chüti, lo rajanyu gü le sidyü kenrin ndila, lo temi dan le nshvu pe ndün lati. Ale hagun le thyükeshü aphu genyu shaja pe tsüti, lo hagun le me jünkera keshü hontse pe hagun jün kera shüti. Tsü le ale Npugü letse kethyü pe hagun tesha ti.”
Currently Selected:
EZEKIEL 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
