EZEKIEL 6
6
Npugü Le Teromen Kershvu Nkhin Kethyü
1Npugü le aka zo, 2“Silakehü temi gü, Israel kazüthun zin nrishü, tson-o ajo pe anyugun tsü sh"olo. 3Israel kazüthun dan no Npugü jo nyülo- Aphu sokekvu Npugü a higü le zokebin nyülo, ale kazüthun, rincho, kazü kunni lo ketejon dan ka zo hü: Ale zhethon nipe temi dan le teromen rüshvu kehü bin dan nke lati. 4Kershvubin dan boren lo rünkegwa kerobin dan bokho lati. Tsünyu temi aphu teromen mhundyü nyu dushvu lati. 5Ale Israel temi simin dan pe kezen lati, ale anyugun run lope kershvubin temhun ka keze lati. 6Israel nyida aphu nke lati, tson-o anyugun kershvubin lo teromen dan vürenla, anyugun rünkenyi kerobin dan boren la, lo anyugun le kethyü aphu hyu mvu lati. 7Lihikae temi dan dushvu lati, lo nrhokelo nyu le ale Npugü letse sha loti.
8“Ale temi peha no dukeshvu tsü nrhilo lo kezen sen-o senye dan nyu gü, 9tsü nyu anyugun le me kazü nyu yhun tin lati. Tsüki anyugun le anyugun ketenyen kendi genyu akhela lo anyeki teromen lonyü kvukela genyu ale shaja pe anyugun tsü lo kemeni shü letse rüchün loti. Anyugun le gwakemvu lo kentsükenchen tho thyü kela genyu anyugun le anyugun npvü anyugun ntsü lati. 10Anyugun le ale Npugü lo ale petsü lolo tse kethyü zokeshü tsü le kenrun nyu mvu letse sha loti.”
11Aphu sokekvu Npugü le zo, “Israel nyu le gwakemvu lo kentsükenchen tho aphu thyü kela genyu nyungwakemvu nyu chüo benjen-o sezenlo. Anyugun le teri, chenda lo kehokenyü genyu siti. 12Nithen ki kebin nyu le ho-o si; khoka kebin nyu le teri nyu gala; lo rhünkelo nyue khün-o si lati. Anyugun le anyunkenta kekvu aphu shati. 13Simin dan pe teromen dan nyu lo kershvubin kehun nyu ketokeryü, rincho ketetso ge, kazüthun raki, senbin kenjvü pha lo teshobin keda aphu hensin, lo anyugun le rope teromen kershvubin aphu kezen lati. Tsüsiki ale Npugü letse temi aphu sha loti. 14Ele, ale aben ketoshüo anyugun kazü nke lati. Ale Israel nyu le yhun kehü bin nme-e nsen mvu tse, tesinzin kazü kesi ka nsin gü tesozin Ribla nyida keti pe kenke bin nme thyü shüti. Tsüselo temi aphu ale Npugü letse sha loti.”
Currently Selected:
EZEKIEL 6: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
