EZEKIEL 5
5
Ezekiel Le A-pe Thula
1Npugü le zo, “Silakehü temi gü, zhethon yi kegwa khilo-o nmünhü lo npe thula. Tson-o nhü dan lope kesükü ka süo kenjün pe kenshen thyülo. 2Mele Nyida gü hun penkelo ka jün nme pe tsünyu rola. Lo jün kenyhun gü sen-o nle nyida hunlo zhethon lope tsü du. Lo kenshen gü lope tsangkenbu ki shwen shü, lo ale azhethon sen-o tsü hüti. 3Keshanyu pe nphishwen ka jwen lo. 4Lo tsü peha khikho nilo-o pe mah nyu shwen shü, lo tsü no rola. Tsü nyu mah le kezen sen-o Israel senye apentha nyu güti.”
5Aphu sokekvu Npugü le zo, “Jerusalem nrishü lo. Ale tsipwen kecha no a-hun-o a-lope a-lvu nyu shü. 6Ai Jerusalem le a johokeshü ntsun lo senye kecha da nyeki gwamvukvu, a-hunpvü kebin tsipwen dan nyeki ajo zenmvu kvu letse tesha laso. Jerusalem le a johokeshü khela lo a tejvü dan zen mvula. 7Tsügenyu nyülo, Jerusalem, Kekvutsin Npugü a hile nyu zobin yo. Hagun le ajvü zenmvu nmvue a johokeshü then kemvu genyu nhun kebin senye dan nyeki kevü kvu laso. Nle senye kecha dan jvü then tinla so. 8Tsügenyu, Aphu sokekvu Npugü a higü le nkenrhinyu letse nka zobin le. Ale senye aphu hyulo kegwa bin nyu njün kera ti. 9Nle ale ntsü kehü aphu thyü kehü genyu ale himhundyü thyü kemvu nmvue hisikie thyüni kemvui shaja pe Jerusalem tsüti. 10Tsühontse kethyü nyu Jerusalem nyu a-pepvünyu le a-nyenyu tyü, lo me nyenyu le a-pepvünyu tyüti. Ale shaja pe hagun tsüti, lo yhun kebin dan-e liki hiki nren nru lati.
11“Ale rhünkehü Sunggigü genyu- higü le Aphu sokekvu Npugü jo- nle gwakemvu lo kentsükenchen tha aphu thyü pe a Kershvuka nrhu kela genyu, ale nshwinjün mvu tse n nke lati. 12N temi jün shen thyüo nme no nyida nyu kehokenyü lo khün kethyü nyu siti, jün kecha gü no nyida ngwenki zhethon pe dushvu ti; lo jün kenkhin gü hükezen pe luki hiki shüo zhethon pe anyugun hü ti.
13“Ale rünyun la kemvuthen nno anyunkenta kenthün shati. Hidan aphu thyü keryü ka nle Npugü a higü le nle joketsin sen kemvu genyu anyun nthün-o nka zo letse sha loti. 14Nhun kebin senye n nken kegü nyu aphu nshwinyüo nzen-o nithen lati.
15“Ale anyunta lo nthün-o shaja pe ntsü kethyü ka, nhun kebin senye aphu kerü ti. Anyugun le n nrio ntsü lo nshwinyü ti. 16Ale nketyüketsü pe ntsü mvulao nno khün ti. N kenyon le thotsei nipe n nkela nrün hontse ti. 17Ale kenyon lo tehen thyü nipe nnyenyu nke, lo keho lo thyü teri nipe n nke lati. Npugü a higü le zo laso.”
Currently Selected:
EZEKIEL 5: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
