KOLOSINYU 4
4
1Npu nyu dan, hagun ko tsangge hagun Npu nme le bin nyo tsekethyü rüchün-o hagun gonyu ge a-kezü gü lo kenjü gü thyülo.
Senkethyü Jo
2Kehi thyü zin binlo, khwen lo lüthyüo Sunggigü shwen binlo. 3Lo ale a-genyu dothyü kebin Khrista jo kentsun gü zope me hishülo nrün genyu Sunggigü no kakhin shye pe ayi tsülo tse ayi genyu ko hi binlo. 4Tson-o ano zokezü gü zo tsentsü shülo nrün genyu.
5Tegwenki nyu zen kengü kethyü ka ndo gwa salo; gwünkho kegwa hyu kelo ka tsünyu senthyü kegwa thyülo. 6Hagun jokezo no tsi pe yün kethyü hontse meno nyünyü ho kethyü jo zolo, tson-o hagun lihigü joe keni nishü kezü keni keshü jvü shalo.
Kelu Keshü Jo Kekhin
7Tukika le arüla aphu pe hagun ka zoshü ti, a-le keso asikezen nyu nme, a-le ketsin thyüo kengüo lothyü kehünyu nme le. 8Hagun no ayi rüla shalo titse lo a-no hagun thukeyhun shü nrün rüchün-o ale a-nipe hagun ka shü lenye. 9Hagun dan nyu temi nme, joketsin zo kehü keso asikezen gü Onesimus le au ryü zhü nyo. Au le hagun ka hinyu tha thyü kebin aphu zoshü ti.
10Ayi kengüo lothyü kebin gü, Aristarka le hagun kelu shü le nye, lo Barnaba sikezen gü Mark ko hagun kelushü le nye. (A-rüla hagun ka zokeshü tsü hagun le hyulo laso; a-le hagun ki ryülo zenlo nye). 11Lo Jisu Justa le tse ko kehü gü ko hagun kelu shü le. Hidan hile gikerünyu dan nyu chwikeryü dan le, anyugun le azen kengüo Sunggigü keda genyu thathyü hü, tson-o anyugun le keche sa ryü le.
12Hagun dan nyu Epafra tsekethyü, Jisu Khrista gonyu nme le hagun kelu shü le. A-le hagun no Sunggigü kendo sha n tsenlo njüo nnumvu lo peshülo titse hagun genyu a-yhenthyü kehi thyü zin bin hünyo. 13Lo a-le hagun lo Laodikianyu, lo Hirapolinyu genyu a-kekvu thyü kehü ale shabin nyo. 14Ngun keso Luk dawa keshagü lo Dema ko tse hagun kelu shü le.
15Laodikianyu npvü nyu ju lo Nimfa lo a-kanyu kehun kehü ju ka ale anyugun kelu shü le tse zoshü nye. 16Hagun le lesü higü hi swülo lo khipe Laodikianyu kehun kono swü nye, lo hagun genyu Laodikianyu dan ka lesü nme le ryü ti laryü tsü swü nye. 17Lo Arkipa ka, “Npugü ka lotho hyu kelo gü tsü thyü pen shülo,” tse zoshü nye.
18Ale Paul a npvü aben lope hagun kelu keshüjo hi thu shü le. Tegiron pe aphin sen kehü rüchünlo; shwikenjün gü no hagun zen bin kelo gü thyülo.
Currently Selected:
KOLOSINYU 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
