KOLOSINYU 3
3
1Hagun le Khrista sin-o pen solo laya tselo, Sunggigü njüzin bin kela Khrista le kebin teso ge hon dan fülo. 2Hagun nyun pe kazü nyu hon dan mvu le tesoge kebin hon dan rüchün lo. 3Kechamvule hagun le silao hagun kerhün ron pe Khrista kesin-o Sunggigü ben nyu kebu pe bin laso. 4Ngun kerhünron bin gü Khrista le me yhühyu thyü keryü nyü, hagun ko a-zen zankechwi thyüo meno hagun hyulo ti.
Keyhun Whengü Lo Keyhun Keshün gü
5Tsügenyu hagun kazünyu nthyü min le nnyü kehü: Keyüla, nshün kemvu, serikemvu thyü kenyü, lo thaketepen tsü pe teromen kerüshvu hidan hi boshvula lo. 6Tha hidan hi genyu Sunggigü nyunkekhü le ryü zhü nyo. 7Hagun ko gwüngwa nme tsünyu bin hü, hagun le tsünyu yhun kehüka.
8Ai ntsoka we nyun kenta, nyun kekhü, n jvü gwakemvu, metsin kethyü, nmün nyu kemokenu jokezo hidan hi aphu khela lo. 9Khinyunyu sa nya, kechamvule hagun le temi whengü lo a-tho aphu khekela si genyu. 10Tsüntimvule hagun le temi keshün gü khiben lo laso, tsügü thyü kenshün nipe thakesha ketsin nyu a-nyhun keshü gü hontselo hünyo. 11Tsühontse Griknyu lo Judanyu, gikerünyu lo girükemvunyu, Skithianyu, do, do kemvu, tson bin ai Khrista le tsüdan aphu hon, lo a-le tsü aphu dan nyu hü kü.
12Tsügenyu hagun Sunggigü le kejülo kela hontse nshün lo a-sonyu thyülo kela genyu, me shwikenjün ketekho kemvu, nyun ketsenyo, bwen kethyü lo nyun kethon, 13khinyunyu ge a-keshathyü tsekehü, khinyu nyu ge kenyo ai jü pe ketsülo, Npugü le hagun kemu jü pe hagun ketsü hontse hagun ko me kemu jü pe tsü mvulo shvu. 14Lo tsü aphu nyeki tha lihi-e phin kerhün pe nme thyülo kehü gü keso gü khi benlo. 15Khrista nyun kebwen no hagun nyun ntsenlo, kechamvule hagun no tsü sen-o min nme thyülo nrün genyu hagun kokelo le. 16Khrista jo no hagun nyun nyu bin kegwa thyülo, ketsin lü, kenshün lü lo Kapu lüthyüo hagun khinyunyu kesenthyü lo thukeyhun bin lo; lo hagun nyun ki Sunggigü shwen zin binlo. 17Tsüntimvule hagun jo nyue, hagun thonyue, thalihi kethyü aphu ka Npugü zan nyu thyülo, lo a-genyu n Pvü Sunggigü shwenlo.
Keyhun Keshün Nyu Keyhun
18Me nunyu dan, hagun nyepvünyu jo zenlo, kechamvule Npugü nyu kehü nyule tson hüzü kethyü genyu.
19Menyepvünyu dan, hagun nunyu solo, anyugun nshwen nya.
20N tsenyu dan, thalihi ka-e hagun pepvünyu jo zenlo chi; kechamvule tsühontse kethyü tsüle Npugü le a-kenyü kehü genyu.
21Mepepvünyu dan, hagun nyenyu nyun gwün kekhün nya; anyugun shese lalo keshvu genyu.
22Megonyu dan, thalihi ka-e kazü hinyu hagun npu nyu jo zenlo; me yhühyu ka me kenyü thyü titse kethyü genyu mvu ai hagun nyun njüo Npugü kenshvu nyu thyülo. 23Hagun no tha lihi thyülo tse-e temi lothyü mvule Npugü lothyü kebin hontseo thyülo. 24Hagun le Npugü kanyu kenya hagun chün hyulo ti tsekethyü tsü shalo. Hagun le Npugü Khrista lothyübin nyo. 25Kechamvule thyüzü kemvu thyü kehünyu le a-le thyüzü kemvu chün hyu loti; a-le temi nme so kecha thyü hümvu.
Currently Selected:
KOLOSINYU 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
