1 THESSALONIANYU 4

Sunggigü Kenyü Thyükelo Keyhun

1Tsüselo apvünyu ju, hagun le aka dihontse yhun züyo lo Sunggigü kenyü thyülo tiyo shalo kela hontse lo tsünye ki-e thyü binlo lotse ale Npugü Jisu nyu hagun ka hi lo hagun thu keyhun shübin nle. 2Kechamvule ale Npugü Jisu zan nyu hagun no nyu thyülo lotse hagun ka zoshü yo hagun le shabin nyo. 3Sunggigü kendo gü le hagun no nshün bin kethyü gü tsü, lo tsüle hagun no keyüla nyu hagun kekheni kelo. 4Tsüle dihontse kenshün nyu le kerühvu nyu tenu nme lope a-nu thyülo tiyo hagun aphu shabin nyo. 5Sunggigü sha hü kemvu nyu dan hontse kenyü yhüdyü gü nyu nya. 6Lo temi nme-e tejvü gwünrho-o a-sikezen gü nshwen nya; tsügenyu ale himhundyü nyun yhün sa tse hagun zen ketse lo tsinhi keshü hontse, Npugü le tha hihontse kethyü aphu nyu me khün zo kehü genyu. 7Kechamvule Sunggigü le nko pe nno nshün kemvunyu mvule kenshün nyushülo laso. 8Tsügenyu temi lihigüe jo tsügü zen kemvunyu le temi mvule a-Kenshün Kapu khi pe hagun ketsü Sunggigü jo zenmvu hünyo.

9Ai tsagü sikezen nyu khinyunyu so kethyü rüla we temi nme-e no lesü thu pe hagun tsümvue gwa; kechamvule khinyunyu so nrün rüla hagun le hagun npvü Sunggigü le hagun senthyü shü kelasi genyu. 10Ketsin le hagun le Makedonia nyu kebin hagun pvünyu aphu so hünyo. Ai apvünyu ju, ale hagun no tsü thyü chon kenyelo lotse hagun thu keyhun shü bin nyo. 11Lo himhundyü hagun ka kezo hontse hagun bwenye tse yhunlo, lo hagun npvü hagun tho gü thyülo lo hagun npvü hagun ben no tha thyülo. 12Tson yatselo tegwen ki-e mele hagun shwen ti, lo tha nme-e rhodyü mvu loti.

Npugü le Nigunryü Nrün

13Ai apvünyu ju, ale hagun no zhütin kelanyu rüla shamvu bin nyü mvu; kechamvule hagun no me kechanyu a-sidyü kendinyu hontse hagun nyun gwakemvu no bin mvu nrün genyu. 14Lo nle Jisu le silao rhünniso kela tenyen kebin si genyu, tsühontse Jisu kipon bin-o sikela nyue Sunggigü le a-sin-o zen ryü ti.

15Ale hagun ka zoshü kebin higü hile Npugü jo nyu hyulo le, lo tsüle n gun rhün bin-o Npugü le nitsükeryü tilo nrün dan le zhütin kela dan mhundyü rilo ho. 16Kechamvule tsangge jolo kedagü le kvukelo khwen thyüo sen shülo Sunggigü shu gü khun shü ntsin Npugü le a-npvü tsangge nra sen tsüryü nrün genyu, tsontsin Khrista kipon hüo si kelanyu le rhünniso loti. 17Lo ngun rhün kebin, zenlo mvu kebin dan-e ten pe nmhu ge tsüdan kesin gungü tsangne ki Npugü zen keteno ti; tson-o nle Npugü zenzin bin tinla ti. 18Tsügenyu hagun jo hi lope khinyunyu nyun thyü nbwen binlo.

Currently Selected:

1 THESSALONIANYU 4: REGSBSI

Highlight

Copy

Compare