MALAKI 3
3
Hongpai Ding Toupa Sawltak
1“Ngai in, ka sawltak ka sawl a, aman ka ma ah lampi a bawlkhol ding a Toupa, na zon uh, a biakin ah thakhat in a hongpai ding; na kipahna uh, thukhun sawltak, ngai un, a honghi,” sepaihte Toupa’n a chi.
2Himahleh a hong paina ni kuan a thuakzou thei dia? A honglat chiang in kua a dingzou dia? Amah hihsiangthou mei leh sahbon bang ahi ngal a. 3Huchi in dangka hih siangthoumi leh siangsakmi bang in a tu ding a Levi tapate a hihsiang ding hi, dangkaeng leh dangka bang in amau a khuahsiang ding a, huchi in diktatna in Toupa kiang ah thillatte a lan ding uhi. 4Huaichiang in Judah leh Jerusalem thillatte nidanglai bang leh tang a kumte bang in Toupa ading in namtui a hi ding hi.
5“Huan vaihawmna ah aisanmite kalh in, angkawmte kalh in, zuau a kichiamte kalh in theihpihpa kin ka hi ding a, loh thu a migoih, meithai, nu leh pa bei, nuaisiah, a thuneihna a kipan mikhual kaiheipa, kei hon kihtaloute kalh in, na kiang uah ka hongding sepaihte Toupa’n a chi.
Sawm A Khat Piak Ding
6“Kei Toupa ka zulhzau kei a; huaiziak in Jakob tapate aw, halbei in na omkei uhi. 7Na pipute uh damlai a kipan ka thusehte na kilehheisan ua, na zuikei uhi. Ka kiang ah hongkik unla, na kiang uah ka hongkik ding, sepaihte Toupa’n a chi. Himahleh nou, koi ah i kik ding ua? na chi uhi. 8Min Pathian a lok diam? Hinapi in noute’n n’on lok uhi. Himahleh nou koi ah k’on lok ua eita? na chi uhi. Sawm a khatte ah leh thillat ah. 9Hiai nam pumpi in, kei n’on loh ziak un hamsiatna a hamsiat na hi uhi. 10Ka inn sung a an a hongom theihna ding in koihkhomna inn ah sawm a khat avek in hon lalut unla, huai in kei hon entel un, sepaihte Toupa’n a chi hi. A koihna ding dantan kiching omlou khop in van tohlette hong in, vualzawlna k’on buakkhe kei na hiam! 11Huan negaimi pen nou ziak in ka sal ding a, na leigahte uh a suse kei ding hi; na grepgui u leng lou ah a hun tunma in a gah a kesak kei ding hi, sepaihte Toupa’n a chi. 12Huchi in nam tengteng in nang nuamsa a honchi ding ua; gam kipahhuai na hih ding ziak un, sepaihte Toupa’n a chi.
Toupa Dem a Thugenna
13“Kei dem a na thute uh a khauh hi” Toupa’n a chi. “Nou koi ah nang dem in thu ka gen ua eita” na chi uhi. 14“Pathian nasep a thawn ahi”; a thupiak i zuih ua, sunna puan silh a sepaihte Toupa ma a i om uh bang a a phattuamna” chi uhi. 15Tuin kisatheite nuamsa chi in, a gitlouhna nasemte tunding in a om uh; ahi; Pathian khemte hotkhiak in a om uh” i chi uhi.
16 Toupa kihtate a kihoupih ua; huchi in Toupa’n a ngaikhia a, a za a, Toupa kihta a, a min ngaihtuahte a ma uah theihgigena laibuzial ah gelh ahi. 17“Huan amau kei a a hi ding ua, gou lamdangtak ka bawl ni chiang in” sepaihte Toupa’n a chi. Min a nasem amah tapa a hawi bang in huchi in amau ka hawi ding hi. 18Huai hun chiang in na hong kihei ding ua, diktatte leh giloute, Pathian nasem leh amah semloute kal na khenchian thei ding uhi.
Currently Selected:
MALAKI 3: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.