2 PETER 3
3
Toupa Hong Paina Ding Thuchiam
1Deihtakte aw, tua na kiang ua ka gelh laikhak nihna ahi. Hiaite gel ah theih thak nawnna in na lungsim siang uh ka tokthou hi. 2Zawlnei siangthoute thugenkholh leh na sawltakte uh kam a Toupa leh Hondampa thupiak na theihgigena ding un. 3Hiai thei masa un, ni nanungte ah, misimmoh hatte amau utna bang a om in, simmoh kawm in ahong pai ding uhi. 4Ahong pai nawnna thuchiam koi ah? Siam tung a kipan bangkim a-om ngeingei bang in pi-le-pute ihmut ni a kipan in a-om zel ngal a! ahon chi ding uhi. 5Pathian thu in nidanglai pek in vante ahong om achih akitheihmohbawl ua, tui a kipan leh tui zang a leitung kibawl ahi a, 6huai tui mah in atum a, amangthangta hi. 7Himahleh tua vante leh lei omte huai thu mah in Pathian limsak lou mite vaihawm leh manthat ni a ding a sit in mei hihsiat ding a kholkhawm ahita hi.
8Himahleh deihtakte aw, hiai thu kam khat pen mangngilh kei un, Toupa ngaih in ni khat tuh kum sangkhat bang ahi a, huan kum sangkhat leng ni khat bang ahi, chih. 9Mi khenkhat in zekai asak bang un Toupa zaw athuchiam ah azekai kei hi; kuamah manthat deih lou a, mi tengteng hong kisik deih in noumau lam ah adohzou zaw ahi.
Mansa A Om Poimohna
10Himahleh Toupa ni zaw guta bang in ahong tung ding; huai ni chiang in nakpitak a ging in vante amangthang ding, thilbulte mei a haitui in a-om ding a, lei leh asung a nasep omte, akangtum ding hi. 11Huai thilte huchibang a mangthang vek ding uh ahi chih na theih un, omdan siangthou leh Pathian limsakna lam ah mi bangchibang hi ding na hi ua. 12Pathian' Ni ahong tun baihna ding lamen leh phatuamngaitak a ngak in; huai ni atun ziak in vante hong kang in amangthang dia, thilbulte leng mei a haltui in a-omta ding hi. 13Himahleh athuchiam bang in van thak leh lei thak, asung a diktatna omte i lamen hi.
14Huaiziak in deihtakte aw, huai bang thilte na lamet ziak un nin baang lou leh gensiatbei in, khamuangtak a na om uh ahon muhtheihna ding in thanop suah un. 15Huan i unaupa deihtak Paul in leng akiang a pilna piak bang zel a na kiang ua agelh bang in Toupa dohzohna hotdamna in sim un. 16Alaikhak tengteng ah huai thute gen in, huai mah bang in agelh hi. Huai ah thu theihhak thu thukte a-om a, huaite mipil lou leh mikiploute'n Laisiangthou dang angaihkawi bang un angaikawi ua, amau leh amau siatna ding in azang uhi.
17Huchi in deihtakte aw, noute'n tua thute na theihkholh ziak un pilvang un, huchi lou in zaw migiloute diklouhna a pimang a om in, na kipna ua kipan na pukkha ding uhi. 18Himahleh i Toupa leh Hondampa Jesu Khrist hehpihna leh theihna ah hong khang un. Tu leh tangtawn in amah kiang ah thupina om hen, Amen.
Currently Selected:
2 PETER 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
