2 PETER 1
1
Chibai Bukna
1Simon Peter, Jesu Khrist sikha leh sawltak in, i Pathian leh Hondampa Jesu Khrist diktatna ziak a ginna manphatak i tan bang tang samte kiang ah: 2Pathian leh Jesu i Toupa theihna ah hehpihna leh khamuanna noute ah hihkhan in om hen.
Pathian Sapna Leh Telna
3Ama thupina leh hoihna ziak a hon sampa, atanchin theih ziak in ama Pathianna thilhihtheihna in hinna leh Pathian limsakna lam thu ah thil tengteng ahon peta hi. 4Huaite ziak in athuchiam manphatak leh thupi mahmahte ahon pia hi; huchi in utna ziak a khovel a siatna hong om taikhiaksan in; huai thuchiam manphatak leh thupi mahmahte ziak in Pathian omdan na kikoppih thei sam ding uhi.
Khristian Omdan Kilawm
5Ahi, huaiziak tak in, thanop himhim suah in, na ginna uah hoihna hel unla, na hoihna uah theihna hel unla, 6na theihna uah kidekna hel unla, na kidekna uah kuhkalna hel unla, na kuhkalna uah Pathian limsakna hel unla, 7na Pathian limsakna uah unaute itna hel unla, na unaute itna ah itna hel un. 8Hiai hoihnate nou a ahih a, akhan zelleh i Toupa Jesu Khrist theihna lam ah thadah lou leh gah lou lou in nou ahon bawl ding hi. 9Kuapeuh huai thilte nei lou mittaw, naichikte kia mu thei, anidanglai khelhnate siansakna mangngilhte ahi uhi.
10Huaiziak in unaute aw, nou ahon sapna leh ahon telna hihkip ding in thanop suah semsem un; huaite na hih uleh chik lai mah in na puk kei ding uhi. 11Huchi in Jesu Khrist i Toupa leh Hondampa'n tangtawn gam a lutna ahon musak lo mahmah ding hi.
Thutak A Kiphuhkipna
12Huaiziak in huai thilte nei in na kiang ua om thutak a phuhkip hita mah le uchin, huai thutak mah ka hon theisak nawn ding hi. 13Huan hiai pumpi a ka om lai teng noumau hon theihpih in hon tohhalh gige hoih ka sa hi. 14I Toupa Jesu Khrist in hon theihsak bang in ka pumpi puanin koihkhiak hun ding hong tung pah ding chih ka thei hi. 15Ahi ka paikhiak nung in huai thilte na theihgigena ding un ka kisuk ding hi.
Zawlneite Leh Peter Theihpihna
(Mat 17.5; Mar 9.7; Luk 9.52)
16I Toupa Jesu Khrist thilhihtheihna leh ahong paina thu ka hon theihsak lai un, tangthu piltak a ngaihtuahkhiak phet zui ka hi kei ua, athupina mute ka hi zaw uhi. 17Ama'n Pa Pathian kiang a kipan in pahtawina leh thupina amu a, huchih lai in thupina thupitak a kipan in hichibang aw akiang ahong tung hi, “Hiai ka Tapa deihtak, ka kipahna mahmah ahi,” chi in. 18Huan tang siangthou a akiang a ka om ziak un huai aw van a kipan a hong suak koumau ngei in ka za uhi.
19Huchi in genkholhna thu kip nawn sem i nei uhi. Khua ahong vak a, zingsol aksi na lungtang ua ahong suah masiah hiai thu khawnvak mun mial a vak alimsak bang ua, na limsak uleh na hihhoih ding uhi. 20Laisiangthou a thugenkholh himhim eimah kihilhchet ding ahi kei chih thei masa un. 21Thugenkholh himhim mihing thu a pawt ahi ngei kei a, mite'n Kha Siangthou sawl in, Pathian a kipan agen zaw uhi.
Currently Selected:
2 PETER 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
