1 PETER 5
5
Upate Leh Tuailaite
1Huchi in na lak ua saptuam upate kei na upatpih uh, Khrist thuaknate theipa leh thupina hong lang ding tang sam ding in hiai bang in ka hon hanthawn hi: 2Na lak ua Pathian belamhonte ching unla, enkol un, sawl teitei ziak hilou in, Pathian hon deihna bang hi zaw in, punna thanghuai deih ziak hilou in, kithalawptak zaw in, 3na tante uh tung ah kiliansak tuan lou in belamhonte zuih ding a kibawl zaw in, kem un. 4Huchi in Belamchingpa lianpen ahong lat chiang in, Thupina Lallukhu tul thei lou na mu ding uhi.
5Huchi mah bang in, nou valnoute aw, upate nuai ah lut un. Ahi, na vek ua nna kisepsaktuah chiat ding in thunuailutna in kithuam un;
“Pathian in kisatheite adou a,
kingaineute bel hehpihna ape nak hi.”
Thuhilhna Vantang
6Huaiziak in ahuntak a nou ahon pahtawi theihna ding in, Pathian khut hattak nuai ah kihihniam un; 7ama'n ahon limsak gige ziak in na mangbatna tengteng uh amah tung ah nga vek un.
8Pilvang unla, limsak un; na melma uh diabol, humpinelkai humham bang in anawmvalh ding zong in avialvak hi. 9Na unau uh khovel a omte tung ah huchibang thuaknate atung sam chih thei in gingkiptak a om in, amah dou un. 10Huan hehpihna tengteng Pathian, atangtawn thupina tang ding a Khrist a nou hon sampa ngei in, sawt lou kal na thuak nung un ahoih bukim a hon bawl in, hon hihkip in, ahon hihhat ding hi. 11Amah kiang ah vaihawmna tangtawn in om hen, Amen.
12Ka unaupa muanhuaitak Silvanas khut in, noumau hanthawn leh huai Pathian hehpihna taktak ahi chih thei in, tomchik in na kiang uah ka gelh ahi; huaite ah dingkip un. 13Babulon a om noumau bang a telnu'n chibai ahon buk hi; huchibang in ka tapa Marka in leng chibai ahon buk ahi. 14Itna kitawpna a tawp in chibai kibuk un, na lak ua Khrist a om peuhmahte kiang ah khamuanna om hen, Amen.
Currently Selected:
1 PETER 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
