1 JOHAN 1
1
Hinna Thu
1Hinna thu, atung a kipan a ana omta, koute'n ka zak uh, ka mit ua ka muh uh, ka et kilkel ua, ka khut ua ka khoih uh, 2huai hinna latsak in ahong omta a, koute'n ka mu uhi, huai tangtawn hinna, Pa kiang a-omleh koute kiang ah latsak a om noute kiang ah ka hon puang uhi; 3huai koute'n ka muhsa uh leh ka zaksa uh mah noute kiang a ka puankhiak uh, huchi a noute'n leng koute toh kithuahna na neihtheihna ding un; koute kithuahna bel Pa toh a Tapa Jesu Khrist toh kithuahna ahi. 4Noute na kipahna uh abukimna ding in hiai ka hon gelh uhi.
Pathian Vak Ahi
5Huan thukhah akiang a kipan a ka zak uh na kiang ua ka hon hilhsawn uh hiai ahi; Pathian zaw vak ahi a, amah ah mial a-om kei hi. 6Mial a om napi in amah ka kithuahpih chi lehang zuau i gen a, thutak i zui kei uhi. 7Himahleh amah vak a a-om bang a eite leng vak a i omleh i kithuah chiat ua, huan a Tapa Jesu sisan in i khelhna tengteng ahon silsiangsak zel hi.
Khelhna Thuphatawina
8Khelhna ka nei kei chi lehang eimah leh eimah i kikhem a, eimah ah thutak a-om kei hi. 9I khelhnate thupha i tawileh i khelhnate ngaidam ding leh i diktatlouhna tengteng silsiang ding in amah amuanhuai in adiktat hi. 10Thil ka hihkhial kei i chihleh amah zuauthei in i bawl ua, athu leng ei ah a-om kei hi.
Currently Selected:
1 JOHAN 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
