MATTHAÏOS 5
5
Ka jingïathuhkhana halor u lum
(5:1—7:29)
1U Jisu u la ïohi ïa ki paidbah bad u la kiew sha u lum, ha uba u la shong. Ki synran jong u ki la ïalum sawdong ïa u, 2bad u la sdang ban hikai ïa ki:
Ka jingsuk bashisha
(Luk. 6:20-23)
3“Suk kito kiba tip ba ki long kiba duk ha kaba kynja mynsiem;
ka Hima ki bneng ka long ka jong ki!
4 #
Isa. 61:2
Suk kito kiba sngewsih;
U Blei un pyntngen ïa ki!
5 #
Salm. 37:11
Suk kito kiba sngewrit;
kin ïohpdiang ïa kaei kaba U Blei u la kular!
6 #
Isa. 55:1,2 Suk kito kiba ka jingangnud bakhraw tam jong ki ka long ban leh ïa kaei kaba U Blei u dawa;
U Blei un pynhun jrut ïa ki!
7Suk kito kiba isynei ïa kiwei pat;
U Blei un isynei ïa ki!
8 #
Salm. 24:3,4 Suk kiba khuid ha ka dohnud;
kin ïohi ïa U Blei!
9Suk kito kiba trei na ka bynta ka jingsuk;
U Blei un khot ïa ki, ki khun jong u!
10 #
1 Pet. 3:14
Suk kito kiba shah pynshitom beiñ namar ba ki leh ïa kaei kaba U Blei u dawa;
ka Hima ki bneng ka long ka jong ki!
11 #
1 Pet. 4:14
“Suk ma phi haba ki briew ki krenbeiñ bad pynshitom beiñ ïa phi, bad ong bun jait ki jinglamler basniew pyrshah ïa phi namar ba phi long ki nongbud jong nga. 12#2 Khrn. 36:16; Ki Kam. 7:52To kmen, to sngewkmen, namar ïa ka bainong bakhraw la buh na ka bynta jong phi ha ki bneng. Kane ka long da kumno la pynshitom beiñ ïa ki nongïathuhlypa kiba la im ha shuwa jong phi.
Ka mluh bad ka jingshai
(Mrk. 9:50; Luk. 14:34-35)
13 #
Mrk. 9:50; Luk. 14:34,35 “Phi, phi long kum ka mluh ïa u paid bynriew baroh. Hynrei lada ka mluh ka la blad noh, ym don kano kano ka lad ban pynbha pat ïa ka. Ka la kylla long ka bymdondor, kumta la bret noh ïa ka sharud bad ki briew ki ïuh halor jong ka.
14 #
Ïoan. 8:12; 9:5 “Phi, phi long kum ka jingshai ïa ka pyrthei baroh kawei. Ïa ka nongbah ba la tei halor u lum ym lah ban buhrieh. 15#Mrk. 4:21; Luk. 8:16; 11:33Ym don uno uno uba thang ïa ka sharak bad buh ïa ka hapoh ka shang; hynrei u buh ïa ka halor u diengpynïeng sharak, na kaba ka ai jingshai ïa baroh kiba hapoh ka ïing. 16#1 Pet. 2:12Ha kajuh ka rukom ka jingshai jong phi ka dei ban shai ha khmat ki briew, khnang ba kin ïohi ïa kiei kiei kiba bha kiba phi leh bad ïaroh ïa u Kpa jong phi uba ha bneng.
Ka jinghikai shaphang ka Hukum
17“Wat pyrkhat ba nga la wan ban pyndam noh ïa ka Hukum u Moses bad ïa ki jinghikai jong ki nongïathuhlypa. Ngam shym la wan ban pyndam noh ïa ki, hynrei ban pynurlong shisha ïa ki jinghikai jong ki. 18#Luk. 16:17To kynmaw ba katba ka bneng bad ka pyrthei ki dang sah, ym don iwei i dak iba rit tam lymne i bynta iba rit tam na ka Hukum ïa iba yn pyndam noh — ym haduh kaba kut jong kiei kiei baroh. 19Kumta te, uno uno u bymkohnguh wat ïa iba rit tam jong ki hukum bad uba hikai ïa kiwei pat ban leh kumjuh, un long uba rit tam ha ka Hima ki bneng. Ha kawei pat ka liang, uno uno uba kohnguh ïa ka Hukum bad uba hikai ïa kiwei ban leh kumjuh, un long uba khraw ha ka Hima ki Bneng. 20Kumta, nga ong ïa phi, ba phin lah ban rung shapoh ka Hima ki bneng tang lada phi ïaineh skhem kham palat ban ïa ki nonghikai Aiñ bad ki Pharisi ha kaba leh ïa kaei kaba U Blei u dawa.
Ka jinghikai shaphang ka jingbitar
(Luk. 12:57-59)
21 #
Eks. 20:13; Deut. 5:17 “Phi la ïohsngew ba la ong ïa ki briew ha ka por mynbarim, ‘Wat pynïap briew; ïa uno uno uba leh kumta yn wallam sha ka jingbishar.’ 22Hynrei mynta nga ong ha phi: ïa uno uno uba bitar ïa la u para yn wallam sha ka jingbishar, ïa uno uno uba khot ïa la u para ‘Me u bymlarkam ei ei!’ yn wallam ha khmat ka Dorbar Bah, bad ïa uno uno uba khot ïa la u para ‘u bieit bymmyntoi’ un don ha ka jingma ka jingleit sha ka dujok ding. 23Kumta hamar ba phin ai ïa ka jingai jong phi sha U Blei ha ka duwan bad hangta phi kynmaw ba u para jong phi u don ei ei pyrshah ïa phi, 24to ieh ïa ka jingai jong phi hangta ha khmat jong ka duwan, khie leit shisyndon bad ïasuk bad la u para, bad nangta sa wan pat bad ai ïa ka jingai jong phi sha U Blei.
25“Lada uno uno u wallam ka jingmudui pyrshah ïa phi bad ïalam ïa phi sha ka ïingbishar, to ïapynbeit noh ïa ka jingïakajia bad u katba dang don ka por ha shuwa ba phin poi sha ka ïingbishar. Shisien ba phi la don hangta, un aiti ïa phi sha u nongbishar, u ban aiti ïa phi sha u pulit, bad un set ïa phi ha ka ïingbyndi. 26Hangta phin shong, nga ong ïa phi, tad haduh ba phin da siew dep ïa ka pisa bakhatduh jong ka jingshahdaiñ kuna.
Ka jinghikai shaphang ka jingklim
27 #
Eks. 20:14; Deut. 5:18 “Phi la ïohsngew ba la ong, ‘Wat klim.’ 28Hynrei mynta nga ong ha phi: uno uno uba khmih ïa ka briew bad kwah ban ïoh ïa ka u la hap ha ka jingpynrem jong ka jingklim bad ka hapoh ka dohnud jong u. 29#Mat. 18:9; Mrk. 9:47Kumta lada ka khmat kamon jong phi ka pynlong ïa phi ban leh pop, khlaw noh ïa ka bad bret noh ïa ka! Ka kham bha ïa phi ban duh noh shi bynta na ka met jong phi ban ïa kaba ka met jong phi baroh kawei yn shah bret sha ka dujok. 30#Mat. 18:8; Mrk. 9:43Lada ka kti kamon jong phi ka pynlong ïa phi ban leh pop, to ot noh ïa ka bad bret noh ïa ka! Ka kham bha ïa phi ban duh ïa kawei na ki kti jong phi ban ïa kaba ka met jong phi baroh kawei ka leit sha dujok.
Ka jinghikai shaphang ka jingpyllait tnga
(Mat. 19:9; Mrk. 10:11-12; Luk. 16:18)
31 #
Deut. 24:1-4; Mat. 19:7; Mrk. 10:4 “La ong ruh, ‘Uno uno uba pyllait ïa la ka tnga u dei ban ai ïa ka, ka jingthoh pynbna ïa ka jingpyllait tnga.’ 32#Mat. 19:9; Mrk. 10:11,12; Luk. 16:18; 1 Kor. 7:10,11Hynrei mynta nga ong ha phi: lada uno uno u briew u pyllait noh ïa la ka tnga, na ka bynta kano kano ka daw lait noh na ka jingbymïaineh jong ka, te u long uba la shah rem ha kaba pynlong ïa ka ban klim lada ka shongkurim biang; bad u briew uba shongkurim ïa ka, u ruh u klim.
Ka jinghikai shaphang ka jingsmai
33 #
Leb. 19:12;
Jkhñ. 30:2; Deut. 23:21 “Phi la ïohsngew ruh ba la ong ïa ki briew ha ki por mynbarim, ‘Wat pynkheiñ ïa ka kular jong phi, hynrei to leh ïa kaei kaba phi la smai ha U Trai ban leh.’ 34#Jak. 5:12; Isa. 66:1; Mat. 23:22Hynrei mynta nga ong ha phi: wat pyndonkam ïa kano kano ka jingsmai haba phi pynlong ka jingkular. Wat smai da ka bneng, naba ka long ka khet jong U Blei; 35#Isa. 66:1; Salm. 48:2lymne da ka khyndew, naba ka long ka jingïuhkjat jong u; lymne da ka Jerusalem, naba ka long ka nongbah jong U Syiem uba khraw. 36Wat ym smai da ka khlieh jong phi, naba phim lah ban pynlieh lane pynïong ïa iwei i shñiuh. 37Shu ong ‘Ho-oid’ lane ‘Em’ — kano kano kawei pat kaba phi ong ka wan na Uta uba Sniew.
Ka jinghikai shaphang ka jingpynhiarkput
(Luk. 6:29-30)
38 #
Eks. 21:24; Leb. 24:20; Deut. 19:21 “Phi la ïohsngew ba la ong, ‘Ka khmat namar ka khmat, bad ka bniat namar ka bniat.’ 39Hynrei mynta nga ong ha phi: wat pynhiarkput ïa uno uno uba leh sniew ïa phi. Lada uno uno u thab ïa phi na ka ngab kamon, ai ba un thab ïa ka ngab kadiang jong phi ruh. 40Lada uno uno u ïalam ïa phi sha ka ïingbishar ban mudui ïa phi na ka bynta ka sopti-poh jong phi, ai ha u ïa ka jaiñkup jynsur ruh. 41Bad lada uwei na ki shipai u pynbor ïa phi ban kit ïa ka jingkit jong u shi kilomitar, to kit ïa ka ar kilomitar. 42Haba uno uno u pan ei ei na phi, to ai ïa kata ha u; haba uno uno u kwah ban pan kylliang ei ei na phi, to ai kylliang ïa u.
Ka jingieit ïa ki nongshun
(Luk. 6:27-28,32-36)
43“Phi la ïohsngew ba la ong, ‘Ieit ïa ki paralok jong phi bad isih ïa ki nongshun jong phi.’ 44Hynrei mynta nga ong ha phi: ieit ïa ki nongshun jong phi bad duwai na ka bynta kito kiba pynshitom beiñ ïa phi, 45khnang ba phi lah ban long ki khun jong U Kpa jong phi uba ha bneng. Namar u pynlong ïa ka sngi kaba u la thaw ban tyngshaiñ ha ki briew kiba sniew bad kiba bha kumjuh, bad u ai slap ha kito kiba leh ïa kaba bha bad ha kito kiba leh ïa kaba sniew. 46Balei U Blei un ainong ïa phi lada phi ieit tang ïa ki briew kiba ieit ïa phi? Wat ki nonglum khajna ki leh ïa kata! 47Bad lada phi kren tang ïa ki paralok jong phi, hato phi lah leh ïa kaei kaei kaba kham pher? Wat kiba mane blei thala ki leh ïa kata! 48#Leb. 19:2; Deut. 18:13Phi dei ban long kiba janai — kumba U Kpa jong phi uba ha bneng u long uba janai!
Currently Selected:
MATTHAÏOS 5: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.