THUVARHAI 2
2
Varna zawngna ra
1Ka naupa, ka thuhai hi i pawm a,
Nangmaa ka thupêkhai hi i siekhâwl a,
2Chuonga varna tienga i na chu i sit a,
Hrietthiemna tienga i lungril chu i hmang chun;
3Anih, ngairuotdikna chu i ko a,
Hrietthiemna koa i râwl în suo bawk a,
4Tangka anga i zawng a,
Ro phûm rûkhai anga i zawng suok chun;
5LALPA ṭitna chu hung hre tâng i ta,
Pathien hrietna chu hmu suok tâng i tih.
6LALPA chun varna a pêk sih a;
A baua inthawk chun hrietna le hrietthiemna hung suok a tih.
7Mi tluong ta ding chun varna hrisêl chu a siekhâwl a;
Lungril ṭhataka fetuhai ta ding chun phaw a nih.
8Rorêlna lampuihai chu a vênghim theina ding le,
A mi inthienghai lampui chu a vawngṭhatna dingin.
9Chun, rorêlna le felna chu hung hrethiem tâng i ta,
Thlierbîk nei nawna chu, anih, lampui ṭha tinrêng el le chun.
10Varna chu i lungrila chun hung lût a ta,
I hringna ta ding chun hrietna chu inhawitina nîng a tih.
11Ngairuot thiemna chun nangma chu vêng a ti cheh a,
Hrietthiemna chun kawl tlat a ti che;
12Mi rilo lampuia inthawka sansuok ding che le,
Thil khawhlohai hriltuhaia inthawka sansuok ding chein;
13Inthimna lampui hraw dinga,
Felna lampuihai nghatsantuhaia inthawk le,
14Rîtlona thaw kawnga hlimtuhai,
Mi rilo khawhlonaa lâwm hlaktuhaia inthawk le,
15An lampuihaia mi kâwihai,
An lampuihai pêtsantuhaia inthawkin.
16Hmêlmak nuhmeia inthawka sansuok ding chein,
A bâuthluma zaihlêmtu che, ram dang mi ngeia inthawk chun;
17A tleirâwl lai ṭhien chu nghatsan a,
A Pathien thuthlung theinghiltua inthawk chun.
18A in chun thina chu ân nghâi zing a,
A lampuihai chu thinaah:
19A mânu kuoma fetu chu tukhawm an hung kîr nâwk ta nawh a,
Hringna lampuihai khawm chu an pâw phâk ngai bawk nawh;
20Mi ṭhahai lampui chu i hraw theina ding le,
Mi fel lampuihai chu i hraw theina dingin.
21Mi tluong chu rama chun chêng a ta,
Mi ṭha famkim chu a um zing ding a ni sih a.
22Nisienlakhawm, mi khawhlo chu rama inthawka sât thlâk nîng a ta,
Bawsetuhai chu amaa inthawk chun zunga phawi hmangin um an tih.
Currently Selected:
THUVARHAI 2: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
