LEVI DÂN 14
14
1LALPA chun Mosie a biek a, 2#Mt 8.4; Mk 1.44; Lk 5.14; 17.14 “Hi hi inphâr a inthien nia a thaw dân ding chu ning a tih: Thiem- pu kuoma ṭhuoi ding a na;
3thiempu chu riebûk puotieng fe suok a ta, en a tih. Inphâr chu a phârna chu a dam ta chun,
4thiempu chun, a inthienna ding chun, vate hring inthieng pahni le sidar thing le patzai sen le husop hung chawipêk ding thu pêng a ta;
5thiempu chun vate pakhat pil bêlah vadung tui luong chunga that dingin thu pêng a tih.
6Vate hring ruok chu, sidar thing dâm, patzai sen dâm, husop dâm le chun chawi a ta, vadung tui chunga vate thata um thisena chun phûm vawng a ta;
7inphârnaa inthawka inthien ding chu, thisen chun vawi sari thêng a ta, ân thieng tah tiin phuong a ta; chun, vate hring chu ramah insuong a tih.
8Chun, a inthien ding chun a puonhai sâwp a ta, invaw fai vawng a ta, an sil ding a nih; chuongchun, inthieng hung nîng a ta; chu zo chun riebûkah fêng a ta, amiruokchu, a puon in puoa chun ni sari a um ding a nih.
9Chun, a ni sari ni chun a lu sam po po le a khâkhmul le, a mitkho hmul dâm vaw kawl a ta, a hmul po po chu vaw fai vawng a ta; chun, a puonhai sâwp a ta, ân sil ding a nih; chuongchun, inthieng hung ni tâng a tih.
10“Chun, ni riet ni chun berâmte a chal pahni demkailo le berâmte a la pakhat, demkailo kum khat mi le, fâkmi thilinhlân dinga beiphit indi- tak epha hmun sâwma ṭheha hmun thum hrieka hmet le hriek limlai khat a chawi ding a nih.
11Chun, ân thientu thiempu chun a inthien ding le chuong thilhai chu intuokna puon in kawtkhâr bulah LALPA hmaah sieng a tih.
12Thiempu chun berâmte pakhat chu hriek limlai khat le chun lâng a ta, bawsiet inthâwina dingin inhlân a tih; LALPA hmaa thêna thilinhlân dingin a thên ding a nih.
13Chun, suol inthâwina le pum- rawhmang thilinhlân an thatna hlak hmun, hmun inthienga chun berâmte chal chu a that ding a nih; suol inthâwina ang bawkin bawsiet in- thâwina khawm chu thiempu chan- puol a nih a; thil inthiengtak a nih.
14Thiempu chun bawsiet inthâwi- na thisen chu lâng a ta, inthien ding nakâwr changtieng hmawra dâm, a kut changtieng kutpuia dâm, a ke changtieng kepuia dâm thiempu chun nâl a tih.
15Chun, hriek limlai khat chu thiempu chun lâng a ta, ama vawitieng kutphaa chun sung a ta;
16a kut vawitienga hrieka chun a changtieng kutpâr phûm a ta, hriek chu LALPA hmaah a kutpârin vawi sari thêng a tih.
17Chun, a kuta hriek la um ṭhenkhat chun inthien ding chu a nakâwr changtieng hmawr dâm, a kut changtieng kutpui dâm, a ke changtieng kepui dâma bawsiet in- thâwina thisen chunga chun nâl a tih.
18Chun, thiempu chun a kuta hriek la um po chun, inthien ding lu chu nâl a tih. Chun, thiempu chun LALPA hmaah intlanna a siempêk ding a nih.
19Chun, thiempu chun suol in- thâwina chu inhlân a ta, ân thieng- nawna leia inthien ding chu intlanna siempêk a tih. Chu zo chun, pum- rawhmang thilinhlân chu that a ta;
20chun, thiempu chun pumraw- hmang thilinhlân le fâkmi thilinhlân chu mâichâma chun inhlân a ta, thiempu chun intlanna siempêk a tih; chuongchun, inthieng hung ni tâng a tih.
21“Chun, mi pasie a nih a, chuong ang chu a tlin naw chun, berâmte a chal pakhat bawsiet inthâwina ding, intlanna siempêkna ding thên ding le, fâkmi thilinhlân dingin beiphit inditak epha hmun sâwma ṭhea hmun khat, hrieka chawkpawl, hriek limlai khat leh chawi a ta;
22chun, vaṭhu tuok khat amanih, pârvate tuok khat amanih, a nei thei lem lem chu pakhat chu suol in- thâwina ding, a dang chu pum- rawhmang thilinhlân dingin.
23Ni riet ni chun a inthienna dingin thiempu kuomah intuokna puon in kawtkhâr bulah LALPA hmaah a hung chawi ding a nih.
24Chuongchun, thiempu chun bawsiet inthâwina berâmte le hriek limlai khat chu lâng a ta, thêna thilinhlân dingin LALPA hmaah thiempu chun thên a tih.
25Bawsiet inthâwina berâmte chu that a ta; thiempu chun bawsiet inthâwina thisen chu lâng a ta, inthien ding nakâwr changtieng hmawra dâm, a kut changtieng kut- puia dâm, a ke changtieng kepuia dâm nâl a tih.
26Thiempu chun hriek iemani tâwk ama kutpha vawitienga chun bun a ta;
27a kut vawitienga hriek ṭhen- khat chu a kut changtiengin LALPA hmaah vawi sari thêng a tih. 28Chun, thiempu chun a kuta hriek chun inthien ding nakâwr changtieng hmawra dâm, a kut changtieng kutpuia dâm, a ke changtieng kepuia dâma bawsiet inthâwina thisen chung taka chun nâl a ta;
29chun, thiempu kuta hriek la um po chun LALPA hmaa intlanna siempêk dingin, inthien ding lu a nâl ding a nih.
30Chun, vaṭhu amanih, pârvate amanih, a nei thei lem lem pakhat chu inhlân a ta; a nei thei lem lem taphawt,
31suol inthâwina dingin pakhat, pumrawhmang thilinhlâna dingin pakhat, fâkmi thilinhlân leh; chun, thiempu chun inthien ding chu LALPA hmaa chun intlanna siempêk a tih.
32Hi hi inphârna hri invawi, inthienna dân ang tlin nawhai ta dinga dân a nih,” tiin.
33LALPA chun Mosie le Aron a biek a,
34“Hluo dinga ka pêk cheu Kanaan ram in hluo pha, in hluo ding in khawlaia khawm inphârna hri ka sie chun,
35chu in neitu chun, ‘Hi ina hin hri ṭhenkhat um âwmin ka hriet,’ tiin thiempu a hung hril ding a nih.
36Chun, thiempu chu hri en dinga a lût hma chun, in sûnga thil umhai po po chu inthieng loa a um nawna dingin, in chu sukruok dingin thiempu chun thu pêng a ta; chu zo chun thiempu chu in en ding chun lût a tih.
37Chun, hri chu en a ta; hri chun a hring tieng amanih, a sen tieng deu amaniha banga chun a lo kai a, bang chu a phaia ân lang ta chun,
38thiempu chu ina inthawk chun kawtkhârah suok a ta, in chu ni sari khâr a tih.
39Chun, ni sari ni chun, thiempu chun va en nâwk a ta; hri chu banga chun a lo indar lien chun,
40hri umna lung chu lâk suok a, khawhnâwmah hmun pawrchea pei dingin thiempu chun thu pêng a ta;
41chun, in sûng tieng chu inziet vêltir a ta, chun lung chârna an ziet khawk chu khawhnâwmah hmun pawrchea bawk chun bun thlâng a ta;
42chun, lung dang lâng an ta, chuong lunghai hmuna chun sieng an tih; chun, lung chârna dang lâng a ta, in chu châr a tih.
43Chun, lung a lâk suok a, in chu a phâwk a, a ziet hnunga hri chu ina a hung suok nâwk chun,
44thiempu chu va fêng a ta, en nâwk a tih; hri chu ina chun a lo indar lien chun, chu ina inphârna hri chu a det chi a na, ân thieng naw a nih.
45In chu ṭhiek a ta, a lunghai, a thinghai le a chârnahai po po khawm; chun, khawhnâwmah hmun pawr- cheah thak hmang a tih.
46Tukhawm chu in chu khâr a ni sûng hrim hrima lût chu zântieng chenin inthieng naw ni bawk a tih.
47Tukhawm chu ina zâl taphawt chun a puonhai sâwp a tih. Tukhawm chu ina bu fa taphawt khawmin a puonhai a sâwp ding a nih.
48“Chun, thiempu chu a lût a, a hang en vêl a, in chu phâwk ṭhat a ni hnunga hri chu a lo indar lien naw chun, in chu ân thieng a nih ti thiempu chun a phuong ding a nih, hri chu ân kieng ta leiin.
49In inthienna ding chun vate pahni le sidar thing le patzai sen le husop a chawi ding a nih.
50Vate chu pil bêlah vadung tui chungah that a ta,
51sidar thing le husop le patzai sen chu vate hring le chun lâng a ta, vate thata um tah thisena le vadung tuia chun phûm a ta; in chu vawi sari thêng a tih.
52Chuong ang chun, vate thisen dâm, vadung tui dâm, vate hring dâm, sidar thing dâm, patzai sen dâm chun in chu inthien a tih.
53Vate hring ruok kha chu khuoa inthawkin ramhnuoiah invuong suoktir a tih; chuongchun, in inthien- na chu siem a ta, in chu hung inthieng tâng a tih.
54“Hi hi inphârna chi tinrêng le inbuotna hri ta dinga dân chu a nih;
55puona inphârna hri um le ina mi dâm,
56ân vûng dâm, a puor suok dâm, a hmun hmuna inlang dâm,
57ân thieng le ân thieng naw inhrietna dingin. Hi hi inphârna chungchânga dân chu a nih,” tiin.
Currently Selected:
LEVI DÂN 14: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
