SÂM 147
147
1 BAWIPA cu thangṭhat u! kan Pathian thangṭhat i hla sak hi a ṭha; thangṭhat hi a nuam i â dawh. 2BAWIPA nih Jerusalem cu a dirh, ṭhawlmi Israel a pumh hna. 3Lungthin kuaimi a damter, an hma a tuampiak hna. 4Arfi khi a rel hna i an min cio in a auh hna. 5Kan Bawipa cu a lianngan i a thiltikhawhnâk cu a ṭhawng; a theihhngalhnâk nih ri a ngei lo. 6BAWIPA nih toidor mi a cawisân tawn, misuaksual kha lei ah a hlawnh hna. 7Lawmhnâk hla sa in BAWIPA cu thangṭhat ulaw, kan Pathian thangṭhat in tingtang he hla sa u. 8Khuadom in van khi a phenhter i vulei caah ruahpi a timhlamh i tlangcung ah hramhdep a khohter hna. 9Saram rawl a pêk hna i langak fa a awnmi sin zongah rawl a pêk tawn. 10Rangtûm ṭhawngnâk ah â lawm lo i minung hna ke cungah lawmhnâk a ngei lo. 11BAWIPA cu amah ṭhzahtu cungah â lawm, a vêlngeihnâk â ruahchanmi hna cung zongah. 12Maw Jerusalem, BAWIPA cu thangṭhat. Maw Zion, na Pathian cu thangṭhat. 13Zeitintiah amah nih na kutkâ hrenhnâk thing hna a fehter i na chung i na fanau hna cu thluachuah a pêk hna. 14Na ram chungah daihnâk a umter i a ṭha bikmi facang in a khahter. 15A nawlpêk cu lei ah a thlah i a bia cu khulrang in a karh tawn. 16Sahmul puan phahmi bangin hawhra a surter i hawhra a khalmi kha vutcam bangin a ṭhek tawn hna. 17Akhalmi a ti kha changreu pel bantukin a hlonh hna i a kih ning cu ahonihdah an tuar khawh lai.? 18A bia a thlah i a tlumter; a thli a hranter i ti kha a luanter. 19A bia cu Jakob sinah a phuan i a phunglam hna le biaceihnâk hna cu Israel mi hna sinah a phuan tawn. 20Cubantukin miphun dang sinah zeihmanh a tuah bal lo, a biaceihning zong zeihmanh an hngal lo. BAWIPA cu thangṭhat u.
Currently Selected:
SÂM 147: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
