PHUNGTHLÛKBIA 1
1
1Israel siangpahrang, David fapa Solomon phungthlûkbia: 2Fimnâk le cawnpiaknâk hngal ding le, theihthiamnâk bia hna hmuthiam ding le: 3Fimnâk, diknâk, biaceihnâk le dinnâk lei cawnpiaknâk cohlannâk ding le; 4Mi sawsawh kha ralrinnâk pe ding le, mino hna nih hngalhnâk le ruahthiamnâk an ngeih khawh nâkhnga- 5Mifim nih a ngaih i fimthiamnâk â chap i theihthiamnâk a ngeimi nih fimchimhnâk kha an hmuh lai. 6Phungthluk le a fianternâk, fimnâk bia le biathûk hna theihthiamnâk dingah. 7BAWIPA ṭihzah cu hngalhnâk hramthawknâk a si, asinain mi hrut hna nih fimnâk le cawnpiaknâk kha zeiah an rel lo. 8Ka fapa, napa cawnpiaknâk ngai law, na nu nawlbia kha kaltâk hna hlah. 9Zeitintiah nalu caah â dawhmi thuam an si lai i nahngawng caah pangpar ṭhi an si lai. 10Ka fapa, misual nih an in lêm ahcun, duh hrimhrim hlah. 11Kan sinah ra ve, “Thisen chuah awkah kan bawh hna lai, a chan um loin sualnâk a ngei lomi a thli in bawh hna u sih, 12Seol bangin an nung nain kan dolh hna lai i a thûk ngaimi khor chung i a tlami bantukin. 13Thil mansung kan lâk hna lai i hranchaw in kan in kan khahter lai, 14Kan sinah i tel ve law, phaisa bawm kan i hrawm lai,” an ti tikah. 15Ka fapa, an sinah i tel ve hlah, anlam kha hrial i zuam. 16Zeitintiah anke cu sualnâk leiah a tli i thisen chuah dingin an khul a rang tawn. 17Zeibantuk vate hmanh a hmuh lio i sur zar cu pakpalawng a si. 18Hi mi hna hi anmah thisen a bawhtu an si, anmah nunnâk a thlithup in a bawhtu an si. 19Cubantukin hlawknâk lei i hakkau mi hna nunning cu a si, a ngeitu hna nunnâk an lâkpiak tawn. 20Fimnâk kha thang ngaiin lenglei in a au, lamṭe kipah a aw chuah in a au. 21Mi tamnâk bikah a au i khualipi luhnâk kutka ah a au, 22Nannih mi sawsawh hna, zeicandah thil sawsawh kha nan tlaihchan ko rih lai? Zeitintiah zomhtaih hmangmi hna nih zomhtaihnâk ah an i nuam i mihrut nih hngalhnâk kha an huat. 23Ka sîknâk ah i mer u, nan chungah ka thlarau ka bungh lai i ka bia kan hngalhter hna lai. 24Zeicatiah kan kawh hna i nan duh lo, ka kut ka thlir i ahohmanh nih zei ah nan rel lo. 25Zeicatiah ka remruatmi vialte zeiah nan rel lo, kan sîknâk hna zong nan cohlang fawn lo. 26Vanchiatnâk nan ton tikah kan nihsawh ve hna lai i ṭihphannâk nan ton tikah kan nih sawh hna lai. 27Ṭihphannâk thlichia nih an nam hna i phusim nih an chawih hna tikah, khuaruahhar vansannâk a phâk tikah kan nihsawh hna lai. 28Cu cân ah nan ka auh lai, asinain kan let hna lai lo; biatak in nan ka kawl lai nain nanka hmu lai lo. 29Zeicatiah hngalhnâk an huat i BAWIPA ṭihzah an i thim lo ruangah. 30Ruahnâk ka cheuhmi hna an duh lo, ka chimhhrinnâk zei i an rel lo caah. 31Cucaah an nuncan theitlai cu anmah nih an ei lai, an khuaruahmi lila nih a khimter hna lai. 32Zeitintiah mi sawsawh hna nih an pialter hna nâk nih a thah hna lai, khua lu khua taw ruat loin an umnâk nih a hrawh hna lai. 33Asinain ka bia a zulmi hna cu him tein an um lai, Ṭhatlonâk ṭih loin him tein an um lai.
Currently Selected:
PHUNGTHLÛKBIA 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
