Yohana 2
2
Fet na wiini tiki n'a za war Kana
1War mefeŋ n'ag'aŋ hu, fet na wiini tiki a za war Kana na war Galeliya, emini Yesu te na fu woni. 2E yikisi Yesu miɗi fet hanɗa gaiɗi ɗaini zi hitri lai. 3Won hlai na vin ɗa a kiɗa kir kai ɗa, emini Yesu te miɗini: Vi ɗa a vada va. 4Amma Yesu a wiyiɗi seŋ: Muni n'a tupuku warni seŋ hanɗa a maɗa? Lerɗa a cosi kai hai. 5Emini te miɗiɗi wiiɗi ɗaini zi sda: N'aga a miɗiŋki paŋ ɗa ki zi hanɗa. 6Grak zi huwuŋ a na fu woni ɵaara, na Yudiyakai e zi siɗi edi aŋ hilu gaini grak paŋ ɗa, warni a kiɗa a ma litir miya miya. 7Yesu a miɗiɗi: Vi grak hanɗa gaini yem. E vin haa amai mini teɓ teɓ. 8A miɗiɗi: Tiyana ɗa, mi agwi kiŋni wiini abai na miɗini sdani simi ɗa, e kiŋni lai. 9Won hlai na abai na miɗini sdani simi a tetema yem n'a bunda aŋ vin mini ɗa, a sɗa hlai na vin hanɗa a halasi woni par kai. Amma ɗai zi sɗa n'e libisi yem e siɗi hanɗa. A yika Epiɗ-dray, 10a miɗini: Ɗif paŋ ɗa a ɓurwa wiiɗi ɗai avut ɗa, a vin na pɗem ɗa, asakal par won hlai na ɗai e ciini li ɗa, e siɗi na pɗem dai dai ɗa. Amma tuku ku giɗima vin na pɗem ta, ku siŋdisi edi tiyana hai ɗa maɵa maɵa ɗa? 11Hanɗa a pi zi tiki na wiini wazagai zi siŋki na Yesu a zaŋ war Kana na war Galeliya. A siŋkiɗi abaini edi, ɗaini zi hitri e yimi warni. 12Asakal hanɗa halasi azumai a Kapernahum gaiɗi emini, gaiɗi tawalakaini, gaiɗi ɗaini zi hitri, amma e simni woni mefeŋ viya kai.
Yesu a birgiɗi ɗai zi cakala edi warni tempel par
Mat. 21.12-13; Mark. 11.15-17; Luk. 19.45-46
13Fet na wiiɗi Paska na wiiɗi Yudiyakai te na fu gobi, nɵa Yesu a hala amai a Yeruzalem. 14A nava ɗai zi cikili ɵaakai, adumai gaini dere lai amlai warni tempel, ɗai zi bindi farai gaini simni ca ca lai. 15A za daɓala gaini sogom, a birgiɗi edi warni tempel ɗa par paŋ, gaini adumai gaini ɵaakai lai. A ko sulaiɗi ɗai zi bindi farai ɗa edi, a hogo tabelɗi azumai lai. 16A miɗiɗi wiiɗi ɗai zi cikili dere ɗa maini nɵa: Miliɗi wazagaiki edi won na par, dalamni Apa ɗa aga ki bindiŋ aŋ kosko kai. 17Ɗaini zi hitri midiɗi a kɵa buri aŋ gaini ɗû ɓa: Diri zi sile na burini Dalam na wiiku ɗa a ya amlai wara maini afu nɵa.
18Yudiyakai e miɗini: Sda na ku zaŋ maini hanɗa ɵa ɗa, wala na ku dara ku siŋkiyi tiɓ ɗa a maɗa? 19Yesu a waya seŋ a miɗiɗi: Hû hlai na sɗik hanɗa azumai, haa mefeŋ hu ɗa aga mu rgaŋ amai. 20Yudiyakai e miɗi: Tiyi, mi zi buza doogo doogo puɗu pi ɵaara kapai mi rgi tempel hanɗa amai, amma tuku ku za mefeŋ hu, ku rgaŋ amai! 21Amma tempel na Ni a muɗa miɗini na ɗa a sini. 22Won hlai n'a ɵiyasi amai arbaɗi zi mri par li, ɗaini zi hitri midiɗi a kɵa ɓa a na ka a muɗa seŋ hanɗa, e yimi pini ɗû gaini seŋ na Yesu a muɗaŋ ɗa lai.
Yesu a sɗa n'aŋ siɗi ɗai paŋ
23Won hlai n'a na Yeruzalem, miɗi fet na wiiɗi Paska ɗa, viya e yimi war yikini pini wazagai zi siŋki n'a zaŋ, n'e tiliŋ gaini arɗi. 24Amma Yesu a dara a siɗi warni kai, buri ɓa a siɗiɗi ɗai paŋ. 25Buri jaani a na ɓa e zini zaida midini ɗif haw kai, buri Ni a sɗa n'aŋ warɗi ɗai paŋ.
Currently Selected:
Yohana 2: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964