Rom 12

Säthaw üng kälu sa hethang hing saite

1Tukä dylä kai üng kangby jä-ai na ä, Säthaw lä mä-ai tea tengxyng y bäheng te phüng-a kai lä nang ce tea mäci hethang ngai te vi. Hing saite löci mawi kätyng nang ma ce ma Säthaw tea ae-a ö. Äni üng kälu sa hethang hai äni tea kawng hai hethang la ae-a ö. Hini nang ce üng ae-a saite lä Säthaw tea cäphaw tätang te vi. 2Nang ce lä hini älawngpre-a awng saite khimi üng reitae kätyng hing jawjaw ö hang. Nang ce lä mä-ai ma üng bälung kaedawng tea Säthaw ma mäqa king te hai-a äni ce ma nang ce tea kangthae lawng hai sy. Hokä dylä hawi saite na, Areng üng bälung-a kawng hai saite na näte Säthaw üng cungrü saite aely kängai lä mani mei näte tea nang ce lä mäny haw ö vi ai.

3Kai tea Säthaw ma py saite tähang kähawi phüng-a, nang ce angxynlyng na tea kai lä thui hethang ngai te vi. Nang ce lä mä-ai ma tea dawng ngece hethang kae saite qawng-a cang y, aedawng ö hang. Nang ce tea Säthaw ma py te yng saite kätyng mä-ai ma tea mä-ai ma kaeteng khaw-a aedawng ö. 4Mä-ai üng ätabung-a lä kaepreng na awng mang vi. Honi kaepreng angxynlyng na lä äma ce üng kälu na awng ö qi te vi. 5Honi kätyng-a mä-ai lä aetawng y saite khimi awng mang ö ngaila, Khrista tea lä bungtä te phüng-a, mä-ai angxynlyng na lä ätabung haetä üng aesui saite kaepreng na vi. 6Tukä dylä mä-ai angxynlyng na lä Säthaw ma mä-ai tea py saite tähang kähawi kätyng aetawng y sakaw saite na awng ö qi te vi. Mä-ai üng sakaw saite lä Säthaw üng Angthang thui haw saite vi dylä, mä-ai lä mä-ai ma üng yng saite kätyng thui hethang kae. 7Mä-ai üng sakaw saite lä yng te khimi ce tea säbawng haw vi dylä, säbawng hethang kae. Mä-ai üng sakaw saite mätu dylä, mä-ai lä kähawi-a mätu hethang kae. 8Mä-ai üng sakaw saite khimi tea aethaw py haw dylä, aethaw py hethang kae. Khimi ce tea säbawng he awng dylä, mäsai y käla säbawng hethang kae. Mä-ai üng sakaw saite lä yng saite na üng mätawngky-a sa hethang dylä, ae-eng kha sa hethang kae. Mä-ai üng sakaw saite hai khimi ce tea bäheng haw vi dylä, anghawtho te hai bäheng hethang kae.

9Nang ce üng bälung aevaw saite lä käjüng sa hethang kae y. Hawi y saite na tea lä esäre kha hawi saite tea lä aekhaw ceng ö. 10Nang ce lä Khristen kangby jä-ai na lawng lawngtä tea lä bälung aevaw ö. Nang ma ce ma lawng lawngtä tea tämö aemäsang ö. 11Aethawli y käla kälu tea ae-eng kha sa ö. Bälung mäke aepy te hai Areng üng kälu tea sa ö. 12Nang ce üng aethang khai saite phüng-a anghawtho ö. Mätangbälai dylä, änawngsa ö. Kätü qütä aetang ö. 13Mätang saite Khristen kangby jä-ai na tea nang ce lä säbawng ö. Angvüng angvaw na bung kähawi-a nang ce lä üng ingthung-a mäkung ö.

14Nang ce tea sakälö khü saite na tea lä Säthaw ma tähang kähawi py hethang aetang pa ö. Äni ce tea lä täking pa ö hang. 15Anghawtho saite khimi hai mangtä anghawtho ö. Raw saite khimi hai mangtä raw ö. 16Yng saite khimi qütä hai bälung mangtä aedü ö. Aethaw ö hang. Mätang saite khimi hai kangby jä-ai na aesa ö. Mä-ai ma tea mä-ai ma bälunghae te vi näkha aedawng ö hang.

17Khimi lawngtä ma nang ce tea käsi y sa dylä, rawithung tha tyng pa ö hang. Khimi angxynlyng na ma kätüng hai kähawi näkha mäthi hethang na aethaw sa ö. 18Nang ce lä bäja te rytä khimi qütä hai awngneng saite hai-a hing hethang ae-eng ö. 19Kai üng kangby jä-ai na ä, nang ce lä rawithung tha ö hang. Säthaw ma käsi sa saite tea nang ce üng jüng-a rawithung tha tyng sy. Caekäcai thung-a lä, “Areng lä, kai ma rawithung tha pa vi ai. Hunghö sa saite khimi tea lä kai ma rawithung tha tyng ai” näkha thui te vi. 20Caekäcai thung-a thui te kätyng, “Nang tea hawi y sa saite na böjo aelang dylä, äni ce tea bö mäcaw pa jo. Äni ce tui aehe dylä, tui mätyng pa jo. Hokä sa dylä, äni ce lä saerae kha äni ce üng älö qawng-a mai aeke thyng te kätyng awng pa ö vi ai” näkha näpa. 21Käsi ma nang ce tea lä bäja hang sy. Hini jüng-a kähawi saite na hai-a käsi na tea bäja ö ba.

Currently Selected:

Rom 12: cekNT

Highlight

Copy

Compare