Sion 1
1
Iesu vi Vati Selusien ten Moulien koa emai ro en out netan
1En avong mulamu, navong Ahi romumontei veah out nesa ka out netan, Vati Selusien mul tuai. Kei koa vi Vati Selusien enek ro ral min Ahi, ka kei vi Ahi en usite vasi keil.#Rev 19:13; Sion 17:5; Plp 2:6; 1Sion 1:1-2 2Mul tuai ral min Ahi en avong mulamu koa tounah tovuol veah. 3Ka en kei, Ahi mumon tounah vasi keil. Ka vahit varvitei kei, tounah vasi keil vatovuol.#Sion 1:10; Kol 1:16-17; Hib 1:2 4Vati Selusien enek vi vatte ten moulien. Ka eni, meatin keil umai en meneai ekek akilea avalei kilea en tounah vasi.#Sion 5:26 5 Kei sakin meneai enek ritin en mankoli ten tisaen, ka koakeil amul en mankoli asakras avandem kilea eni.#1:5 Tei en tus matu keil ten Sion avit, “Kei sakin meneai enek ritin en mankoli ten tisaen, ka koakeil amul en mankoli asakras avali.” #Sion 3:19
6Ahi sila meatin tai emai, isen Sion.#1:6 Navong tus koanik selus usil Sion, mul vit usil Sion Baptis. Ka navong eiloheh Sion koa mutis tus koanik selus usil kei sasen, mul vise kei en “meatin koa envatien onen Iesu mul ien.” #Mat 3:1; Mak 1:4; Luk 1:13,17,76; 3:2 7Kei emai keke vahit luvat kei koa kur meneai enek, ka vasakin meatin vasi keil avaling demkatien one eni. 8Sion rovitei meneai. Ka kei emai vahit luvat kei koa kur meneai enek emai.#Sion 1:20 9Anatin, Sion mai vahit luvat kei koa mai ral min meneai ten anatinien. Veni, amaien onen meatin enek hesuval meneai koa hetitin luvat rendemien onen meatin vasi keil keke ilei kilea anatinien onen Ahi.#1Sion 2:8
10Vati Selusien enek emai ro en out netan. Ka avaseini keke tounah vasi netan mai kistal ka en keihoen onen, meatin keil ten out netan areingeingen kei.#Sion 1:14; 1:3; 1Kor 8:6; Kol 1:16; Hib 1:2; Sion 17:25 11Kei emai ven onen kati, ka onen kati keil arkur revitei. 12Ka koakeil vasi akur revi ka akur anatin eni, kei maen keil umai avi titiali keil onen Ahi.#Kal 3:26 13Keil armaitei avahi titiali keil onen Ahi vaka en sise ten hasuen, vuo vaka en rendemien onen etai meatin, vuo vaka en envatien ten aven meatin tai. Keil umai avi titiali keil onen Ahi veni Ahi varei rie lat keil avahi onen.#Sion 3:3,5,6; Tiem 1:18; 1Pit 1:23; 1Sion 3:9; 5:18
14Vati Selusien enek emai vi meatin tai koa aven mul. Kei ro ral min komai ka meles muohien ten hetetamenien onen, veni kei vi Natin Ahi kati koa tanges koa vilelau en more envatien ka anatinien.#Rom 1:3; Kal 4:4; Plp 2:7; 1Tim 3:16; Hib 2:14; 1Sion 4:2; Aes 60:1-2; Luk 9:32; Sion 2:11 15Sion vit luvati keke vi isei vit, “Koanik vi meatin koa namul naselus usili. Kei koa naviteni navit hemai hekatau enau koa hehi hetetamen imok helin inau. Veni kei ro tuai en avong mulamu, navong arvasitei veah inau.” #Sion 1:30; Mat 3:11; Mak 1:7; Sion 1:27
16Veni kei vilelau en more envatien, rokol kat ir vasi houlu vis houlu mok mulin asa koa mal keke rovakuri.#Kol 2:10 17Ka en Mosis telamu, Ahi san mengkatien|Mengkatien keil onen Mosis keil onen min meatin keil. Ka, ka en Iesu Kristo, Ahi rie lat more envatien ka anatinien onen min meatin keil.#Eks 31:18; 34:28; Sion 7:19 18Meatin tovuol veah vales Ahi. Ka vi Natnali kati koa vi tanges, koa ro en usite onen Tata onen lisenges, kei varei vit luvati min ir keke rokilea eni.#Eks 33:20; Sion 6:46; 1Tim 6:16; 1Sion 4:12; Mat 11:27; Luk 10:22
Sion Baptis vit luvati keke kei rovitei Mesaea onen Ahi#Mat 3:11-12; Mak 1:7-8; Luk 3:15-17
19Koanik tunien usil asa koa Sion Baptis viteni usil Iesu. En avong tai, avat keil onen Siu keil en out Serusalem asila tei en pris keil ka koakeil emun aka en vatiamal onen Livae koa amum en Eim Votut keke uva avales Sion. Navong arokol out koa Sion mul ien avisi avit, “?Keik kovi isei varei?”
20Ka Sion roseseintei vahit kesi min keil ka vit leini vit, “Inau narvitei Mesaea koa Ahi vat kati keke hesani hemai.” #Sion 3:28
21Sakini, avisi avit, “?Mukonek, keik kovi isei varei? ?Keik provet Ilaetsa?” #Mat 11:14; 17:11-13; Mak 9:13
Ka Sion vit kesi vit, “Vuo, narvitei kei.”
Avis risi avit, “?Keik kovi Provet koa Mosis vit luvati keke Ahi hesani hemai?”#Dut 18:15,18; Sion 6:14; 7:40; Umen 3:22; 7:37
Ka kei vit, “Vuo.”
22Sakini, apeahi avit, “Hiteni min komai li kovi isei keke mekilea mevahit meseini min avat keil onomai koa asila komai memai. ?Komul koviten sa usil keik sasom?”
23Sakini, Sion sani min keil selusien onen provet Aesea koa vit,
“Inau navi rea tai koa mul visohiso en out volvol vit,
‘!Mihesak mesein sise onen Asuv!
!Mihoumon sise onen hemal!’” Aes 40:3#Mat 3:3; Mak 1:3; Luk 3:4
24Evus, meatin tei keil emun, koa Farasi keil asila keil umai ven Sion, 25keil avisi avit, “?Munak keik korvitei Mesaea, vuo Ilaetsa vuo Provet koa Ahi vat kati, vensa varei komul kovi baptaes en meatin keil?”#1:25 Farasi keil amutimanin keke Sion vi baptaes en Siu keil. Veni avi baptaes en koakeil enges arkileatei Ahi koa aviles umai akur rohtoh en demkatien. #Mat 21:25; Mak 11:30; Luk 20:4; Sion 1:33
26Sion vit kesi min keil vit, “Inau navi baptaes en meatin keil en oai enges. Ka luhu en kami, meatin tai mul tuai koa kami mireingeingeni. 27Kei varei hemai hekatau enau ka hekes inau. Kei vi hetetamen imok mulin inau, ka narvinvintei keke mamai mahi slev onen keke makulat sandel onen.” #Sion 1:15; Umen 13:25
28Tounah vasi keil enek kur out vesesal en taon ten out Betani, en out koa Sion vi baptaes en meatin keil eni, en usite ist ten Oaisal Sodan.#Mat 3:13; Sion 10:40
Sion Baptis vit luvati keke Iesu vi Mesaea onen Ahi
29 En avong sav teni, Sion lele va, ka les Iesu mul mai veni. Navong lesi, Sion vit leini vit, “!Mihelesi! !Sipsip koa Ahi sila mul mai, veni kei varei helah lat tisaen keil ran meatin keil ten out netan.#Sion 1:36; Aes 53:6-7; Umen 8:32; 1Pit 1:18-19 30Kei varei koa naselus usili navit, ‘Meatin tai hemai hekatau enau koa hehi hetetamen imok helin inau. Veni kei ro tuai en avong mulamu, navong arvasitei veah inau.’ #Sion 1:15 31Navong navit usili, inau mun nareingeingeni veah keke vi isei. Ka Ahi sila inau numai ekok keke mahi baptaes en meatin keil keke vahothot en kei min me-Isrel keil.”
32-33Sion vit risi vit, “Anatin. Mulamu, inau nareingeingeni veah keke vi isei. Ka Ahi, koa sila inau numai ekok mahi baptaes en meatin keil en oai, kei viteni minau vit, ‘Navong kiles Ninin Votut hemita ka heto en meatin tai, kei varei hehi baptaes en meatin keil en Ninin Votut.’ Sakini, noeis, navong meatin enek mai venau, nales Ninin Votut muka ran out nesa suval ame tai ka mita rondan eni.#Mat 3:16; Mak 1:10; Luk 3:22 34Anatin eli naviteni min kami keke nalesi tuai. Ka navit leini min kami keke meatin enek varei vi Natin Ahi anatin.” #Mat 3:17; 17:5; 27:54; Mak 9:7; 15:39; Luk 9:35; Sion 20:31; Umen 9:20
Meatin keil ehat (4) umai amusil Iesu
35En avong sav teni, Sion va ris en out enek ral min meatin elu onen. 36Ka navong Sion les Iesu mul mual va, viteni vit, “?Millesi? !Sipsip koa Ahi sila keinek!”#1:36 Sion 1:29 viteni keke Iesu helah lat tisaen onen meatin keil hesuval sipsip tai koa amumoni vi sanien votut min Ahi.
37Navong meatin keilu onen luraengon asa koa kei viteni, luva lumusil Iesu. 38Navong Iesu mul mual va, viles ka les keilu lumul lumusili. Sakini, vis keilu vit, “?Kamil emil vat sa?”
Ka luvit kesi luvit, “Tiser, emal vati melvailea out kave koa koro ien.”
39Iesu vit “Milhemai milhelesi.” Navong telmual telva, vi mendilah tuai ka meteiai mul vita netan neli. Ka luro ral mini rokol vongien.
40Tai en keilu koa long selusien onen Sion ka musil Iesu, isen Andru, koa vi tunali Saemon Pita.#Mat 4:18-20; Mak 1:16-18 41Ka navong selus ral min Iesu evus, hatte tas, va les Saemon Pita ka viteni mini vit, “Tuak, komal melvotin Mesaea koa Ahi vati kati vit hesani hemai.”#Sion 4:25 42Evus, Andru mulamun Saemon va ven Iesu.#Mat 10:2; 16:18; Mak 3:16; Luk 6:14
Ka navong Iesu lesi, viteni vit, “Keik kovi Saemon, natin Sion. Ka kosa heha, isom hehi Pita, koa aneite teni vi ‘ahat.’”
Iesu vise Pilip ka Nataniel
43En avong sav eris, Iesu ling rendemien onen keke helokovein out Sodan, ka heha en provins ten out Kaleli. Sakini, va votin meatin tai koa isen Pilip ka viteni mini vit, “Amai, kusil kat nau.” 44Pilip vi koan Betsaeta, taon koa Andru ka Pita luka ien.#Sion 12:21
45Pilip maeni ka va lekat tunali koa isen Nataniel. Navong votini, viteni mini vit, “Komai mevotin Mesaea koa Mosis mutis usili en tus ten mengkatien|Mengkatien keil onen Mosis, ka koa provet keil emun amutis usili. Isen Iesu, natin Siosep. Kei ten out Nasaret.” #Dut 18:18; Aes 7:14; 9:6; Esek 34:23
46Navong long selusien enek, Nataniel visi vit, “?Anatin? Tounah tovuol vatahos kilea vaka en taon kuren tai koa suval Nasaret.”
Ka Pilip vit kesi vit, “Amai, les visi.” Ka lumual luva ven Iesu.
47Navong Iesu les Nataniel mul mai veni, viteni vit, “Koanik vi meatin tai koa romultei valiluvos, koa vinvin avahise en koan Isrel tai.”
48Navong Nataniel longe mukok, visi vit, “?Keik kokilea inau mukave?”
Iesu vit kesi vit, “Nalesuk tuai navong komul semau korondan en nimal ten vati fik, navong Pilip rovisoktei veah.”
49Nataniel mutimanin ka viteni mini vit, “!Tiser, keik kovi Natin Ahi anatin! !Keik kovi asuv houlu ten out Isrel koa memul merosini!” #Sam 2:7; Mat 3:17; 14:33; 16:16; Mak 1:11; 3:11; Luk 3:22; 4:41; Sion 11:27; Umen 13:33; Sef 3:15; Mat 27:42; Mak 15:32; Sion 12:13
50Iesu viteni vit, “Keik kokur anatin enau veni komutimanin navitenis minuk keke nalesuk navong keik korondan semau en nimal ten vati fik tai. Ka hervitei tuetin, kiles tounah savsav keil koa hemarite mok helin koanik. 51Anatin eli naviteni minuk keke kiles out nesa heseha ka angelo keil onen Ahi ihina nesa ka imita netan ika en inau, Natin Meatin, hesuval navi sise tai.”#Sen 28:12
Currently Selected:
Sion 1: pma
Highlight
Share
Copy
Want to have your highlights saved across all your devices? Sign up or sign in
Copyright © 2011 Wycliffe Bible Translators, Inc.