Amǝ Roma 7

Cau mǝnana Nggurcau mala Musa bangŋa amur doɓala ka

1Sǝ wun amǝ'eambǝam mǝnana wu surǝ Nggurcau ka, wu sǝlǝ mbak ama Nggurcau ka ndanǝ rǝcandǝa amur ɓwa yi mǝnana ɓǝ̀ ɓwe ka ndanǝ yilǝmu piu ka? 2Wu sǝni ani: à nê mala Nggurcau ka, mɓwama pa nǝ̀ nying burri ɗang, yi mana ɓǝ̀ burri nanǝ yilǝmu ka. Sǝ ɓǝ̀ burri wu ka, mɓwame purni mǝno yì Nggurcau mala doɓala ka.#7:2 Ɓalli gbal aɓa: 1Kor 7:39. 3Ace mani ka, ɓǝ̀ mǝnia yì mɓwama puro al ɓe ɓwabura sǝ burri na nǝ mǝsǝì ka, nda aɓa pak cauɓikea nongnǝban a nza nǝ doɓala. Sǝ ɓǝ̀ burri pak lú ka, mɓwame purni mǝno yì Nggurcau ka, nǝ̀ gandǝ al ɓe ɓwabura, sǝ ɓǝ̀ pa anggo ka, pa aɓa pak cauɓikea nongnǝban a nza nǝ doɓala ɗang.

4Anggo gbal, wun amǝ'eambǝam, wun gbal ka wu wunî Nggurcau, acemǝnana wu nda aɓa nggurǝ Kǝrǝsti a lú male. Ado ka, wu nda ka mala Kǝrǝsti, mana à loasǝi a ɓembe ka, ace mǝnana ɓǝ̀ sǝm pusǝ aturo mǝɓoarne ace Ɓakuli.#7:4 Ɓalli gbal aɓa: Rom 6:2,11; Gal 2:19; Kol 1:22. 5Aɓa do ma'sǝm ɗiɗyal mǝnana nggurǝ sǝm na kǝ gingnǝ sǝm ngga, anpel mala cauɓikea mana Nggurcau loasǝia aɓa nyam sǝm ngga, à ndarǝ pak turo, sǝ ko man sǝm pak kat ka, mala ká lú na.#7:5 Ɓalli gbal aɓa: Rom 6:13,21; 8:8; Jem 1:15. 6Sǝ adyan ngga, sǝm purnì Nggurcau, acemǝnana sǝm wuna aban agir mǝnana ɗiɗyal à bwal sǝm a guro ka. Sǝm ado ka, sǝm nggǝ pak turo ɗǝm a njar mǝ'e mala Nggurcau mana à gilǝì nǝ́ gilǝa ka ɗang; turo ma'sǝm a dyan ngga, nda a njar mǝbǝshe mala Bangŋo.

Nggurcau mala Ɓakuli kǝ lǝmndǝ turo cauɓikea ma'sǝm

7Sǝ mana ado sǝm nǝ̀ na? Nggearǝ Nggurcau ka, cauɓikea na le? Awo! Pa anggo ɗang! Ɓǝ̀ pà ace Nggurcau raka, ɓǝ́ pà mǝ surǝ cauɓikea ɗang. Ɓǝ́ pa mǝ nǝ sǝlǝ ce cauɓikea mala sham gir mala ɓwa ɗang, mǝnana ɓǝ̀ Nggurcau bang ma ama, “Kǝa sham gir raka” ɗang.#7:7 Ɓalli gbal aɓa: Pur 20:17; Nggur 5:21. 8Sǝ cauɓikea ka, pak turo nǝ mǝnia yì nzongcau ka, pǝlǝa loasǝ ambalang shamgir ɗàngɗáng a ɓalǝam! Sǝ ɓǝ̀ pa ace cau mala nzongcau raka, ɓǝ́ cauɓikea ka lugir na. 9Mǝnana ǝn malaká sǝlǝ ce nzongcau raka, mǝ ndanǝ yilǝmu; sǝ lang nzongcau yina ka, cauɓikea long nǝ yilǝmu, sǝ ǝn pǝlǝ lú. 10Nggearǝ nzongcau mǝnana ɓoaro ɓǝ̀ lǝmndǝam njargula yilǝmu ka, pǝlǝa wal-luem.#7:10 Ɓalli gbal aɓa: Pǝris 18:5; Rom 10:5.

11Cauɓikea kara kum njar ata nzongcau, pǝlǝa swarkiam, sǝ pakturo nǝ nzongcau, wal luim.#7:11 Ɓalli gbal aɓa: Tite 3:13.

12Ace mani ka, Nggurcau ka mǝfele na, sǝ nzongcau ka mǝfele na, sǝ nda pepè, sǝ mǝɓoarne na. 13Ado ka, gir mǝɓoarne yinǝam nǝ lú le? Awo, pa anggo ɗang! Kǝ cauɓikea na pak turo nǝ gir mǝɓoarne, sǝ yinǝam nǝ lú, ace mǝnana cauɓikea ka, ɓǝa surǝì ama cauɓikea na. Sǝ ata cau mala nzongcau ka, cauɓikea nǝ̀ lǝmndǝ ɓike male kǝrkǝr.

14Sǝm sǝlǝna ama Nggurcau ka, gir mala Bangŋo na, sǝ mim ngga mǝ nda ɓwa aɓa nggūrǝu, guro aɓata cauɓikea. 15Ən bwalta agir mǝnana ǝn pakki ka ɗang, acemǝnana gir mǝnana ǝn earkiyi ce pe ka nda ǝn pakkiyi ka ɗang. Sǝ gir mǝnana ǝn ɓinǝce ka, nda ǝn pakkiyi ka.#7:15 Ɓalli gbal aɓa: Gal 5:17. 16Sǝ ɓǝ̀ ǝn nggǝ pak gir mǝnana ǝn earkiyi ce pe raka, ǝn earǝna ama Nggurcau ka, ndanǝ ɓoaro. 17Ace mani ka, mǝ nda mǝnana ɗǝm ǝn pakkiyi mǝnia yì gir mǝɓane ka ɗang, kǝ cauɓikea mǝnana do a ɓalǝam ngga, nda pakkiyi ka. 18Ən sǝlǝna nǝma kǝgir mǝɓoarne pa a ɓalǝam, aɓa nggūrǝam ɗang. Ən nggǝ earce pak gir mǝnana pepè ka, sǝ ǝn gandǝ pe ɗang. 19Ən gandǝ pak mǝɓoarne mǝnana ɓoaro ɓǝ̀ ǝn pe ka ɗang, kǝ mǝɓike mǝnana ǝn earkiyi ce pe raka, nda ǝn nggǝ pak ka. 20Sǝ ɓǝ̀ ǝn nggǝ pak gir mǝnana ǝn earkiyi ce pe raka, mǝnia ka lǝmndǝ ama, mǝ nda ɗǝm ǝn pakkiyi mǝnia yì gir ka ɗang, kǝ cauɓikea mǝnana do a ɓalǝam ngga nda pakkiyi gir nì ka.

21Anggo sǝ yi dupam nggurcau, mǝnana ɓǝ̀ ǝn earce nǝma mǝ nǝ pak mǝɓoarne ka, ǝn gandǝ pe ɗang, kara ǝn kum ɓamuram aban pak mǝɓike. 22Aɓa yilǝmem ngga ban kǝ ɓoaram arǝ Nggurcau mala Ɓakuli. 23Sǝa ma ǝn nggǝ sǝn ɓe kǝ rǝcandǝa a ɓalǝam aban munǝo arǝ ɓabumam, kǝ ciem mǝ duk guro aɓata nggurcau mala cauɓikea mǝnana do a ɓalǝam ngga. 24Ya ulang dotanni nda mem! Yana nǝ̀ amsǝam aɓa mǝnia yì nggūrǝu mǝnana kǝ ká nǝ mim a lú ka le? 25Sǝm pakki Ɓakuli yàwá, ace amsǝban mǝnana ndakam nǝ bu Yesu Kǝrǝsti, Mǝtala sǝm ngga!

Mǝno ka nda gir mǝnana ado mǝ nda ɓālǝi ka: a ɓabumam ngga, ǝn earnace kpata Nggurcau mala Ɓakuli, sǝ nǝ nggūrǝam ngga, mǝ nda guro mala turo cauɓikea.

Currently Selected:

Amǝ Roma 7: mbu

Highlight

Copy

Compare