Amǝ Roma 5

Guli arǝ Kǝrǝsti kǝ yinǝ dorǝpwala andǝ banɓoarnado

1Acemǝnana ado ka sǝm kumǝna akban aban Ɓakuli ata cau mala paɓamuru ka, sǝm ndanǝ dorǝpwala a nre sǝm sǝnǝa Ɓakuli nǝ bu Mǝtala sǝm Yesu Kǝrǝsti. 2Ndá àkǝ̀ ce guliarǝu ma'sǝm arǝ Kǝrǝsti sǝ yinǝ sǝm aɓa ɓwamuru mala Ɓakuli mǝnana ado sǝm do a ɓalǝi ka. Nda gir mǝnana tsǝa sǝm nggǝ nggori nǝ tsǝkɓalǝu mǝnana sǝm ndanǝi mala kum kāmbe aɓa gulo mala Ɓakuli ka.#5:2 Ɓalli gbal aɓa: Afi 2:18; 3:12; Ib 10:19-20. 3Ban kǝ ɓoara sǝm gbal, yi mǝnana ɓǝ̀ sǝm kuti aɓalǝ atanni ka. Acemǝnana sǝm sǝlǝna ama tanni ka, nǝ̀ yina sǝm nǝ do gandǝrǝu,#5:3 Ɓalli gbal aɓa: Rom 5:11; 2Kor 12:10; Jem 1:3. 4sǝ do gandǝrǝu ka, kǝ yinǝ ɓealǝu mǝɓoarne, sǝ ɓealǝu mǝɓoarne kǝ tsǝa tsǝkɓalǝu ma'sǝm mala kum amsǝban kǝ dǝurǝ ɗang. 5Sǝ mǝnia yì tsǝkɓalǝu ka, pà nǝ̀ tsǝa sǝm nǝ̀ nu kǝsǝkya ɗang, acemǝnana Ɓakuli pana sǝm ɓoro male, yì Bangŋo Mǝfele, ɓǝ̀ lumsǝ ɓabum sǝm nǝ earcearǝu male.

6Mǝnana sǝm nda piu aɓa ɗwanyi rǝcandǝa sǝ sǝm pànǝ ban auwa raka, Kǝrǝsti yi wú ace sǝm amǝ'cauɓikea, a pwari mǝnana Ɓakuli kànì ka. 7Ndanǝ kwano aban aɓwana pas mǝnana ɓwa nǝ̀ wú ace mǝ'cauɓoarna ka, earka ɓwa nǝ̀ gandǝ wú ace mǝpagbasha. 8Sǝ Ɓakuli ka lǝmndǝa sǝm earcearǝu male ani: Mǝnana sǝm ndaka amǝ'cauɓikea piu ka, Kǝrǝsti yi wú ace sǝm.

9Acemǝnana ado ka à angŋǝna sǝm, sǝm dumǝna amǝ'cauɓoarna aban Ɓakuli nǝ nkila mala Kǝrǝsti ka, lǝmndǝ ama kàngkàng aɓa pe mǝnana kuti mǝno ka, sǝm nǝ̀ kum auwa a ɓabu bumlulla mala Ɓakuli nǝ bani! 10Kat aɓa do ma'sǝm ɗiɗyal mǝnana sǝm ndaka aɓibura mala Ɓakuli ka, à yì gilǝki nre sǝm sǝnǝa Ɓakuli nǝ lú mala Muni mana yi wú ace sǝm ngga. Ɓǝ̀ mǝno ka yi pa anggo ka, lǝmndǝ ama kàngkàng aɓa pe mǝnana kuti mǝno ka, sǝm nǝ̀ kum auwa, mǝnana ado ka à yina nǝ sǝm aɓa dotarǝu sǝnǝa Ɓakuli ka. Acemǝnana yì Muna mala Ɓakuli ka ndakam nǝ yilǝmu. 11Sǝ mǝno na nǝmurǝì ɗang; sǝm nda aɓa banɓoarnado ace bǝsa dotarǝu ma'sǝm sǝnǝa Ɓakuli ace gir mǝnana pè nǝ bu Mǝtala sǝm Yesu Kǝrǝsti ka. Yì Kǝrǝsti ka, nda ɓwa mǝnana pǝlǝ sǝm ado, nre sǝm gilǝki sǝnǝa Ɓakuli ka.

Gir mǝnana gau Adamu andǝ Kǝrǝsti ka

12Lang Adamu pangŋǝna cauɓikea ka, kara cauɓikea kutio a ɓanza. Cauɓikea mala Adamu nǝ yinǝ lú, sǝ lú pǝlǝa mǝsǝe amur koyan ngga, acemǝnana koyan ngga pangŋǝna cauɓikea.#5:12 Ɓalli gbal aɓa: Tite 3:6; 1Kor 15:21-22; Rom 6:23; Jem 1:15. 13Kaniama à nǝ̀ pa Nggurcau ka, cauɓikea nakam ɗiɗyal a ɓanza. Sǝ duk cauɓikea ɗang, acemǝnana à malaká pa Nggurcau peatu mǝnana à nǝ̀ yàlli wi ka ɗang. 14Kat andǝ amani ka, ɓwapǝndǝa kǝ wú, twal a nza mala Adamu yi bwal a nza mala Musa, kpapi andǝ nggearǝ aɓwana mǝnana cauɓikea malea ka yàl nzongcau na kǝla mǝnana Adamu pak ka raka, lú do amuria kat. Yì Adamu ka gir'lǝmndǝa na, kǝ lǝmndǝ Kǝrǝsti mǝnana nǝ̀ ngga yiu peatu ka.#5:14 Ɓalli gbal aɓa: 1Kor 15:22,45.

15Sǝ cauɓikea mala Adamu andǝ ɓoro mala Ɓakuli ka, à nda ɗàngɗáng. Acemǝnana cauɓikea mala mǝnia yì ɓwa mwashat, yì Adamu ka, yinǝ lú amur aɓwana pas. Sǝ ɓwamuru mala Ɓakuli ka gulo kuti mǝno kuko, anggo gbal sǝ ɓoro male mala twalban cauɓikea aban aɓwana pas pa, yì ɓoro mǝnana yiu nǝ bu mǝnia yì ɓwa mwashat, yì Yesu Kǝrǝsti ka. 16Sǝ gir mǝnana ɓwamuru mala Ɓakuli pusǝ ka, ndá ɗàng andǝ gir mǝnana cauɓikea mala mǝnia yì ɓwa mwashat, pusǝ ka. Acemǝnana cauɓikea mala Adamu ka yinǝban aɓa kasǝ ɓashi-lú, sǝ ɓoro mala Ɓakuli ka kǝ warinǝ sǝm a kum kutio aban Ɓakuli, ko kat andǝa mǝnana ama sǝm kpa aɓalǝ acauɓikea pas ka. 17Cauɓikea mala ɓwa mwashat, yì Adamu, tsǝa lú do amur aɓwana kat. Sǝ gir mǝnana kar mur mǝno ka nda, kum ɓwamuru mǝgule mala Ɓakuli andǝ pa ɓoro mala duk aɓwana amǝ'cauɓoarna nǝ bu ɓwa mwashat, yì Yesu Kǝrǝsti. Sǝ aɓwana mǝnana kat à kum mǝnia yì ɓwamuru andǝ ɓoro ka, à nǝ̀ duk amurǝma aɓa do malea nǝ bu Yesu Kǝrǝsti.

18Ace mani ka, kǝla mǝnana cauɓikea mwashat mala Adamu yinǝ kasǝ ɓashi-lú amur aɓwana kat ka, anggo gbal sǝ turo cauɓoarna mwashat mala Kǝrǝsti kǝ yinǝ akban aban Ɓakuli andǝ yilǝmu ace aɓwana kat. 19Sǝ kǝla mǝnana nǝ mgbikiru mala ɓwa mwashat ka, aɓwana pas pǝlǝ amǝ'cauɓikea ka, anggo gbal ata cau mala okiru mala ɓwa mwashat ka, aɓwana pas nǝ̀ duk amǝ'cauɓoarna.

20À pà Nggurcau mala Ɓakuli, ace mǝnana ɓǝa ɓwana sǝn lime andǝ gulo mala cauɓikea malea. Sǝ lang ɓwapǝndǝa camarǝ lidǝmbǝa aɓa cauɓikea ka, ɓwamuru mala Ɓakuli kǝ gulo kǝ tur a dǝmbǝa kǝrkǝr.#5:20 Ɓalli gbal aɓa: Rom 7:7-8; Gal 3:19; 1Tim 1:14. 21Kǝla mana cauɓikea do amur ɓwapǝndǝa kat a njar mala lú ka, anggo gbal ɓwamuru mala Ɓakuli ɓǝ̀ duk murǝm. Mǝnia yì ɓwamuru mala Ɓakuli ka kǝ yinǝ aɓwana ɓǝa kum akban abani, sǝ aɓa mǝno ka ɓǝa kum yilǝmu mǝnana málá male pà kàm raka, nǝ bu Yesu Kǝrǝsti Mǝtala sǝm.#5:21 Ɓalli gbal aɓa: Rom 6:23.

Currently Selected:

Amǝ Roma 5: mbu

Highlight

Copy

Compare