Enzũko 1
1
Erihangikwa lyʼekihugo
1Okwʼĩtsũka Nyamuhanga mwahangika olubula nʼekihugo. 2Nʼekihugo mokyabya mulala butsira kindu; nʼomwĩrĩmya abya endata oko mitobero; nʼOmũlĩmũ wa Nyamuhanga abya akalereta endata oko magetsi. 3Neryo Nyamuhanga mwabũga ati, Habye ekyakakala; neryo ekyakakala mokyabyaho. 4Neryo Nyamuhanga mwalangira ekyakakala ko kyowene; neryo mwagaba ekyakakala nʼomwĩrĩmya. 5Neryo Nyamuhanga mwahula ekyakakala mo musibo, nʼomwĩrĩmya mwahulago mo kiro. Neryo mobwabya ĩgolo-golo, kandi mobwabya engyakya, kye kiro kiguma.
6Neryo Nyamuhanga mwabũga ati, Habye ekyanya omo katĩkatĩ kʼamagetsi, neryo kigabe amagetsi nʼamagetsi. 7Neryo Nyamuhanga mwahangika ekyanya, neryo mwagaba amagetsi awali eyĩkwa oko kyanya nʼamagetsi awali endata wʼekyanya; neryo mokyabya kitya. 8Nʼekyanya Nyamuhanga mwahulakyo mo Lubula. Neryo mobwabya ĩgolo-golo, kandi mobwabya engyakya, ekyo kye kiro kyʼakabiri.
9Neryo Nyamuhanga mwabũga ati, Amagetsi awali eyĩkwa wʼelubula ahĩndane haguma, nʼekitaka kyũmĩre kihuluke. Neryo mokyabya kitya. 10Neryo Nyamuhanga mwahula ekitaka kyũmĩre mo kihugo. Nʼerĩhĩndana lyʼamagetsi mwahulalyo mo ngetsi: neryo Nyamuhanga mwalangira ko byowene. 11Neryo Nyamuhanga mwabũga ati, Ekitaka kĩlasaye ebiti, nʼesyonyenyĩ esikabuta embuto, nʼemiti yʼebĩgũma moyaheta kwʼebĩgũma ngʼomũsĩndo wayo, eyiwite embuto yayo, oko kihugo: neryo mobyabya bitya. 12Nʼekitaka mokyalasya ebiti, nʼesyonyenyĩ mosyabuta embuto ngʼomũsĩndo wasyo, nʼemiti moyaheta kwʼebĩgũma obuli mbuto byayo, ngʼomũsĩndo wayo: neryo Nyamuhanga mwalangira ko kyowene. 13Neryo mobwabya ĩgolo-golo, kandi mobwabya engyakya; ekyo kye kiro kyʼebisatu.
14Neryo Nyamuhanga mwabũga ati, Habye esyotala omo kyanya kyʼelubula erigaba omusibo nʼekiro; neryo bibye biminyikalo, kandi busana nʼebirimo, na busana nʼebiro nʼemyaka. 15Nabyo bibye busana nʼesyotala omo mwanya wʼelubula erĩkolerya ekihugo; neryo mobyabya bitya. 16Neryo Nyamuhanga mwahangika esyotala ĩbĩrĩ esyonenenene; etala nene eritabala omo musibo, nʼetala nge eritabala omo kiro; mwahangika nʼesyongũnũnũ nibya. 17Neryo Nyamuhanga mwahĩrasyo omo kyanya kyʼelubula sibye sĩkakolerya oko kihugo, 18nʼeritabala omo musibo, nʼomo kiro, nʼerigaba ekyakakala nʼomwĩrĩmya. Neryo Nyamuhanga mwalangira ko byowene. 19Neryo mobwabya; ĩgolo-golo, kandi mobwabya engyakya; ekyo kye kiro kyʼebini.
20Neryo Nyamuhanga mwabũga ati, Amagetsi osũle nʼerikanya nʼebĩhangĩkĩre ebiriho nʼesyonyonyũ sigulukire endata oko kihugo omo kyanya kyʼolubula. 21Neryo Nyamuhanga mwahangika esyonyama nene-nene syʼomo ngetsi nʼobuli nyama yahangikawa eyiriho, eyikagenda, eyikalendera omo ngetsi, ngʼomũsĩndo wasyo; obuli nyonyũ syosĩ syʼebĩpũpa ngʼomũsĩndo wasyo; neryo Nyamuhanga mwalangira ko byowene. 22Neryo Nyamuhanga mwatsumulasyo ati, Mubute, mukanyirire, mũsũlaye amagetsi wʼesyongetsi, nʼesyonyonyũ sikanye omo kihugo. 23Neryo mobwabya ĩgolo-golo, kandi mobwabya ngyakya; ekyo kye kiro kyʼebitanu.
24Neryo Nyamuhanga mwabũga ati, Ekihugo kikanye mwʼesyonyama esyahangikawa esiriho, ngʼomũsĩndo wasyo. Neryo mokyabya kitya. 25Neryo Nyamuhanga mwahangika esyonyama syʼomolĩ ngʼomũsĩndo wasyo, nʼesyonyama syʼeka ngʼomũsĩndo wasyo, nʼobuli kindu ekikakululuka oko kitaka ngʼomũsĩndo wakyo. Neryo Nyamuhanga mwalangira ko byowene. 26Neryo Nyamuhanga mwabũga ati, Tuhangike omundu omo mũsĩndo, nʼomo kĩsosekanĩo kyetu, atabale oko mahere wʼomo ngetsi nʼoko syonyonyũ syʼomo kyanya, nʼoko syonyama, nʼoko kihugo kyosĩ, nʼoko buli kindu ekikakululuka oko kitaka. 27Neryo Nyamuhanga mwahangika omundu omo kĩsosekanĩo kiwe, mwamuhangika erisosa Nyamuhanga; mwahangikabo omulume nʼomũkalĩ. 28Neryo Nyamuhanga mwatsumulabo, neryo Nyamuhanga mwabwirabo ati, Mubute mukanyirire, mũsũlaye ekihugo, mũgondayekyo; mutabale oko mahere wʼomo ngetsi nʼoko nyonyũ syʼomo kyanya, mutabalire obuli kindu ekiriho, ekikalendera oko kihugo. 29Neryo Nyamuhanga mwabũga ati, Lebaya, nabiribaha obuli nyenyĩ esikayira esyombuto, esiri endata oko kihugo kyosĩ, nʼobuli muti owali nʼebĩgũma bikayira embuto; byasyabya kalyo busana nenyũ. 30Oko buli nyama oko kitaka, oko buli nyonyũ syʼomo kyanya, nʼoko buli kindu kikakululuka ahisi oko kitaka, ebyosĩ ebiriho, nabirihabyo obuli kiti kibisi mo kalyo; neryo mobyabya bitya. 31Neryo Nyamuhanga mwalangira obuli kindu ahangika, talebaya ko kyowene kutsibu. Neryo mobwabya ĩgolo-golo, kandi mobwabya ngyakya; ekyo kye kiro kyʼendatu.
Currently Selected:
Enzũko 1: KB80
Highlight
Share
Copy
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.