Abanya Galatĩa 4
4
1Kandi nyiti, omugulu omũlĩ wʼomwandu akine mwana, sialengĩre omukobe nomo angabya mukama wʼebindu byosĩ. 2Nĩkwa omugulu akine mulere, abalemberĩ nʼabateya bakamulembera nʼeriteya ebindu biwe erĩhĩka oko mugulu owahĩrawa nʼĩse. 3Netu nibya omugulu twabya bana, twabya bakobe bʼemyatsi yʼekihugo kino. 4Nĩkwa omugulu amabiberera, Nyamuhanga mwatuma Omugala wuwe. Omugala oyo mwabutwa nʼomũkalĩ kandi mwabutwa omo mitsye yʼEmigambo yʼAbayũda, 5iniatoka eribohola ababya omo Migambo, netu itwatoka eriyirwa mo bagala ba Nyamuhanga. 6Kandi kusangwa muli bagala, Nyamuhanga abirituma Omũlĩmũ wʼomugala wuwe omwisi wʼemitima yetu, owakabirikira ati, Tata, Tata! 7Neryo suli kandi mukobe, nĩkwa uli mugala. Kandi wamabya uli mugala, Nyamuhanga asyakuha ebyosĩ abirilaga.
Paũlo akaganĩraya omwatsi wʼAbanya Galatĩa
8Erĩmbere, omugulu mwabya mũtasĩ Nyamuhanga, mwabya bakobe bʼesyonyamuhanga esite kũndũ. 9Nĩkwa lino mwabiriminya Nyamuhanga. Kwilaba aho, Nyamuhanga abiribaminya. Neryo busana nakĩ mukasuba oko myatsi yʼekihugo kino eyite nʼamaka. Mwanzĩre eriswabya bakobe bayo kwehĩ? 10Mukakwama ebiro, nʼemikera, nʼebirimo, nʼemyaka. 11Ngubaha busana nenyũ, nyiti mbino nabiribaluhira busa.
12Abagala betu, ngabalemba-lemba nyiti ĩnywe mubye nga ngye. Kusangwa nage nabiribya nga nywe, momutangira nabi. 13Nĩkwa mũnasĩ ngoko nabya nyilwere omo mubiri omugulu natsũka erĩbatũlĩra Engulu Yowene. 14Nomo mwanalengawako erinyipona kutse erinyigana busana nʼobũkonĩ bwage, momutakola mutya, nĩkwa momwanyĩkokya ngʼomũlaĩka wa Nyamuhanga, ngoko mwanganakokya Kristo. 15Neryo lino omũyĩsa wenyũ oyo ali hayi kwehĩ? Ngababwira nyiti, kumbe kyangatokekana, nga mwabirikula ameso wenyũ nʼerimbago. 16Lino nabiribya nzĩgũ yenyũ busana nʼeribabwira ekwenene kwehĩ?
17Abandu abo bakabasonda-sondaya kutsibu, nikwa butsira omo mwatsi owene, nĩkwa banzĩre eritugaba, bati mukwamebo kutsibu. 18Nĩkwa lyowene erikwama nʼomũhwa omwatsi owene, nomo nyitane haguma nenyũ. 19Ĩnywe bana bage, ngʼomũkalĩ Oyukabuta, ko ngakunda nyitya busana nenyũ, nyiti Kristo aminyikale omwisi wenyũ. 20Nĩkwa nyiti kumbe nangabya haguma nenyũ lino nʼerĩbũga nenyũ omo gundi mũsĩndo. Kusangwa ngalemawa busana nenyũ.
Sera na Hagarĩ
21Munyibwire, ĩnywe mwanzĩre eribya oko Migambo, mũkowa ebyo Migambo ĩkabũga kwehĩ? 22Kusangwa kĩsakĩre kiti, Abrahamũ abya nʼabagala babiri. Omũkalĩ wʼobukobe mwabuta mugala muguma, nʼomũkalĩ wʼobwĩranda mwabuta mugala muguma. 23Omugala wʼomũkalĩ wʼobukobe abutawa ngʼabandu bosĩ, nĩkwa omugala wʼomũkalĩ wʼobwĩranda abutawa busana nʼendagane ya Nyamuhanga. 24Nʼeyĩ nĩ mĩsyo. Abakalĩ aba bakakangaya ndagano ĩbĩrĩ. Omuguma akalũa oko kitwa kyʼeSĩnaĩ, naye akabuta abana bʼobukobe. 25Hagarĩ oyũ ni kitwa kyʼeSĩnaĩ omo kihugo kyʼeArabĩa, kiri ngʼeYerũsalema ya lino, kusangwa eYerũsalema ya lino iri omo bukobe haguma nʼabana bayo. 26Nĩkwa eYerũsalema yʼendata iri nʼobwĩranda, nayo ni koyo wetu. 27Kusangwa kĩsakĩre kiti,
Utseme, uwe mũkalĩ mugumba oyutabuta;
Uyitsangure, wamaye, iwe utekunda;
Kusangwa omũkalĩ oyũ alekeranĩbawa, awite abana kwilaba
Omũkalĩ oyuwite ĩba.
28Nĩkwa ĩnywe, balĩkyetu, nga Ĩsaka, tuli bana bʼendagane. 29Ngoko mugulu oyo, oyo wabutawa ngʼabandu bosĩ, mwendererya oyo wabutawa busana nʼOmũlĩmũ, ko liri ritya lino. 30Nĩkwa Amasako atĩkĩ? Ati,
Uhige omũkalĩ mukobe na mugala wuwe.
Kusangwa omugala wʼomũkalĩ mukobe,
Siendisyasangira obũsokĩ bwʼĩse haguma nʼomugala wʼomũkalĩ wʼobwĩranda.
31Neryo, balĩkyetu, Situli bagala bʼomũkalĩ mukobe, nĩkwa tuli bagala bʼomũkalĩ gʼobwĩranda.
Currently Selected:
Abanya Galatĩa 4: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
