Abanya Galatĩa 3

Emigambo kutse Erĩkĩrĩrya

1Ĩnywe Banya Galatĩa bakĩrũ, obusaki obukabateba ni bwahi kwehĩ? Nenyũ mwakangĩrĩrĩbawa ndeke-ndeke ngoko Kristo abambawa oko musalaba embere syʼabandu bosĩ. 2Muleke ngatababũlaya kiguma, momwangirira Omũlĩmũ busana nʼerikola Emigambo, kutse busana nʼerĩowa nʼerĩkĩrĩrya Engulu Yowene kwehĩ? 3Busana nakĩ mukabya bakĩrũ kwehĩ? Mwamabĩtsũka omo Mũlĩmũ wa Nyamuhanga, mũkahĩkana lino busana nʼomubiri kwehĩ? 4Mwabiriagalwa omo myatsi yosĩ eyĩ mo buyira kwehĩ? Muti, siyabya mo buyira! 5Omugulu Nyamuhanga akabaha Omũlĩmũ, nʼerikola ebitiko-tiko omo katĩkatĩ kenyũ, akakola ebĩ kusangwa mukakola Emigambo, kutse kusangwa mũkowa nʼerĩkĩrĩrya Engulu Yowene kwehĩ?

6Ngoko kĩsakĩre busana na Abrahamũ kiti, Mwĩkĩrĩrya Nyamuhanga, neryo busana nʼerĩkĩrĩrya liwe, Nyamuhanga mwamuganza mo mutunganene. 7Neryo, muminye ngoko abandu ababĩrĩkĩrĩrya Engulu Yowene, nabo ni bana ba Abrahamũ. 8Neryo Amasako mwaminya erĩmbere ngoko Nyamuhanga asyatũngananĩa Ebihanda busana nʼerĩkĩrĩrya, neryo mwatũla Engulu Yowene uku Abrahamũ ati, Omwisi syawe, ĩngye Nyamuhanga nasyatsumula Ebihanda byosĩ. 9Neryo abosĩ abakĩkĩrĩraya bakabana omũyĩsa ogo Abrahamũ abana busana nʼerĩkĩrĩrya liwe.

10Kusangwa abosĩ abakayiketera erikola Emigambo babiritakirwa; kusangwa kĩsakĩre kiti, Obuli mundu oyuteyitsinga omo myatsi yosĩ eyĩsakĩre omo kitabu kyʼEmigambo, nʼerikolayo, omundu oyo abiritakirwa. 11Nĩkwa kiminyikere ko hate mundu oyukayirawa mo mutunganene embere sya Nyamuhanga busana nʼEmigambo, Kusangwa kĩsakĩre kiti, Omutunganene asyabyaho busana nʼerĩkĩrĩrya. 12Nĩkwa Emigambo siyirihangana okwʼĩkĩrĩrya, nĩkwa kĩsakĩre kiti, Oyukakola Emigambo asyabyaho busana nayo.

13Kristo abĩrĩtũtongolya okwʼitakirwa lyʼEmigambo, iniabiritakirwa omo mwanya wetu, kusangwa kĩsakĩre kiti, Obuli mundu oyũhanĩkĩrwe oko muti abye mutakirwa. 14Kusangwa Kristo mwakola atya neryo abʼEbihanda ibatoka eribana omũyĩsa omwisi wa Kristo Yesu, ogo Abrahamũ abana. Netu itwatoka eribana Omũlĩmũ ogo Nyamuhanga alaga busana nʼerĩkĩrĩrya lyetu.

Emigambo nʼEndagane

15Balĩkyetu, ngabakangaya ekikakolawa nʼabandu. Endagane yʼabandu babiri yamabĩgomerĩbwa, sihali bandu bangabindulayo kutse eritomekera kuyo. 16Neryo. Nyamuhanga mwaha esyondagane siwe uku Abrahamũ nʼoko lubuto luwe. Sĩalĩbũga ati, oko bana buwe, eriahula bangi, nĩkwa akabũga ati, oko lubuto lwawe mundu muguma, iniakahula Kristo. 17Ekyo ngabũga kyekĩ, endagane eyagomerĩbawa na Nyamuhanga siyangabindulwa nʼEmigambo eyahĩka emyaka amagana ani nʼamakũmĩ asatu enyũma. Neryo Emigambo sĩyangalĩmya erilaga liwe. 18Nyamuhanga amabya akatuha ebyo atulaga busana nʼerikola Emĩgambo, sialituhabyo busana nʼerilaga liwe; kusangwa Nyamuhanga mwahabyo uku Abrahamũ kusangwa mwamulagabyo.

19Neryo Emigambo ni busana nakĩ kwehĩ? Emigambo yahĩrawa busana nʼerĩkangya amalolo erĩhĩka aho mwana wuwe asyahĩkĩra. Endagane eyo yahabawa oko mwana oyo. Emigambo yaletawa nʼabamalaĩka omo byala byʼomũsanganĩa. 20Nĩkwa ahali omundu muguma musa sihali mũsanganĩa, na Nyamuhanga ni muguma.

Busana nakĩ Emigambo kwehĩ?

21Neryo Emigambo ikagana erilaga lya Nyamuhanga kwehĩ? Iyehe nʼahake! Kusangwa kumbe Nyamuhanga aha omugambo owangatoka eriha engebe, kumbe ebitunganene byangabanika omo Migambo. 22Nĩkwa Amasako mwahĩra abandu bosĩ ngʼabakola-nabi, neryo erilaga lihabawe oko bosĩ abakĩkĩrĩraya Yesu Kristo.

23Nĩkwa embere wʼerĩhĩka lyʼerĩkĩrĩrya, Emigambo moyatuyira ngʼabandu bʼomũlĩkĩ erĩhĩka oko kiro kyʼerĩbĩsũla erĩkĩrĩrya. 24Neryo Emigambo yabya ngʼomũlemberĩ wetu erĩhĩka aho Kristo asyasira, itwatoka erĩtũngananĩbwa embere sya Nyamũhanga omwʼĩkĩrĩrya. 25Nĩkwa lino erĩkĩrĩrya lyabĩrĩhĩka, situkiri oko mũlemberĩ.

26Kusangwa busana nʼerĩkĩrĩrya, ĩnywe bosĩ muli bagala ba Nyamuhanga nʼerimatikana na Kristo Yesu. 27Kusangwa ĩnywe bosĩ mwabatĩsĩbawa erimatikana na Kristo mwabiriambala emibere ya Kristo. 28Sihali Omũyũda nʼOmũgĩrĩkĩ, sihali omukoba nʼogʼobwĩranda, sihali wʼobulume kutse wʼobũkalĩ; kusangwa ĩnywe bosĩ muli muguma erimatikana na Kristo Yesu. 29Neryo mwamabya muli Bakristo, muli bana ba Abrahamũ, mwasyabana ebyosĩ Nyamuhanga alaga.

Currently Selected:

Abanya Galatĩa 3: KB80

Highlight

Copy

Compare