2 Abanya Korĩnto 12

Erilota nʼerĩbĩsũlĩrwa lya Paũlo

1Litolere inayihalamba, nomo lite lyangagasakĩ. Nĩkwa lino ngandĩkanĩa busana nʼerilota nʼerĩbĩsũlĩrwa ebĩkalũa oko Mukama. 2Nyasĩ Omukristo muguma, hamatalaba lino emyaka erĩkũmĩ nʼeyĩnĩ, oyo watwalawa oko lubula lwʼakasatu. (Sĩnyasĩ nga mwayayo omo mubiri, kutse nga siabya omo mubiri, Nyamuhanga anasĩ ekyo.) 3Kandi nyĩnasĩ omundu oyo mwatwalwa omo Paradĩso (kandi Sĩnyasĩ nga mwaya omo mubiri, kutse nga siabya omo mubiri, Nyamuhanga anasĩ ekyo). 4Neryo omundu oyo mowa ebĩnywa ebitetoka erĩbũgwa, kandi ebĩnywa ebyo sibitolere erĩbũgwa nʼomundu. 5Neryo ngandiyihalamba busana nʼomundu oyo; nĩkwa sindiendiyihalamba busana nage, mo nʼomo myatsi yʼobolo bwage. 6Kumbe nyanzĩre eriyihalamba, sinangabya mũkĩrũ, kusangwa nangabũga ebyʼekwenene. Nĩkwa sindiendisyayihalamba, Sihabye omundu Oyukanyiganza nga mundu mubuya kwilaba ebyo akalangira nʼerĩowa omo migendere yage.

7Nĩkwa isinangayiheka nʼerĩyĩhamya busana nʼerĩbĩsũlĩrwa lĩnene erĩlabĩre, monahabwa endwala yʼomubiri eyabya ngʼomukwenda wʼeSatanĩ wʼerĩnyĩhũnza, erĩnyĩkakĩrya okwʼiyiheka. 8Monasaba Omukama esyongendo ĩsatu busana nʼomwatsi oyũ nʼerĩmũbũlya nyiti anyĩlũsaye yoko. 9Naye mwanyĩsũbĩrya ati, Olukogo lwage lukakutoka, kusangwa obũtokĩ bwage bũkahĩkana omo bolo bwawe. Neryo nasyayihalamba omo butseme busana nʼemyatsi yʼobolo bwage, obũtokĩ bwa Kristo bunyibyeko. 10Neryo ngatsemera obolo, bwʼeritsumwa, nʼamalĩge, nʼerĩendererĩbwa, nʼemyatsi eyĩkalĩre, busana na Kristo. Kusangwa omugulu indi molo, indi mbangĩ.

Paũlo akibuka ekanĩsa yʼAbanya Korĩnto

11Nabiribya ngʼomũkĩrũ, nĩkwa ĩnywe mwaleka, kusangwa nabya nyitolere erĩsĩmwa nenyũ. Nomo nangabya isindi mundu, kwenene Sindi muke nʼahake oko bakwenda abo mukahula mo bakulu. 12Ebĩmĩnyĩsyo byʼobukwenda bwage mobyakanganĩbwa omo katĩkatĩ kenyũ Omwʼiyibombeka lyosĩ. Mohabya ebĩmĩnyĩsyo, nʼebyʼeriswekera nʼebitikotiko. 13Kandi momwaganzwa ngʼabake oko wandi makanĩsa kwehĩ? Omo kiguma kisa ekyʼeritindabanũbya busana nʼobwaga bwage. Mondakola ndeke, munyibuyire.

14Eyĩ ni ngendo yʼakasatu nyĩsĩkĩre erĩbahĩkako, kandi sĩndĩendĩsyabanũbya busana nʼekindu; kusangwa sindisondasonda ebindu byenyũ, nʼĩnywe ngasonda-sonda. Kusangwa si ba bana abatolere eribikira ababũtĩ babo, nĩkwa ababũtĩ bo batolere eribikira abana babo. 15Nage ngandĩhĩtya nʼobutseme nʼerĩyĩnũbya busana nʼerĩbawatĩkya. Namabanza kutsibu, ekyo kyangaleka imwanyanza hake kwehĩ?

16Neryo mwanganalĩga ngoko ĩngye mondabanũbya, nĩkwa ogundi anganabũga ati, monabahamba omo menge omo kitego. 17Monabanyega kwʼekindu omo bandu abo nabatumira kwehĩ? 18Monasaba Tĩto nyiti agende, kandi monatuma Omũlĩkyetu haguma naye. Ko Tĩto mwabanyega ko kindu kwehĩ? Netu situlirendera nʼomutima muguma kwehĩ? Kandi situlikwama olugobe luguma kwehĩ?

19Mbino mwabere mũkaganĩrya muti tukayilwira embere syenyũ. Iyihi! Nĩkwa embere sya Nyamuhanga, tũkabũga ebyo Kristo anzĩre ĩtwabũga. Kandi abanze betu, ebyosĩ ebyo tukakola ni busana nʼeabahĩmba. 20Kusangwa ngubaha nyiti, omugulu ngabahĩkako, nasyabeya isimuli nʼomutima ogo nanganza, kandi nasyaminyikala ũkwʼĩnywe nga singwite omutima ogo mwanganza. Kandi mbino hasyabya malwa, obũha, erihitana, kutse obuhaka, nʼeritsuma, eritonga bandu, kutse emiyiheko, kutse omwaga. 21Kandi ngubaha nyiti omugulu nasyaswahĩka, Nyamuhanga wage asyanyihemulira embere syenyũ. Neryo nasyalira busana nʼabandu bangi ababĩrĩhalya, nʼerĩsĩngĩra, nʼerikwama esyongumbu nyibi, isibetabindula emitima yabo nʼerireka ebibi ebyo.

Currently Selected:

2 Abanya Korĩnto 12: KB80

Highlight

Copy

Compare