Jo-Efeso 5

Dak e ler

1Kaka un nyithind Nyasaye mohero, nyaka utem mondo ubed machal kode. 2#Wuok 29.18; Zab 40.6.Beduru gi hera, mana kaka Kristo noherowa, mi ochiwonwa ngimane obedo misango madum tik mamit ni Nyasaye.

3Terruok gi tim ma ok ler moro amora, kata gombo, kik bedi e kindu, kendo kata mana wacho kik wachi nimar mano ok owinjore gi jo-Nyasaye, 4kendo tim ma kuodo wich, kata twak mofuwo, kata oyuma, bende ok owinjore. To moloyo onego ugo mana erokamano ni Nyasaye, 5nikech ung’eyo ni ng’ama terore kata ma ok ler, kata ma jagombo, ma en ng’ama lamo nyiseche manono, ok noyud gueth mar Loch Kristo gi Nyasaye.

6Kik uwe ng’ato wuondu gi weche manono, nikech gik ma kamago ema miyo Nyasaye olo mirimbe kuom joma tamore winjo wachne. 7Kuom mano, kik urip gi joma kamago ngang’. 8Chon ne un jomudho, to koro, kaka usedoko jo-Ruoth, un joler. Omiyo nyaka uwuoth ka joma nie ler, 9nimar ler ema kelo ber gi timbe makare kod adiera duto. 10Temuru mondo ung’e gik malong’o ni Ruoth. 11Beduru mabor gi joma timo timbe mag mudho maonge ohala. To moloyo umi kit timbegi ong’ere ratiro. 12En wichkuot kata mana wacho gik ma gitimo ling’ling’. 13To ka gik moko duto ogol e lela, to kitgi madiera nenore, 14nikech gima kite onenore malong’o e lela, lokore ler. Mano emomiyo iwero niya,

“In ma inindo, chiew!

Chier, ia kuom joma otho,

mondo Kristo orieny kuomi.”

15Emomiyo tang’uru ahinya kaka onego ubedi. Kik ubed ka joma ofuwo, to beduru ka joma riek. 16#Kol 4.5.Kik uketh kinde ma un-go, nikech ndalogi gin ndalo mag richo. 17Kuom mano, kik ubed joma ofuwo, to temuru ng’eyo gima Ruoth dwaro. 18Weuru mer, nono to ubiro ketho ngimau chuth. Kar timo kamano, to Roho ema mondo opong’u. 19#Kol 3.16, 17.Weruru wende Zaburi, gi wende lemo ka un kaachiel, kendo kuwer kamano, to denduru Ruoth e chunyu. 20Kamano gouru erokamano pile ni Nyasaye Wuoro kuom gik moko duto, e nying Ruodhwa Yesu Kristo.

Mon gi chwo

21Beduru gi winjruok e kindu, kumiyogo Kristo duong’. 22#Kol 3.18; 1 Pet 3.1.Un mon luoruru chwou mana kaka uluoro Kristo, 23nikech dichwo e wi dhako, mana kaka Kristo e wi kanyakla mar joma oyie kuome, ma en ringre, kendo en jawar mare. 24Kuom mano, mon nyaka winj chwogi e weche duto, mana kaka kanyakla mar jo-Kristo winjo Kristo.

25 # Kol 3.19; 1 Pet 3.7. Un chwo, heruru mondu mana kaka Kristo nohero kanyakla mar joma oyie kuome, mochiwo ngimane nikech en. 26Ne ochiwore kamano mondo opwodhe, kolwoke gi pi kendo gi wach, 27mondo ka okawe obedo mare, to obed gi duong’ kendo maler, maonge chilo kata jowruok kata gimoro amora ma kamano. 28Chwo onego oher mondgi mana kaka gihero ringregi giwegi. Ng’at mohero chiege oherore owuon. 29Onge ng’ama ok dwar ringre owuon, to opidhe kendo orite, mana kaka Kristo bende rito kanyakla mar joma oyie kuome, 30nikech en ringre owuon. Wan to, wan fuond ringreno. 31#Chak 2.24.En mana kaka Muma wacho niya, “Emomiyo, ng’ato wewo wuon gi min, to padore kuom chiege, kendo ji ariyogo doko ringruok achiel.” 32Nitie adiera maduong’ mopondo e wachni, to aneno ni owuoyo kuom Kristo gi kanyakla mar joma oyie. 33To un bende owuoyo kuomu kama: Ng’ato ka ng’ato mondo oher chiege kaka oherore owuon, kendo dhako ka dhako bende nyaka luor chwore.

Currently Selected:

Jo-Efeso 5: DHO15

Highlight

Copy

Compare