提摩太前書 5
5
對信徒个責任
1毋好責備老人家；愛勸佢像勸若爸一樣。對待後生人愛像對兄弟恁樣； 2對年長婦女愛像對阿姆恁樣；對後生个婦女愛用純潔个心，像對姊妹一樣。
3愛尊重正經守寡个婦女。 4寡婦若係有子女抑係孫仔孫女，姖个後輩就愛先學習樣般在屋下盡孝道，來報答爺𡟓抑係阿公阿婆，因為這係上帝所歡喜个。 5正經守寡又無人好倚靠个婦女，所仰望个只有上帝，日夜祈禱所求个就係上帝个幫助。 6單單追求享樂个寡婦，雖然生等，其實係已經死掉。 7這兜事情，你一定愛教，免得姖等被人批評。 8若係有人毋照顧親戚，特別係自家屋下个人，佢就係違悖信仰，比毋信个人還較壞。
9寡婦登記个條件係恁樣：姖等愛有六十歲以上；只有結婚一擺 #5:9 「只有結婚一擺」抑係譯做「一生對老公忠實」。； 10還愛有好名聲，就像：盡會養育子女，接待旅客，洗聖徒个腳，救濟急難，盡力行各樣善事。
11總係，後生个寡婦毋好登記；因為姖等情慾發動、離開基督个時，就想愛再嫁人， 12違悖當初所許个願，因為恁樣受定罪。 13同時，姖等還學到懶尸，好過家；還較慘个係，毋單淨懶尸，又好講長講短，插別人个閒事，講無應該講个話。 14所以，𠊎希望後生个寡婦再嫁人，生養子女，照顧家庭，莫使對敵有攻擊个把柄。 15因為，已經有兜寡婦改變心意，去跈撒但了。 16信主个婦女若係屋下有寡婦，姖就愛照顧姖等，毋好將擔仔推給教會；恁樣，教會正會有能力照顧該兜無人好倚靠个寡婦。
17盡會治理教會个長老，特別係認真講道㧯教導个，應該愛得到加倍个敬奉。 18因為聖經講：「牛踏榖个時，毋好籠等牠个嘴」；又講：「工人得工錢係合理个。」 19若係有人告長老，除非有兩個抑係三個證人，就毋使搭佢。 20愛公開責備所有犯罪个人，來使其他个人得到警戒。
21𠊎在上帝、基督耶穌、㧯受揀選个天使个面前慎重吩咐你，愛遵守這兜教訓，無論麼介事情毋好有成見抑係偏心。 22毋好隨便為人行按手禮；毋好㧯別人个罪過有份；愛保守自家純潔。
23因為你个身體常常有病，毋好單淨啉水，愛啉一些仔酒來幫助消化。
24有兜人个罪係非常明顯个，盡遽就受定罪；總係，有兜人个罪後來正被人看出來。 25共樣，好个行為也係明顯个；就算毋係恁明，也無法度囥起來。
Currently Selected:
提摩太前書 5: THV12Hdb
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
