提摩太前書 4

假教師

1聖靈明明講，在末後个時期，有兜人會放掉信仰，去跈欺騙个靈㧯邪靈个教訓。 2這種教訓係對假冒為善个落仔來个；佢等个良心像被燒紅个鐵㸐死掉去。 3佢等禁止嫁娶；有兜食物佢等也禁食，就係上帝所造、愛給該兜有信心又明白真理个人用感謝个心來領受个。 4上帝所造个一切全部係好个，人應當用感謝个心來領受，毋好拒絕， 5因為上帝个話㧯人个祈禱使這兜食物成做聖潔了。

基督耶穌个好僕人

6你若係將這兜事指示兄弟姊妹，你就係基督耶穌个好僕人；同時，信仰个話㧯你一直所順從个正確道理，會幫助你自家在靈性上長進。 7你愛棄絕該兜無搭無碓个言語㧯無影無跡个傳說；愛為到敬虔个生活操練自家。 8身體个操練，利益有限；靈性个操練，凡事都有利益，因為會帶來今生㧯來生个盼望。 9這句話係可靠个、堪得人完全接受。 10𠊎等辛苦打拚 #4:10 「打拚」有兜古卷係「又受侮辱」。，因為𠊎等所盼望个係永生个上帝；佢係人類个救主，特別係信徒个救主。

11你愛將這兜事情指示佢等，教導佢等。 12莫俾人看輕你後生；顛倒，無論講話、行事、愛心、信心、㧯純潔逐方面，你攏總愛做信徒个榜樣。 13你愛用心在宣讀聖經、講道、㧯教導等工作上，直到𠊎來。 14毋好忽略你屬靈个恩賜；這恩賜係通過先知个預言㧯眾長老个按手所賜給你个。 15這兜事你愛專心認真去做，俾大家看到你个進步。 16你愛謹慎自家㧯自家个教訓。這兜事情愛堅持去行；恁樣，你就會救你本身，又會救聽從你个人。

Currently Selected:

提摩太前書 4: THV12Hdb

Highlight

Copy

Compare