Takatwasane Izipiti 12

Takilragavane ka lrisi

1Ku Tamatama yakai Izipiti kawriva ki Musi si Arungu, 2“Kikai dramare kai lrikamani ku tapathagilane ki dramadramare, kalri kamani kudra aswalaalanga ka dramare ki nitaracailane. 3Kunumi kikai pelaelali la malra si bulru ki swa Iseraylri makanaelre: Ikai kai ki dramare kai ki samakamangeale ka vai, kwini tatama ki dadadaanane lri tara pasikai ki tacekecekelaneini pilri ku tikiane ku kiu ku tikiane ku kakiuane. 4Alaiyasi kwini lasu la tabekele ku wacekecekeleini, si kai lri maka eleme kwini umasane ka kiu, kwini lasu lri dulru mapithingi ki pasiagisini ku vaevane ka kiu, lri singikai ku tatapiane ku umawmase lulri pingithainu si pavalavala. 5Lu arakai ku nikiubawbalane ka kiu ku kakiuane mararaamau, ai lri tara ka taracailinga ka balase ka kiu, si lrika kakadrwa ku takatumanane. 6Lu kelanga ki saka 14 ka vai kai dramare kai ki maungu, ku swa Iseraylri makanaelre lri culu kwini pilri lini ka nilapulapwane. 7Ku mapapangale lri malra kelrete ku erai si drisisi ki tara thili ki lrawlrawdru si tali belenge ki lrawlrawdru, si ikai daane kane ku kiu. 8Kwini ki maungu lri tara kane ku niakamane ku kiu, mapalili ka lacenge si kaika nipawsemakane ka pange. 9Madha pingangetangeta kane ku beate ki kiu, la madha kanekane ku nithingelrane, tara kanea ku umasane ka niakamane, paelre ki awlru, sadavadavace si tali adringi. 10Ku tedrane madha pukaiyaiyane; ku tedrane tara lama imauawngane. 11Lu kanekane numi, kiraririmwa kane; la lritheethe ku lakete, sikece, la malra ku ukudru. Kikai yai amani ku Tamatamane ka Takilragavane ka lrisi.

12“Ikai kwini ki maungane, lri mulebeaku mwa ki swa Izipiti, papacai demedeme ki tinutakane, kai susu ku umawmase ku nilapulapwane, lri papacai patuelre. Lri pathavungaku sanaka latwaumase ki swa Izipiti. Amaniaku ku Tamatama. 13Kwini erai ki taibelengane ki lrawlrawdru amani ku sapatuthingalane ki taikaiyane numi. Lu pathavuthavungaku ki swa Izipiti, kainaku lri pakadula numiane. 14Sana daruru kai vai kai, kunumi tara tulrisisiia, ngulringalringau ka tatulrisisisiane ki Tamatama ka vai. Ku agagane numi lai lri mialri tara pasusu kikai tatulrisisisiane, cegecege ku apalralrawlrawthane ka kakudhane.”

Tamwalrane ku sapawsemakane ka lrisi

15Ku Tamatama amia kai, “Ki nimakapitulane, kunumi madha kanekane ku nipawsemakane ka pange, kanea sikakathane ku kaika nipawsemakane ka pange. Ikai kwini ki aswalaalanga ka vai mwalra demele ku yadaane ku sapawsemasemakane, ikai kwini ki nimakapitulane alaiyasi ikai ku umawmase ku wakane kwini nipawsemakane ka pange, kwini lasu kai lri kipasipinga ka kawkawluli. 16Kwini ki aswalalanga ka vai si samakapitulu, lri isarubu numi si taelre sukubu. Kikai nimakapusalane, kathane ku apadulrwane numi ku taleke, madha piapia ku drumane ku awngane. 17Kunumi tara pasuswa kikai Tamwalrane ku sapawsemakane ka lrisi, asi lwiyane kikai vai kai, amani ku tasangilukaneli numiane ka lazuku katwase ka Izipiti. Lu daruru kai vai kai, kunumi tara tulrisisiia, ku lamwabaibalrithi numiane la mialri ani tara pasusu kikai lrisi, si cegecege ka apalralrawthanenga ka kakudhane. 18Twalai kwini lukamaungu ki samaka 14 ka vai ki aswalaalanga ki dramare, pakeela lukamaungu ki saka 21 ki vai, kunumi madha kanekane ku nipawsemakane ka pange. 19Ikai kai ki nimakapitulane, madha pudadaane ku nipawsemakane ku pange; sanaka wakane ku nipawsemakane ku akaneane ku umawmase, adravane ka kiatulalake ikai kuni ku yabadhanane kitulalake, ku nagane lini makanaelre lri patwalai ki kawkawluli kimwalra supilri. 20Kunumi madha kanekane sanaka nipawsemakane ka akaneane; sanaka mapapangale lri kane makanaelre ku kaika nipawsemakane ka pange.”

Aswalaalanga ka Takilragavane ka lrisi

21Ku Musi la sarubu ki kiacapili ki swa Iseraylri, pelaela liniane, “Kunumi ka dadadaanane pilria ku vaeva ku lrulaiyana ku kiu, la culu, la tulrisisi ki Takilragavane ka lrisi. 22La malra ku ererece ku buraburu, la dapenge kwini yathalangane ku erai si drisisi pwa ki taibelenge ki lrawlrawdru. Pakeela ki kaiyane ki mialrealre, sanaka aneeanenga madha paulatalatadre. 23Ku Tamatama lu ngukakai ki Izipiti, si papacapacai ki swa Izipiti, sana drele ku erai ikai taibelenge si tara thili ki lrawlrawdru, lri tara lribate kwini ki lrawlrawdru, kai paudaane kwini ki kiasikawlu ku amudane ka sasiakawlu mudaane ki daane numi papacai numiane. 24Kunumi si lagagane numi tara apalralrawthana pasalaladha kikai ki kakudhane. 25Lu mudaanenga numi ku puvaganga ki Tamatama ka kadaengane, kunumi tara paluluda kikai kakudhane kai ki lrisi. 26Alaiyasi ku lalake numi la kivaga numiane, ‘Kikai kakudhane kai manemane ku patharevane?’ 27Kunumi tubalrea, ‘Kikai yai samusakenane ki Tamatama ku Takilragavane ka lrisi kikai kakudhane ka sapatarumarane, asi lwiyane sa ikai Izipiti ku Twaumase walribate ki ladaane ki swa Iseraylri. La papacai ki swa Izipiti, si paudripi ki niaketa.’ ”

Ku swa Iseraylri la pidruru, sukubu ki Tamatama. 28La katwase makitu mulatadre, si singikai ku tacunane ki Tamatama ki Musi si Arungu pangimianga.

Kiapapacai ku aswalalanga kitulalake

29Sakelanga ki kabiceacelrakane, ku Tamatama papacai nguelre ki aswalaalanga kitulalake ki swa Izipiti, twalai ki abebeelengenga ka tinwapane ki talialalai kwini lri kamani ku mwacungulu si atalialalai ka lalake ki talialalai, pakela ki tinwapane ki lakiaemenge; adravane ka aswalaalanga kitulalake ka lanilapulapwane mialri papacai. 30Kwini sakamaungu, ku talialalai ki swa Izipiti, ku sasiakawluini si mapapangale makanaelre ki kuni la makitu pacunu kasamali. Ikai Izipiti kathanenga ku makakaralealeale tubitubi ku lalingau ku kilalra madu, asi lwiyane sanaka daane yakaai ku wapacai ku umawmase. 31Kwini sakamaungu, ku talialalai ki swa Izipiti la dawlu ki Musi si Arungu, la iya kai liniane, “Lu kirimwa katwase, kunumi si kwini sakacekele numi ka swa Iseraylri kirimwa katwase kai ki kuni nai, pangimia kudra kitubi numi si mwa sukubu ki Tamatama numi. 32Mailuku ki lakiu si lalwange numi sarakatwase; la pasikai nakwane subulrubulru.”

33Ku swa Izipiti la rututu ki swa Iseraylri pakatwase ki kuni lini; kwini lalasu amia kai, “Lu kai numi katwase kikai, lri makitu pacai nai kawtu.” 34Ku swa Iseraylri la malra ku kaika nipawsemakane ka malaelamenge pwa ki palungu, la arakai ku laimai cabu, si angeale. 35La mialri lini pangimia ku tacunane ki Musi liniane, mwa ki swa Izipiti malra ku kingi gingi silu si laimai. 36Ku Tamatama la pawsakene ki swa Izipiti ki kawkawluini; kwini lalasu ta saiya ku manemane, ku swa Izipiti la baai liniane ku manemane. Lakamiyaiya kikai, ku swa Iseraylri wailuku ku tacekecekelane ki swa Izipiti.

Ku swa Iseraylri matwase Izipiti

37Ku swa Iseraylri singikai Ramese dadavace mwa Sukuthe. Lu kai paelre asipi kwini ki labaibai si lavavalake, ku sawvalai sikakathane, ta 600,000 ku umawmase. 38Tapangale ku maelane ka zuku si lalwange lakiu ku twapapalra liniane katwase. 39Kwini lalasu la tarakadalranane akame kwini iluku lini twalai Izipiti, kudra kaika nipawsemakane ka malaelamenge, asi lwiyane kiarututu kirarimu katwase Izipiti, la kai maka ngipapadulru ku laakaneane.

40Ku swa Iseraylri ku taikaiyane lini Izipiti tara 430 ka caili. 41Kwini tapalikaiyane ki tatara 430 ka caili, kwini lazuku ki kawkawlu ki Tamatama la makitu katwase Izipiti. 42Kikai ki maungu, Ku Tamatama ngiakakamani palakebe liniane, sangiluku liniane katwase ka Izipiti; ku swa Iseraylri la mialri drangalru kwini ki maungu, si malra patarumara ki Tamatama, kaamani ku angulringalringavane drangalru ki vaeva ka maungane ki mwabalribalrithi ki zidai.

Kakudhane ki Takilragavane ka lrisi

43Ku Tamatama kawariva ki Musi si Arungu, “Wabadhaku numiane kikai kakudhane ki Takilragavane ka lrisi: Ku maelane ka zuku kailri maka kane ku titikiane ka kiu ki Takilragavane ka lrisi; 44ai kudra langainga numi si laka kiagelregelrenga ka laduri kai lri kiruthuku kikai. 45Kudra lri padawdaalru ikai numiane ku badhabadha si tuvange kai lri maka kane. 46Lu kane numi ikaiya ki daane numi makanaelre ka wacekecekele, madha ililuku pulatadre; kudra lavigwa ki tikiane ka kiu la madha pakacelracelra. 47Ku mapapangale ki swa Iseraylri makanaelre tara tulrisisia kai ki lrisi ka vai. 48Ai kudra kai kiagelregelre ku umawmase kai lri maka kane ki tikiane ka kiu. Lwiyasi la ikai ku yakai numiane ku maelane ka zuku, ka swatelrainga ikaikai, lri pasusu kai ki Takilragavane ka lrisi musakene ki Tamatama, kunumi tara paswalaana pasikai ki wacekecekeleini ki lasawvalai pakigelregelre. Lukamiyaiya kikai, kwini lalasu lri kipasudalepenga ka kiatulalake ikai kikai ka swa Iseraylri ka umawmase, lri dulru kane ku tikiane ka kiu ki Takilragavane ka lrisi. 49Sanaka kiatulalake ikai kikai ka swa Iseraylri si yakai numiane ka maelane ka zuku lri makitu pasusu kikai kakudhane.” 50Ku swa Iseraylri makanaelre pasusu ku drekase ki Tamatama ki Musi si Arungu ku kakudhane. 51Ku Tamatama la pikai kwini ki vai sangiluku ki lazuku ki swa Iseraylri katwase Izipiti.

Currently Selected:

Takatwasane Izipiti 12: NDV

Highlight

Copy

Compare