Takatwasane Izipiti 10
10
(Mwasaka valru) Apapawku
1Sakabilrilanenga, ku Tamatama la kawriva ki Musi iya kai, “Kusu lu mwa kikawriva ki talialalai ki swa Izipiti. Lri pakakawlukulaku ki takidremedremaneini si lasasiakawluini, pakai ku apangimianeli ku pinangu Twaumasane ka puku ikai liniane, 2la mialria malra si pelaela ki lamwabaibalrithi muswane, sa pangimiaku ku pinangu Twaumasane ka puku, ku tapangimianeli la kai maka tumanenga ku swa Izipiti, ku lrika athingalane lini makanaelre ala ka Tamatamaku.”
3Ku Musi si Arungu la mwa kikawriva ki talialalai ki swa Izipiti, iya kai iniane, “Ku Tamatama ka Twaumase ki swa Hiburu amia kai, ‘Lri pakelasu lwigane ala maka ngitatualebe icucubungu nakwane? Si pakatwasa ki kawkawluli, lani maka mwa si sukubu nakwane. 4Lwiyasi la tusakamiasu kai tarumara, lwiya lri pakainganadhaku ki laapapawku mwa ki kunisu. 5Ku kalrane lini lri maka kabungu palraelre ki kuni, si kai maka drelenga ku laumawmase ki cakena daedae. Kudra kai kiapakalisi ki kananu, adravane ka tedrane ka laangatu, lri makitu kikane ki apapawku demedemenga. 6Lri sueteane ikai ki daanesu si ladaane ki sasiakawlusu si mapapangale. Kudra matiukuludrane ku tangimiamiane kaika dreleana ki lacucungulanesu.’ ” Ku Musi sa maka kawrivanga kikai vaga, la ngibangulu; si twalai ki talialalai mulatadre.
7Ku sasiakawlu ki talialalai la kawriva ki talialalai, “Kikai umawmase kai lrika thaininwana ku apakwalriane mitane? Ala pakatwasanga ki swa Iseraylri, lani mwa sukubu ki Tamatama ka Twaumase lini. Laibekace kaisu thingale kai swa Izipiti kalri padalrunga si kamudu?”
8Ku talialalai la dawlu ki Musi si Arungu, la iya kai liniane, “Lri pakatwasaku numiane mwa sukubu ki Tamatama ka Twaumase numi, ai laka laaneane kwini lri mwa?”
9Ku Musi la tubalre, “Lri makanaelre nai mwa, paelre ki tarudrawdrange, lavavalake. Lalri makitu iluku nai ki lalalake nai si lalwange lakiu, asi lwiyane kwini lri tara ikai nai kwini tulrisisi, si sukubu ki Tamatama nai.”
10Ku talialalai la kawriva, “Lri kiketeketaku ki Tamatama numi, kainaku lri palraingi muswane lutuumane pailuku ki lalabaibai numi si lalalake numi! Kikai yai kailri baebalre? 11Ini! Lwiyasi lri mwa numi sukubu ki Tamatama, palraingaku lu iluku numi ki lasawvalai katwase sikakathane.” Sa maka kawrivanga, la pwa pakatwase ki Musi si Arungu pulatadre.
12Ala ku Tamatama la iya kai ki Musi, “Cilika kwini alrimasu, lri pakelaku ki apapawku sueete alraelre ki kuni; lri kane demedeme sanaka wacebecebe ikai kadaengane, kudra kaika pakalisi ki kananu lri malra kane demedeme.” 13Ku Musi la ciliki ku ukudruini; ku Tamatama la pavalrigi twalai talrawane, ikai daedae valrigi makavale ku vaiyane si awngane, sakelanga ki mialrealre, la mailuku ku apapawku. 14Matwakwakudha ku tairubwane ngipapalai kela, si sueteane ki kuni. Kikai kalrane ki apapawku kadrwana ku miyaiya lalri kai ikainga ku bibilrili. 15Wamwanga kabungu ki kadaengane; la kirimunga kadradrimiti cakena. La malra kwini kaika pakalisi ki kananu ku lawacebecebe demedemenga kane, adravane ka lamadru ki angatu la mialri kane nguelre. Ikai Izipiti kai adrelanenga ka natikianenga ku masalese.
16Ku talialalai la dawlu ki Musi si Arungu, iya kai, “Pasalrivaku ki Tamatama ka Twaumase numi; la mialriaku pasalriu numiane. 17Kikai ala paceepaili, la kitubi ki Tamatama ka Twaumase numi, lani mwalra kikai sapapacai turamuru ka sapathavungane.” 18Ku Musi la katwasenga ki talialalai, si katwase kitubi ki Tamatama. 19Ku Tamatama la malra kwini singi talrawane ka saseverane pakabalrithi kaamani kudra makecenge ka singi sapakalriwgu ka valrigi, la malra bawbalrulu ki laapapawku, si papia ki laveke Suize#10.19 “laveke Suize” dreela ki 13.18 ku tapelaelane lalrwai.. Ikai Izipiti palraelre laka kadruanga ku laapapawku. 20Ai ku Tamatama pakakawlukuluana kwini takidremedremane ki talialalai, la kaiyana pakatwase ki mapapangale ki swa Iseraylri.
(Mwasaka bangate) Dradrimitane
21Ku Tamatama la iya kai ki Musi, “Papia belenge ciliki kwini alrimasu, ku dradrimitane lri kabungu ki kuni ki swa Izipiti palraelre.” 22Ku Musi la papia belenge ciliki ku alrimaini, ku makuceege ku dradrimitane la kabungu ki kuni maka tulrululringa. 23Ku swa Izipiti ku laumawmase la kai maka pikakwa madredrele, kadrwa kunatangeanga ku maka mwalatadre ki daane lini; ai ku taikaiyane ki swa Iseraylri yakaai ku ledra.
24Ku talialalai la dawlu ki Musi, iya kai, “Kunumi lu mwa sukubu ki Tamatama numi! Adravane ka labaibai, ka lavavalake lri maka mwa; ai ku lalwange lakiu numi lri tara asuru ikai kai.”
25Ku Musi la tubalre, “Ini! Lri tara baaisu naiane ku lrika sapatarumarane si Lama ka lrisi ku nilapulapwane, la nai maka patarumara ki Tamatama ka Twaumase nai. 26Lri iluku nai nguelre kai lanilapulapwane, kadrwa ku navaevanga ku lri asuru. Lri tara ngikakamani nai ngipapilri ku nilapulapwane ku sasukubane nai ki Tamatama. Lu kai nai mwana kavai, kai nai wathingale lulri arakai nai ku manemanane ku nilapulapwane patarumara ki Tamatama ka Twaumase nai.”
27Ku Tamatama la pakakawlukulu ku takidremedremane ki talialalai ki swa Izipiti, ka sakamiana kai pakatwase ki swa Iseraylri. 28Ku talialalai la iya kai ki Musi, “Katwasa! Kusu maadha kidredrelenga nakwane. Ku tadrelanengali muswane, lri kaisu udripinga!”
29Ku Musi la iya kai, “Ku taiyanesu pacengecenge tenganesu ka kai lri drelenga nakwane.”
Currently Selected:
Takatwasane Izipiti 10: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
