JEREMIAH 1
1
Jeremiah
1Surat ati inŭh pasar kayuh adi dog nang Jeremiah anak Hilkiah, ndi naan so imam imam di kupo Anathoth darŭm utung tarun tana Benjamin. 2 TUHAN minyu di Jeremiah darŭm sawa adi simŭng taruh Josiah anak Amon jadi raja di Judah, 3 ka Ayŭh minyu ngga ayŭh dinge kan Jehoiakim jadi raja. Ripas anŭ, TUHAN ari minyu ngga ayŭh, ndŭg sawa adi simŭng ndi darŭm pinyipritah Zedekiah anak Josiah. Darŭm buran adi rimŭh sawa anŭ daya Jerusalem dog taran ka rais tami.
Jeremiah dog Bagan
4TUHAN nang di aku, 5“Sibayuh Aku napa kuu darŭm tain sindŭ mu, ka sibayuh kuu dog biranak, Aku mbŭh mien kuu ka tijuan kuu bada jadi nabi yŭn bangsa bangsa.”
6Aku nam, “TUHAN Raja, aku dŭh pandai minyu; Aku gibabŭ mara.”
7Pak TUHAN nang di aku, “Dŭhnyah nang adŭp mu gibabŭ mara, pak di adŭ ka yŭn daya adi Aku bada kuu tudu, ka kidaan di ngara sopŭrŭg kayuh adi Aku bada kuu kidaan. 8Dŭhnyah taru ngara, amai Aku re agi ngga kuu ka grindung kuu. Aku, adi TUHAN, mbŭh minyu!”
9Komŭnŭ TUHAN ton tangan-I, tama bibis ku, ka nang di aku, “Dingah, Aku nggen di kuu buwa pinganang adi kuu re nang. 10Andu ati Aku nggen di kuu kuasa di tunduh bangsa bangsa ka pritah ngga dimbut ka pirabu-i, ngga pirabur ka pitumbang-i, ngga pijog ka purun-i.”
Keya ka darŭm Pŭmŭh Kiris Kayuh
11TUHAN siken aku, “Jeremiah, ani kiris mu?”
Aku nam, “Ndi daan tŭngŭn kayuh almond.”
12“Batur,” TUHAN nang, “ka Aku bijaga an kiris pinganang Ku jadi bitŭtŭk.”
13Komŭnŭ TUHAN minyu di aku dinge. “Ani dinge kiris mu?” Ayŭh siken.
Aku nam, “Aku kiris ndi priok nyigurak di utara, ka-i mbŭh re tumbang ka parad ati.”
14Ayŭh nang di aku, “Pinyirusag re babas so utara nyatŭk sopŭrŭg adi rŭŭ di tarun tana ati, 15sabab Aku bagan sopŭrŭg bangsa di utara bada mandŭg. Raja raja ngara re pijog takta takta ngara di tiban-bās Jerusalem ka maning sindung-i, ka maning kupo kupo Judah adi bŭkŭn. 16Aku re ngukum daya Ku sabab ngara mbŭh bidosa; ngara mbŭh tagan Aku, mbŭh jugan sadis sadis ka tapa bŭkŭn, ka mbŭh ndai tibudo ka nyambah-i. 17Sidia adŭp mu, Jeremiah; panu di kidaan di ngara sopŭrŭg kayuh adi Aku pesan di kuu bada nang. Dŭhnyah taru ngara madin, te Aku bada kuu rabis taru kan kuu mbŭh situra jawin ngga ngara rai-i. 18-19Dingah, Jeremiah! Barang naan di tarun tana ati — raja raja Judah, bara pinurung pritah, bara imam, ka bara daya — re rawan kuu. Andu ati, Aku nggen di kuu pinyibake ngga rawan ngara; kuu re keya ka kupo adi bikuta, keya ka tiang basi, keya ka sindung timaga. Ngara dŭh re ngarah kuu, amai Aku agi ngga kuu ka grindung kuu. Aku, adi TUHAN, mbŭh minyu.”
Currently Selected:
JEREMIAH 1: TBVONT
Highlight
Share
Copy
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.