Apokaliipsis 5

Uvaʼs tilt Xhun uvaʼ, aʼ quBʼaal Jesuus uvaʼ ech tilix, eche chelem karneʼl, salpun u uʼ uvaʼ atich ok tiqʼabʼ quBʼaal Tiuxh

1Yaʼne vil val u uʼ uvaʼ bʼalqʼumiche. Tul atich ok tiqʼabʼ quBʼaal Tiuxh, uvaʼ kʼuqlich tu kʼuqeʼvbʼal tetz tiqleʼm. Aʼ atich ok u uʼ tisebʼal. Tzʼibʼamich tuul u uʼ; atz tzʼibʼamich u tiʼ inpaqte. Tul bʼeenoxh jupich vitziʼ u uʼ taʼn juqvaʼl lakʼubʼal.#Esekieel 2.9-10

2Yaʼne vil val u aanxel uvaʼ sibʼichxh iyakʼil. Tul jankʼalxh tiʼ iqul u aanxel sichʼin tiʼ talax inuqul. Tul ech tal s-eche: —¿Jaʼletze uvaʼ at tiqleʼm, tul laʼ oleʼv tiʼ itzʼolox el inqʼa lakʼubʼ tetz u uʼ, tul laʼ isalpu? —xeʼt isichʼineʼ.

3Tul yeʼxhabʼil invaʼq viinqixsaʼm txheji uvaʼ atich tiqleʼm tiʼ isalpul u uʼ, atz kʼuxh tilix kuxh inqʼa tzʼibʼ s-tuul. Tan jitoq inqʼa aanxel tu amlikaʼ; atz jitoq inqʼa xaol vatz u txʼavaʼ; atz jitoq inqʼa at jaqʼ u txʼavaʼ, oleʼv tiʼ isalpul u uʼ. 4Yaʼne mam oqʼel nikich inbʼan veteʼ. Tan yeʼxhabʼil invaʼq txheji uvaʼ atich tiqleʼm tiʼ isaqil u uʼ; atz laʼich isalpu; atz laʼich isikʼle.

5Yaʼne ech tal vet vaʼl u iqʼon iviʼ s-ve s-eche: —Yeʼ kuxh oqʼ vet axh. Tan at invaʼl uvaʼ at tiqleʼm toq eesan el juqvaʼl u lakʼubʼ tetz u uʼ. Tul toq isalpu. Aʼe val u tij imam Judaa, uvaʼ ‹Bʼalam, ixaʼnil Judaa,› chich eʼli. Aʼe u Tij Imam Daviid, uvaʼ oleʼvnaʼq vet tiʼ tel iqʼij jankʼal inqʼa yeʼbʼaʼn, inqʼa tetz Satanaas. Aʼetz uvaʼe, at tiqleʼm tiʼ teesal el juqvaʼl u lakʼubʼ tetz u uʼ. Tul toq isalpu, —xeʼt s-ve.{*}#5.5 Jeenesis 49.9-10. ¿Kam talax u yol?: —Bʼalam, ixaʼnil Judaa, —nik tal u iqʼon iviʼ te Xhun. Aʼ nik tiqʼo tzaan u iqʼon iviʼ inqʼa yol uvaʼ tal ka Jakoov tiibʼa inqʼa ikʼaol s-naʼya. Aʼetz Judaa aqʼax ka u yol s-tiibʼa tiʼ tok siqʼesalil tiibʼa inqʼa titzʼin. Tul alaxat ka tiibʼa Judaa, tiʼ uvaʼ yeʼlich vibʼaara u tij imam Judaa laʼich taqʼka. Pet aʼ u tij imam Judaa laʼich bʼanon iqʼesalil s-bʼenamen. Tzitzietz xeʼtik vet inqʼa tij imam Israeel tiʼ talax u yol uvaʼ tetxhal aʼ laʼich txhejk vaʼl iqʼesal s-xoʼl inqʼa tij imam Judaa. Pet kaʼvaʼl nik ex elkaʼp u yol uvaʼ alax ka tiibʼa Judaa. Tan txhej vet vaʼl iqʼesal xoʼl inqʼa tij imam Judaa; aʼe Daviid. Yaʼne xamtel ex txheoq vaʼt iqʼesal tiʼ Daviid, aʼetz vete u Mesiias. Tan ‹Mesiias,› chich tu yolbʼal evreeo. Pet ‹Χριστοῦ› ‹Kriisto,› chich tu yolbʼal grieego. Tul kam uvaʼ ibʼant Judaa viqʼesalil, tul ech uvaʼe laʼich ul ibʼant u Mesiias viqʼesalil s-xoʼl.

6Tul vil veteʼ uvaʼ txaklich vet JesuKriisto tinikʼa tal uvaʼ kʼuqlich quBʼaal Tiuxh, atz tal uvaʼ atich kajvaʼl inqʼa itzʼlich viinqixsaʼm, atz tal uvaʼ atich vinaq kajvaʼl inqʼa iqʼon iviʼ. Tul echich tilix JesuKriisto, eche vaʼq chelem karneʼl, uvaʼ maʼt iyatzʼax veteʼ. Tul juqvaʼlenich itukʼ; atz juqvaʼlenich bʼaqʼ ivatz, aʼaqetze juqvaʼl vitxumbʼal quBʼaal Tiuxh, uvaʼ nik til koʼp u vatz txʼavaʼ s-kaqaayil.{*}#5.6 ¿Kam s-tiʼil uvaʼ ech ikʼutxht tibʼ quBʼaal Jesuus, eche vaʼq chelem karneʼl? Aʼetz talaxe uvaʼ ech vete iyatzʼax karneʼl ulbʼel quBʼaal Jesuus tiʼ itxhoox inqʼa paʼv. Eche uvaʼ ibʼaxabʼsa Isaiias talaxeʼ tiʼ kam laʼich ulbʼel u Kriisto uvaʼs laʼich tuleʼ, ech uvaʼe nik tal tu Isaiias 53.3-7. Aʼetz uvaʼe, tul quBʼaal Jesuus s-bʼaxa. Pet vet uvaʼs toq tul quBʼaal Jesuus ikaʼpaq, tan tuchʼ vet mam yakʼil toq ul ka. Tan yexhabʼil vet vaʼq laʼ oleʼv s-tiʼ. Tan aʼetz nik ex elkaʼpe tiʼ u ‹Bʼalam,› eche uvaʼ nik tal t-invaʼt u versiikulo s-tiibʼa. Tul antxh nik ex elkaʼp juqvaʼl inqʼa tukʼe uvaʼ nik tal tzitza, tiʼ uvaʼ sibʼ iyakʼil. Tan yeʼxhabʼil vet ech iyakʼil, eche quBʼaal Jesuus laʼ ibʼana. Atz taʼn kuxh vet quBʼaal Jesuus palnaʼq iyakʼil tiibʼa inqʼa nik txhʼaʼoin, atz tiibʼa kaqaayil iqʼesal. Pet juqvaʼl inqʼa bʼaqʼ ivatz, tan aʼe, uvaʼ jankʼal s-kaqaayil nik tileʼ, eche uvaʼ nik tal tu Sakariias 4.10. Pet juqvaʼl inqʼa itxumbʼal quBʼaal Tiuxh, tan ile nik ex tal inuqul tu noota tu Apokaliipsis 1.4. 7Yaʼne ijetxh vet ok tibʼ JesuKriisto kʼatz quBʼaal Tiuxh, uvaʼ kʼuqlich tu kʼuqeʼvbʼal. Tul ikʼul vet u uʼ tiqʼabʼ quBʼaal Tiuxh, t-visebʼal.

8Ikʼuletz kuxh vet JesuKriisto u uʼ, JesuKriisto uvaʼ echich tilix, eche chelem karneʼl, tul motx ijoqbʼa vet kuʼ tibʼ inqʼa itzʼlichla viinqixsaʼm vatz JesuKriisto. Tul bʼitzaq veteʼ. Tul echat kuxh ibʼane vinaq kajvaʼt inqʼa iqʼon iviʼ. Tan motx iqajbʼa tibʼ tiʼ ibʼitzleleʼ. Poro ayaʼletz inqʼae iqʼomalich iaarpa taʼn. Atz ayaʼl inqʼae iqʼomalich ikoopa taʼn uvaʼ ooroxhtuʼ. Tul nojnaʼqichaqxh inqʼa ikoopa taʼn insieenso, aʼetze vinatxhkʼuulan inqʼa niman tetz quBʼaal Tiuxh. 9Tul ech val u akʼla bʼitz nikichaq motx ibʼitzle s-eche:

—Akʼulelxhtuʼ uvaʼ laʼ akʼul u uʼ. Atz akʼulelxhtuʼ uvaʼ laʼ eesa el inqʼa lakʼubʼ tetz u uʼ. Tan aʼ axhe, uvaʼ aqʼel vet eebʼ kamoq s-qiʼ. Tul tuchʼ vakaqal qat atxhojvat inqʼa qupaʼv tiʼ qok s-tetz quBʼaal Tiuxh. Tul qat atxhoj ipaʼv jankʼal inqʼa xaol, kamxh ixaʼnilil, atz jankʼal inqʼa kamxh yolbʼalil nik iyolbʼe, atz jankʼalxh xaol, kʼuxh kamxh xaolil, atz jankʼal inqʼa mam tenam s-kaqaayil. 10Tul qat ibʼanbʼe oʼ quBʼaal Tiuxh tiʼ ibʼanax mam iqʼesalil s-kʼatza. Tul qat taqʼ bʼen oʼ quBʼaal Tiuxh uvaʼ junt laʼ qoksa vet quyol s-vatz. Echetz laʼ qubʼant iqʼesalile vatz u txʼavaʼ, —chichichaq ibʼitzlet u akʼla bʼitz.

11Yaʼne vil mamala aanxel. Tul vabʼi iyolon tiʼeʼl u kʼuqeʼvbʼal tal uvaʼ kʼuqlich quBʼaal Tiuxh, atz tiʼeʼl kajvaʼl inqʼa itzʼlich viinqixsaʼm, atz tiʼeʼl vinaq kajvaʼl inqʼa iqʼon iviʼ. Tul vila uvaʼ sibʼichxh inqʼa aanxel; atz tira yeʼlich s-atxhel. 12Tul jankʼalxh tiʼ iqul inqʼa aanxel nikich motx isichʼineʼ. Tul echaq nikich motx tal s-eche:

—¡U JesuKriisto, uvaʼ ech tilix, eche chelem karneʼl, uvaʼ maʼt iyatzʼax el, tan ikʼulelxhtuʼ uvaʼ at tiqleʼm tiibʼa jankʼal s-kaqaayil, atz tiibʼa jankʼal mam txʼijbʼal iqʼij, atz tiibʼa jankʼal sibʼ itxumbʼal, atz tiibʼa jankʼal sibʼ iyakʼil! Tan aʼe, uvaʼ laʼ oksal iqʼij taʼn jankʼal inqʼa viinqixsaʼm; atz laʼ aqʼax bʼen s-nim taʼn, tul laʼ natxhkʼuulal taʼn, —chichich inqʼa aanxel.

13Yaʼne vabʼi iyolon jankʼal inqʼa motx iviinqixsa ka quBʼaal Tiuxh, inqʼa at tu amlikaʼ tuchʼ inqʼa at vatz u txʼavaʼ tuchʼ inqʼa jaqʼ u txʼavaʼ, atz tuchʼat inqʼa at tuul u maar. Tul ech motx tal s-eche: —Qunatxhkʼuula Tiuxh, uvaʼ kʼuqlel tu kʼuqeʼvbʼal tetz iqleʼm. Atz qunatxhkʼuula JesuKriisto, uvaʼ ech tilix, eche chelem karneʼl. Tul laʼ aqʼax bʼen s-nim. Tul laʼ oksal iqʼij. Tul niimxh tatin bʼenamen. Tul at tiqleʼm tiibʼa jankʼal s-kaqaayil s-txheel, atz tinjattant inqʼa yaʼbʼ uvaʼ bʼenaʼl kuxh ibʼen toq tuleʼ, —chichichaqe.

14Tul ech nikich tal kajvaʼl inqʼa itzʼlich viinqixsaʼm s-eche: —Echxh laʼ ibʼane, —chichichaqe. Tul motx ijoqbʼa vet kuʼ tibʼ vinaq kajvaʼl inqʼa iqʼon iviʼ tetxhal ikoʼp ivatz t-txʼavaʼ tiʼ inatxhkʼuulal Tiuxh, atz tiʼ inatxhkʼuulal u quBʼaal JesuKriisto uvaʼ itzʼlel s-txheel, atz tinjattant inqʼa yaʼbʼ uvaʼ bʼenaʼl kuxh ibʼen toq tuleʼ.

Currently Selected:

Apokaliipsis 5: ixlC

Highlight

Copy

Compare