Santiaago 5

Uvaʼs iyaon Santiaago tiʼ inqʼa txʼiol iqʼij, inqʼa jitich niman tetz Jesuus

1Pet abʼivaqetza kam uvaʼ toq valeʼ, ex inqʼa txʼiol iqʼij. Oqʼoqvaq ex; atz jiqʼjoʼlanoq ex, tan il val u txumlebʼal tul setiibʼa tiʼ inqʼa kantxhaq uvaʼ nik ebʼaneʼ. 2Tan tira yeʼxhkam tiqleʼm inqʼa txʼijbʼal eqʼij vatz quBʼaal Tiuxh, tan ech kuxh inqʼa txʼijbʼal eqʼij, eche invaʼq u kam uvaʼ qʼajnaʼql veteʼ. Atz kʼuxh inqʼa bʼaʼnla txhaq oksaʼm, inqʼa nik motx etoksa, tan ech kuxh bʼanel taʼn vatz quBʼaal Tiuxh, eche invaʼq u kam uvaʼ bʼeeno vet kʼuxel taʼn pokʼ. Tan toq sotzoq. 3Atz kʼuxh inqʼa epuaq uvaʼ ooroxhtuʼ, atz inqʼa plaataxhtuʼ, tan ech kuxh bʼanel taʼn vatz quBʼaal Tiuxh, eche invaʼq u kam uvaʼ tira txhukʼumal vet ivatz. Tan aʼetz uvaʼs laʼ taqʼt kuʼ quBʼaal Tiuxh inqʼa yol tinuqul, tul aʼ vet inqʼa txʼijbʼal eqʼij laʼ kʼutxhun uvaʼ ex ixpit. Tan aʼ kuxh vetetz qat esaʼa. Echetz laʼ ekʼaxbʼ taʼn quBʼaal Tiuxh, eche itzʼeʼ invaʼq kam taʼn xamal. Tan aʼ kuxh u txʼijbʼal eqʼij sejunal nik motx etin imoloxeʼ, tul kʼuxh il vet oʼ t-vimotxebʼal qʼij saq setuchʼ.

4Pet itzʼavaq etibʼ tiʼ inqʼa kantxhaqe uvaʼ nik motx ebʼaneʼ. Tan yeʼl inqʼa etaqʼonvil motx etxhoja uvaʼs motx taqʼonv xoʼl inqʼa etxhiko. Iletz inqʼa aqʼonvil nik motx isichʼin tuchʼ txumuʼm. Toqetz vaqʼ etootzaqi, ex txʼiol iqʼij, uvaʼ il visichʼin inqʼa etaqʼonvil nik tabʼi quBʼaal Tiuxh, u quBʼaal Tiuxh uvaʼ yeʼxhkam invaʼq tzaʼl ibʼanax s-vatz.

5Tan tuulbʼal vetatin vatz txʼavaʼ, tul aʼ kuxh bʼeny ekʼuul tiʼ inqʼa bʼaʼnla txhaq kam uvaʼ at sexeʼ. Tul mam yol etatin sevatz tuchʼ jankʼal inqʼae nik enatxheʼ. Tul tira yeʼ nik ibʼen sete, atz aʼl nik emolt epaʼv vatz quBʼaal Tiuxh. Tul topoon vaʼl qʼij uvaʼ toq aqʼaxoq kuʼ yol tinuqul setiʼ, eche vaʼq vaʼk uvaʼ nik topoon vet itzaqʼeʼ, tul yek vet yatzʼpoq. 6Tan aʼ qat motx etulbʼe tzaqatz jikla xaol uvaʼ aʼl qat motx exotxhtaʼ, tetxhal ijaʼp yol s-tiibʼa, atz tetxhal iyatzʼax el. Tul jitoq qat motx tetxha ok tibʼ sekʼatza tiʼ ikolt tibʼ, pet qat kuxh itxʼaqmii teqʼabʼ.

Uvaʼs talt Santiaago uvaʼ laʼ motx ikotxʼ inqʼa niman tetz Jesuus ivatz vatz inqʼa itzaʼlal, tul laʼ motx inatxh Tiuxh

7Pet toq val sete, ex inqʼa inmol s-niman tetz Jesuus, kotxʼvaq evatz kʼuxh laʼ motx kʼaxbʼ ex taʼn inqʼa txʼiol iqʼij. Tan tetxhal etxʼebʼt tul u quBʼaal Jesuus. Aloq bʼenoq kuxh sete, eche uvaʼ nik ibʼan u aqʼonvil tiʼ itxʼebʼex teluʼl u bʼaʼnla ivatz itxhiko uvaʼ nik ibʼan vatz u txʼavaʼ. Tan nik kuxh itxʼaqmii tul u jabʼal uvaʼs nik tavat vitxhiko, atz ichʼij vet vitxhiko taʼn u jabʼal xamtel.

8Echatetz uvaʼe ebʼana. Kotxʼvaq evatz, atz nuq txakloq etaanima tiʼ u quBʼaal Tiuxh. Tan il u tulebʼal u quBʼaal Jesuus naql veteʼ.

9Tul toq val sete, ex inqʼa inmol s-niman tetz Jesuus, uvaʼ yeʼ laʼ motx teesa tibʼ eqʼij sevatzaq, echetz yeʼ laʼ ijaʼp u yole setiibʼa taʼn quBʼaal Tiuxh. Tan il u quBʼaal Tiuxh, u aqʼol kuʼ yol tinuqul, ile naql vet u tulebʼal, eche itxakeʼv vet invaʼq xaol vatz jubʼal.

10Tul toq val sete, inmol s-niman tetz Jesuus, eloq etetz te kam uvaʼ nikich ibʼan inqʼa qʼexsanich tetz viyol quBʼaal Tiuxh s-naʼya. Tan motx ikotxʼ ivatz kʼuxh bʼeenoxh motx ikʼaxbʼ tiʼ talax inqʼa yol uvaʼ nikich itxhaqax s-tiʼ taʼn quBʼaal Tiuxh.

11Tul abʼimal qaʼn uvaʼ at vibʼaʼnil quBʼaal Tiuxh tiibʼa inqʼa xaol, inqʼa yeʼ motx tanbʼan ikʼuqeʼv ikʼuul tiʼ quBʼaal Tiuxh kʼuxh nikich motx ikʼaxbʼeʼ. Atz abʼimalat etaʼn vikotxʼt Joov ivatz vatz inqʼa itzaʼlal. Tul ilel abʼimal etaʼn kam ex elkaʼp vet Joov taʼn quBʼaal Tiuxh s-xamtel. Tan sibʼxhte u txumu vatz, atz u oybʼabʼ vatz xeʼ u quBʼaal Tiuxh.

12Poro toq val vaʼt u yol sete, ex inqʼa inmol s-niman tetz Jesuus, uvaʼ tira yeʼl invaʼq kam laʼ etiqʼo tzaan s-tuul tiʼ enimat invaʼq veyol viʼ jankʼal inqʼa kam inqʼaa: Jitoq laʼ etiqʼo tzaan u amlikaʼ tiʼ enimat invaʼq veyol; atz jitoq u txʼavaʼ; atz jitoq kuxh ibʼij invaʼtoʼq kam. Pet oq: —Laʼi, —chaq ex, tul laʼetza. Atzoq: —Yeʼle, —chaq ex, tul yeʼletza. Echetz yeʼ laʼ etaqʼt jaʼp u yole setiibʼa vatz quBʼaal Tiuxh.#Tio 23.16-22

Uvaʼs talt Santiaago uvaʼ laʼ inatxh inqʼa niman tetz Jesuus Tiuxh tuulbʼal inqʼa itzaʼlal uvaʼ nik motx palka

13Echetz oq at invaʼq emol sexoʼl uvaʼ nik ipal titzaʼlal, tul aʼ ibʼana uvaʼ inatxh Tiuxh. Atz oq at ex, uvaʼ chiibʼiy kuxh ex, tul bʼitzlevaq bʼitz tiʼ quBʼaal Tiuxh. 14Atz oq at invaʼq emol sexoʼl uvaʼ oybʼale, tul aʼ laʼ ibʼana uvaʼ laʼ isaʼ tzaan inqʼa iqʼon iviʼ sexoʼl, ex inqʼa niman tetz Jesuus. Tul laʼ inatxh Tiuxh tiʼ vemol uvaʼ oybʼale. Atz laʼ toksa aseeite tiʼ u yaabʼ tuchʼ ibʼij quBʼaal Jesuus. 15Tan jaʼl uvaʼ laʼ ikʼuqbʼa ikʼuul tiʼ quBʼaal Tiuxh, tul laʼ inatxht Tiuxh tiʼ invaʼq yaabʼ, tul laʼ tiqʼo tibʼ u yaabʼ taʼn quBʼaal Tiuxh. Oqetz paʼvinaʼql u yaabʼ, tul laʼ kuy sotzsal vet inqʼa ipaʼv taʼn quBʼaal Tiuxh.

16Oqetz uvaʼ jixel etibʼ s-yol, tul ijaqvaq tibʼ ekuya sevatzaqil. Tul natxhvaq Tiuxh setiʼ sevatzaqil, echetz laʼ motx ebʼant bʼaʼne. Tan at viyakʼil, atz nik taqʼ ivatz vinatxhon Tiuxh u xaol uvaʼ, aʼ u jik nik ibʼaneʼ.

17Jankʼal echiche u tatin Eliias, u qʼexsanich tetz viyol quBʼaal Tiuxh, tan echatich kuxh tatin Eliias s-xaolil, eche u qatineʼ. Poro ajt inatxh Eliias Tiuxh tuchʼxh ayaʼl taanima, tiʼ uvaʼ yeʼich laʼ kuʼ jabʼal, tul echxh ibʼane. Tan oxvaʼl yaʼbʼ tuchʼ vajqil ichʼ yeʼ kuʼ vet jabʼal vatz u txʼavaʼ. 18Poro ajtetz inatxh Eliias Tiuxh inpaqte, tiʼ uvaʼ laʼich kuʼ vet jabʼal, tul kuʼ vet jabʼal. Tul taqʼ vet inqʼa txhiko ivatz inpaqte vatz u txʼavaʼ.

19Echetze, inmol s-niman tetz Jesuus, oq at invaʼq emol sexoʼl uvaʼ qat tzʼeqxiy vet ka tiʼ iqeex inuqul viyolbʼal quBʼaal Tiuxh, tul aʼl bʼaʼn uvaʼ antxh invaʼq ex laʼ oleʼv ex tiʼ iqʼaʼvisal vemol inpaqte tiʼ tootzaqil vinuqul. 20Tan jaʼletz uvaʼ laʼ bʼokʼtziin vaʼq xaol uvaʼ nik iqʼaʼv tiʼ ibʼanax u paʼv, aʼetze nik eesan u xaol uvaʼe vatz kamchil. Tan laʼ oleʼv tiʼ iqʼaʼvisal u xaol kʼatz quBʼaal Tiuxh, u xaol uvaʼ nik isotz ikʼuul taʼn u paʼv. Tul laʼ ilotxh u aj paʼvom tiʼ ikuyux vipaʼv taʼn quBʼaal Tiuxh.#Proveervios 10.12

Currently Selected:

Santiaago 5: ixlC

Highlight

Copy

Compare