1 Luʼ ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
1 LUʼ
Uvaʼs toq qootzaqitaʼ jaʼl tzʼibʼan u uʼ 1 Luʼ
Aʼetz u uʼe uvaʼ 1 Luʼ ibʼij, tan apoostol Luʼ tzʼibʼan. Tan antxh u uʼ nik alon uvaʼ apoostol Luʼ tzʼibʼan. Ech uvaʼe nik tal tu 1 Luʼ 1.1. Tul aʼ Luʼe uvaʼ taj yolich quBʼaal Jesuus, atz lotxholich tetz quBʼaal Jesuus. Aʼe vaʼl uvaʼ xoʼl oxvaʼl inqʼa tira atich tatin vatz quBʼaal Jesuus, inqʼa tiqʼo quBʼaal Jesuus s-tiʼ, tiʼ tilix kame jolol inqʼa kaebʼal aanima ibʼan quBʼaal Jesuus. Tan taʼnxh oxvaʼl inqʼae ilon titzʼeʼv vimeʼal Jaairo. Atz taʼnxh oxvaʼl ilon vijalp ikaʼy quBʼaal Jesuus viʼ u vitz uvaʼs iyolon quBʼaal Jesuus tuchʼ Moisees tuchʼ Eliias. Tan antxh inqʼa bʼaxa niman tetz Jesuus motx alon tiʼ Luʼ uvaʼ Luʼ tzʼibʼan u uʼ uvaʼe. Tul yeʼl invaʼq yol nikich itxhej xoʼl inqʼa niman tetz Jesuus, tiʼ uvaʼ jit koq Luʼ tzʼibʼan. Pet taʼnxh Luʼ nik ikʼul tibʼ yol s-tiʼ uvaʼ Luʼ tzʼibʼan u uʼ 1 Luʼ.
Aʼetz nik bʼensan s-qe uvaʼ atoʼk u uʼ 1 Luʼ xoʼl inqʼa uʼ tiʼ viyolbʼal quBʼaal Tiuxh, tan yeʼxhkam invaʼq nik motx tal inqʼa bʼaxa niman tetz Jesuus s-tiʼ. Antetzxh u uʼ 1 Luʼ nik alon uvaʼ tootzaqichxh Luʼ vitxhusun Jesuus, atz u qʼij isaq Jesuus. Tul at kaʼl viyol Luʼ uvaʼ tal xoʼl inqʼa xaol tu tenam Jerusaleen uvaʼ nik tal t-Vibʼanoʼm inqʼa Apoostol 4.10-11. Nik ibʼan eela tuchʼ viyol Luʼ uvaʼ nik tal t-1 Luʼ 2.7-8.
Uvaʼs toq qootzaqitaʼ kam s-tuul tzʼibʼal u uʼ 1 Luʼ
Niketz tal u uʼ 1 Luʼ uvaʼ, aʼ tzʼibʼalik tu tenam Vaviloonia. Pet kamal at oʼ laʼ itzʼan uvaʼ, aʼ u tenam Vaviloonia uvaʼ atich tuulbʼal Mesopotaamia nik taleʼ. Yeʼletza. Tan yeʼl paoq ex Luʼ tzitzi t-Vaviloonia. Tul yeʼxh tal nik leqtxhik tuul u uʼ uvaʼ atich koq joloq niman tetz Jesuus jeqlich t-Vaviloonia. Pet nimalenetz inqʼa txhʼotin tetz inqʼa iyolbʼal quBʼaal Tiuxh nik alon uvaʼ jitxh aʼ u tenam Vaviloonia nik tal Luʼ tuul u tuʼ. Pet aʼ nik tal Luʼ s-‹Vaviloonia› u mam tenam Rooma. Tan echich kuxh vete tok kaʼv ibʼij u tenam Rooma tok u bʼij Vaviloonia s-tiʼ, tiʼ uvaʼ tan, nikich motx tojqeʼlal inqʼa niman tetz Jesuus tuchʼ inqʼa tij imam Israeel taʼn inqʼa iqʼesal tu mam tenam Rooma.
Aʼetz itzʼibʼal u uʼ 1 Luʼ tuulbʼal u yaʼbʼ oʼvaʼl imutxʼ (65) m.t.J. Niketz iyolbʼe Luʼ bʼiil tiʼ tojqeʼlal inqʼa niman tetz Jesuus. Kamaletz aʼ nik tal Luʼ uvaʼs ipal inqʼa niman tetz Jesuus titzaʼlal taʼn Neroon, u mam iqʼesal tu mam tenam Rooma, tu yaʼbʼ kajlaval toxkʼal tetxhal topoon tu vajxaqil imutxʼ (54-68) m.t.J. Tul nikich tal tibʼ Neroon s-tiuxh. Echetz tetxhal nikich inatxhkʼuulal u mam iqʼesal taʼn inqʼa xaol. Tul ibʼan Neroon vaʼl uʼ tiʼ teesal tzaan inqʼa tij imam Israeel tu mam tenam Rooma, atz tiʼ teesal tzaan inqʼa tij imam Israeel tuulbʼal Itaalia. Tul ibʼekʼ Neroon ibʼen inqʼa niman tetz Jesuus s-pereexhoil. Xaʼtetze aʼxh nik tal inqʼa uʼ tiʼ vikotxʼt inqʼa niman tetz Jesuus ivatz t-inqʼa itzaʼlal. Tan tal Luʼ tuchʼ Paʼp, atz tuchʼ Santiaago tuul inqʼa tuʼ uvaʼ laʼ motx ikotxʼ inqʼa niman tetz Jesuus ivatz t-inqʼa itzaʼlal. Tan mamala bʼekʼoʼm ibʼan Neroon tiʼ ikʼaxbʼisal inqʼa niman tetz Jesuus. Tan antxh Neroon bʼekʼon iyatzʼax el Luʼ tu yaʼbʼ juqvaʼl imutxʼ (67) m.t.J.
Uvaʼs toq qootzaqitaʼ kame u taqʼil vitxhusun Luʼ tuul u tuʼ 1 Luʼ
Aʼetz u taqʼil viyol Luʼ uvaʼ itzʼibʼa te inqʼa niman tetz Jesuus, tiʼ nima vatzul inqʼa bʼaʼnla txhaq txumbʼal. Aʼetz vixeʼal uvaʼ ech nik tal s-eche: —Jankʼal ex, uvaʼ at vaanima setiʼ, ex inqʼa jit ex aj etz vatz txʼavaʼ, atz ex inqʼa at kuxh ok ex t-xajoʼm vatz txʼavaʼ, niketz inbʼan yaʼl tiʼ talax sete uvaʼ laʼ emaq etibʼ tiʼ ibʼanax inqʼa tatxhaʼv vetxhiʼoʼl. Tan aʼ nik isaʼ u tatxhaʼv vetxhiʼoʼl uvaʼ laʼ oleʼv setiʼ, tul laʼ taqʼ bʼen ex tu paʼv,... —xeʼt Luʼ.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ 1 Luʼ
U uʼ 1 Luʼ, tan oʼvaʼlen tanul elnaʼq inqʼa yol uvaʼ nik tal s-tuul.
1 Luʼ 1.1-2
Aʼetz ixeʼtebʼe Luʼ talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Luʼ bʼaʼnil ikʼuul inqʼa niman tetz Jesuus.
1. 1 Luʼ 1.3—2.10
U bʼaxa tanul yol, tan aʼ tal Luʼ tiʼ u talt te inqʼa niman tetz Jesuus uvaʼ junal chʼexichla txhaq xaol taʼn vibʼaʼnil quBʼaal Jesuus. Tul aʼxh mam bʼaʼnil toq til inqʼa niman tetz Jesuus, kʼuxh vatz txʼavaʼ, atz kʼuxh uvaʼs laʼ ibʼen vet tu amlikaʼ, kʼuxh nik motx ipal t-kalabʼaq itzaʼlal tiʼ tatinaq vatz u txʼavaʼ s-txheel. Tan yeʼlaq vet iyaʼebʼal imotxebʼal u qʼij isaq toq ibʼaneʼ. Echetz s-tiʼile tetxhal kuxh laʼ ijetxheʼl tibʼ inqʼa niman tetz Jesuus tiʼ yeʼ ibʼanax u paʼv. Tul jitetz vet eela itxumbʼal laʼ motx ibʼan tuchʼ inqʼa jit niman tetz Jesuus.
2. 1 Luʼ 2.11—3.22
Vikaʼv tanul yol, tan aʼ tal Luʼ, tiʼ uvaʼ kam laʼ motx ibʼan inqʼa niman tetz Jesuus tiʼ tatin s-vatzaq. Tan jit vet ech tatin echiche uvaʼs yeʼnaqich motx okoq s-niman tetz Jesuus. Tul tal Luʼ kam tatin inqʼa tzumela tuchʼ tixqel laʼ ibʼana, atz tuchʼ inqʼa initxaʼa.
3. 1 Luʼ 4.1-19
Vitoxv tanul yol, tan aʼ tal Luʼ, tiʼ uvaʼ laʼ ikotxʼ inqʼa niman tetz Jesuus ivatz t-inqʼa itzaʼlal. Tan antxh quBʼaal Tiuxh nik kuyun ipal t-inqʼa itzaʼlal tiʼ tiltaʼ oq uvaʼ kʼuqlelxh ikʼuul tiʼ quBʼaal Tiuxh. Tul laʼ kuxh motx chiibʼ tiʼ ipal t-inqʼa itzaʼlal, tiʼ uvaʼ echatxh ipal u quBʼaal Jesuuse t-inqʼa itzaʼlal. Oqetz uvaʼ laʼ motx ikotxʼ ivatz, tul echatxh laʼ motx ikʼult tiqleʼm, eche uvaʼ ikʼult u quBʼaal Jesuus u tiqleʼm. Echetz nik itzoqp u yol tal Luʼ s-eche: —Echetz aʼ nik elkaʼpun u yole tiʼ jankʼal ex, uvaʼ nik epal titzaʼlal uvaʼ quBʼaal Tiuxh nik kuyun epal s-tuul, tul aʼletz etoksat etibʼ vatz quBʼaal Tiuxh tuchʼ vetaanxelal, u quBʼaal uvaʼ kʼuqlebʼxh kʼuul, atz u viinqixsan tetz inqʼa kam s-kaqaayil. Tul yeʼ etanbʼa ibʼanax u bʼaʼn, —xeʼt Luʼ.
4. 1 Luʼ 5.1-7
Vikajv tanul yol, tan aʼ tal Luʼ, tiʼ uvaʼ itxhus Luʼ inqʼa iqʼon iviʼ tiʼ kam laʼ tule tatin xoʼl inqʼa niman tetz Jesuus. Tul kam laʼ motx tulbʼe inqʼa niman tetz Jesuus tatin tuchʼ inqʼa iqʼon iviʼ s-xoʼl.
5. 1 Luʼ 5.8-11
Vitoʼv tanul yol, tan aʼ tal Luʼ, tiʼ uvaʼ yeʼ laʼ itanbʼa inqʼa niman tetz Jesuus inatxhax Tiuxh. Tul yeʼ laʼ motx ikuy taqʼonv Satanaas s-kʼatza, tul eche txhʼaʼo laʼ motx ibʼan tuchʼ Satanaas.
1 Luʼ 5.12-14
Tiyaʼtebʼaletz vet viyol Luʼ, tul tal Luʼ uvaʼ, aʼ Silvaano laʼ iqʼon bʼen u uʼ xoʼl inqʼa niman tetz Jesuus.
Tul nikat tal Luʼ uvaʼ ant inqʼa niman tetz Jesuus, uvaʼ nikich ikʼul tibʼ tuchʼ Luʼ, aqʼon bʼen bʼaʼnil ikʼuul inqʼa nik kʼulun u uʼ. Tul nikat tal Luʼ uvaʼ ant Kuxh, u lotxhol tetz Luʼ, aqʼon bʼen bʼaʼnil ikʼuul inqʼa nik kʼulun u uʼ.
Nikat tal Luʼ uvaʼ een inqʼa nikich ikʼul tibʼ tuchʼ Luʼ tu tenam ‹Vaviloonia,› chiche. Pet eenich Luʼ tu tenam Rooma uvaʼs itzʼibʼat u uʼ. Poro yeʼetz vet nik tal Luʼ ibʼij u tenam s-Rooma, pet ‹Vaviloonia,› chich vet Luʼ s-tiʼ. ¿Kametz s-tiʼil nik tal Luʼ u mam tenam Rooma s-Vaviloonia? Tiʼ uvaʼ tan, nikich motx ikʼaxbʼisal inqʼa niman tetz Jesuus tu mam tenam Rooma, eche uvaʼ nikich ikʼaxbʼisal inqʼa tij imam Israeel tu tenam Vaviloonia s-naʼya.
Tul nikat taqʼ bʼen Luʼ bʼaʼnil tiʼ inqʼa niman tetz Jesuus, inqʼa nik kʼulun u tuʼ.
Currently Selected:
1 Luʼ ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.