1 Luʼ 5

Uvaʼs talt Luʼ te inqʼa iqʼon iviʼ uvaʼ jikxh laʼ motx tiqʼot iviʼ xoʼl inqʼa niman tetz Jesuus

1Toq inyaʼlu ex, inqʼa nik iqʼon iviʼ xoʼl inqʼa niman tetz Jesuus, tiʼ uvaʼ laʼ ekʼuula inqʼa emol s-niman tetz Jesuus. Tan inat iqʼon iviʼ, eche ex. Tul ilel vaʼn jankʼal inqʼa itzaʼlal uvaʼ palk u quBʼaal JesuKriisto. Tul ant in nik intxʼebʼon tiʼ tilix u nimla tatin quBʼaal JesuKriisto uvaʼs laʼ tul inpaqte. 2Kʼuulavaqetz inqʼa niman tetz quBʼaal Tiuxh, inqʼa iqatzimal etaʼn. Tul xeevaq, eche nik ibʼan u xeen karneʼl. Pet jit yaʼlumal ex laʼ bʼanax ex. Tul tetaanimaxh laʼ tzajk ikʼuulaleʼ. Pet jit aʼ laʼ bʼen ekʼuul tiʼ ikʼulux puaq s-te uvaʼ jit ikʼulel. Pet ayaʼlxh ekʼuul laʼ ebʼan tiʼ ikʼuulaleʼ. 3Tul yeʼ laʼ ebʼana uvaʼ laʼ etaqʼ bʼen etibʼ s-nimla bʼekʼonal tiibʼa inqʼa niman tetz Jesuus, inqʼa iqatzimal etaʼn. Pet aʼ laʼ ekʼutxh ibʼanax u bʼaʼn s-vatz. 4Oqetz ech uvaʼe laʼ ebʼane, tul laʼetz ekʼul vet val u mam bʼaʼnil uvaʼ yeʼl ipalebʼal uvaʼs laʼ ikʼutxht vet tibʼ quBʼaal JesuKriisto, viqʼesal tiibʼa inqʼa nik xeen inqʼa niman tetz. Atz laʼ ekʼul vetxʼaqaʼm, eche taqʼax jaʼ invaʼq koroona tiviʼ invaʼq xaol uvaʼ laʼ txʼakon tiʼ invaʼq saatxh, u koroona uvaʼe tan qʼabʼ tzeʼ bʼanbʼemal s-tiʼ, tul laʼ qʼaji. Petetz koq vetxʼaqaʼm uvaʼ laʼ ekʼul tiʼ toksal eqʼij, tan yeʼl paqul laʼ qʼaji.

5Echatetz kuxh nik injaqt bʼaʼnile sete, ex inqʼa chelem xaak, atz chelem ixvaak, tiʼ uvaʼ laʼ enima inqʼa iqʼon iviʼ, inqʼa iqatzin etetz. Tul jununilxh ex laʼ enima etibʼ sevatzaqil. Atz aʼetz ebʼan vet uvaʼ laʼ etiqʼo kuʼl etibʼ sevatzaq. Tul aʼ laʼ etoksa vet u akʼla oksaʼm setiʼ. Tan ech val u yol tzʼibʼamal ka t-viyolbʼal quBʼaal Tiuxh s-eche:

—Tan yeʼ nik ikʼul tibʼ

quBʼaal Tiuxh tuchʼ inqʼa xaol,

inqʼa junt kuxh nik toksa iqʼij.

Pet aʼ nik ibʼanvat

quBʼaal Tiuxh bʼaʼnil

te inqʼa xaol,

inqʼa nik tiqʼo kuʼl tibʼ,

—chich u yol.#Proveervios 3.34

6Pet iqʼovaq kuʼl etibʼ vatz quBʼaal Tiuxh, tan sibʼ iyakʼil quBʼaal Tiuxh. Tul echetz laʼ toksat eqʼije jatu laʼ isaʼ te quBʼaal Tiuxh. 7Tan xeemal oʼe taʼn quBʼaal Tiuxh. Echetz oksavaq te quBʼaal Tiuxh jankʼalxh inqʼa nik tel etaanima s-tiʼ.

Uvaʼs talt bʼen Luʼ te inqʼa niman tetz Jesuus uvaʼ laʼ motx ibʼan tial tiʼ tatin kʼatz quBʼaal Jesuus kʼuxh laʼ motx pal t-inbʼeeq itzaʼlal

8Tul bʼaxoqxh etitzʼabʼal tiʼ vetatin vatz quBʼaal Tiuxh. Tul xeevaqxh etibʼ tiʼ yeʼ ekuʼ t-paʼv. Tan nik itxhiʼkʼuula ex diaavlo. Tan aʼ isaʼ etaqʼax kuʼ t-paʼv, eche invaʼq bʼalam uvaʼ kamyxh t-vaʼy. Tul tuchʼ kʼaʼnal, atz tuchʼ taqʼt jaʼ tiʼ iqul, tul tukunyxh tiʼ itxhej itxhibʼ tiʼ kam uvaʼ laʼ iqulpi. 9Poro nuq txakbʼavaq etibʼ vatz diaavlo tiʼ vekʼuqbʼat ekʼuul tiʼ JesuKriisto. Tan etootzaqle uvaʼ echat kuxh vitzaʼlal nik palk ex taʼn diaavlo, eche uvaʼ nik palk inqʼa qumol s-niman tetz Jesuus tuulbʼal jankʼal inqʼa tenam vatz u txʼavaʼ.

10Tul quBʼaal Tiuxh laʼ lotxhon ex tuchʼ vinimla bʼaʼnil tiʼ vetatin s-vatz kʼuxh nik epal t-vitzaʼlal tuulbʼal joloq qʼij. Tan maʼt epal vet t-inqʼa itzaʼlal, tul antxh vet quBʼaal Tiuxh toq lakon ex inpaqte. Tul laʼ inuq txakbʼa etatin s-kʼatza. Atz laʼ taqʼ etial. Atz laʼ ikʼuqbʼa etatineʼ. Tan tiʼ enimat u quBʼaal JesuKriisto, tul qat isaʼ tzaan ex, tiʼ uvaʼ laʼ atin ex s-kʼatza tu nimla tatineʼ uvaʼ yeʼl iyaʼebʼal imotxebʼal.

11Poro aʼ quBʼaal Tiuxh laʼ oksal iqʼij; tul laʼ ibʼan iqʼesalil s-qiibʼa tinjattant inqʼa yaʼbʼ uvaʼ bʼenaʼl kuxh ibʼen toq tuleʼ. Tul echxhte.

Uvaʼs taqʼt bʼen Luʼ bʼaʼnil ikʼuul inqʼa niman tetz Jesuus tiyaʼtebʼal viyol

12Poro yeʼxh jankʼal yol qat intzʼibʼa opoon sete. Pet aloq aʼ insaʼ laʼ vaqʼt etial s-tuchʼ. Tul nik intzʼibʼa opoon inqʼa yol uvaʼ nuqxhtuʼ tiʼ vibʼaʼnil quBʼaal Tiuxh uvaʼ kʼulel vet etaʼn. Aʼetz Silvaano qat bʼanon bʼaʼnil s-ve tiʼ itzʼibʼal u vuʼ, Silvaano vinmol s-niman tetz Jesuus, atz uvaʼ kʼuqlebʼxh kʼuul.

13Niketz taqʼ bʼen inqʼa niman tetz Jesuus bʼaʼnilaq ekʼuul, ex inqʼa tu tenam uvaʼ Vaviloonia, chich eʼli, atz ex inqʼa tzum qat echʼexex taʼn quBʼaal Tiuxh tuchʼ inqʼa niman tetz Jesuus inqʼa at tzitza. Atz nik taqʼ bʼen Kuxh bʼaʼnil ekʼuul, Kuxh uvaʼ ech tatin sinvatz, eche vaʼq inkʼaol. 14Poro laʼ motx itzʼubʼ tibʼ txala etziʼ tiʼ taqʼt tibʼ bʼaʼnil ekʼuul sevatzaqil.

Tul aʼ vibʼaʼnil quBʼaal Tiuxh laʼ atin tetaanima jununil ex, jankʼal ex, inqʼa niman tetz Jesuus.

[Tul echxh laʼ ibʼane.]

Currently Selected:

1 Luʼ 5: ixlC

Highlight

Copy

Compare