1 Luʼ 4

Uvaʼs talt Luʼ tiʼ kam uvaʼ ibʼan u quBʼaal Jesuus, tul echatxh laʼ ibʼan inqʼa niman tetze

1Kametzxh uvaʼ ikotxʼt quBʼaal JesuKriisto ivatz uvaʼs ikʼaxbʼisal vitxhiʼoʼl, tul echatetz kuxh laʼ ebʼane tiʼ ekotxʼt evatz tiʼ vepal t-inqʼa itzaʼlal tiʼ inimal u quBʼaal Tiuxh. Tan tiʼ vepal t-inqʼa itzaʼlal tiʼ inimal u quBʼaal JesuKriisto, tul tzitzi nik ekʼutxhvat uvaʼ qat etanbʼal vet ibʼanax inqʼa paʼv.

2Echetz tuulbʼal jankʼat vatz qʼij esaq toq ebʼan tzitza vatz u txʼavaʼ, tul jit vet aʼ laʼ ebʼan u tatxhaʼv vetxhiʼoʼl, eche uvaʼ nik ibʼan inqʼa xaol, inqʼa yeʼ ootzaqin tetz Tiuxh. Pet aʼ laʼ ebʼan kam uvaʼ nik isaʼ quBʼaal Tiuxh sete. 3Yaʼoq vet ex tiʼ ibʼanax inqʼa yeʼbʼaʼn uvaʼ nikich ebʼan s-naʼya, eche uvaʼ nik ibʼan inqʼa xaol, inqʼa yeʼ ootzaqin tetz Tiuxh. Tan aʼ kuxh nik motx ibʼan inqʼa elchil t-bʼey, u tatxhaʼv txhiʼoʼl, qʼabʼaʼm, nimla qʼij inqʼa kamaq kuxh yeʼbʼaʼn nik tutxh s-tuulbʼal, atz yeʼl kuxh inojebʼal tiʼ kamxhtuʼ, atz inqʼa txoqebʼal kʼuulla txumbʼal nik ibʼanaq vatz inqʼa ibʼitichla tiuxh. 4Niketz isotz vet ikʼuul inqʼa xaol sete, tiʼ uvaʼ jit vet ant ex txhʼuyel ex s-xoʼl tiʼ ibʼanax inqʼa yaabʼla txhaq txumbʼal, inqʼa yeʼl kuxh inojebʼal tiʼ kamaq kuxhtuʼ, atz yeʼ nik itxʼol imaqt tibʼ tiʼ ibʼanax kamaq kuxh yaabʼla txumbʼal. Echetz nik motx iyoqʼt vet exe. 5Pet topoon u qʼij uvaʼ tetxhal kuxh laʼ bʼen tal inqʼa xaol inuqul inqʼa iyol vatz quBʼaal Tiuxh, u aqʼol kuʼ yol tinuqul tiʼ inqʼa xaol, inqʼa itzʼlele, atz tiʼ inqʼa kamnaʼq veteʼ. 6Tan echetz s-tiʼile tal Jesuus inqʼa bʼaʼnla txhaq yol xoʼlaq taanxelal, inqʼa kamnaʼql veteʼ. Kʼuxhetz motx kam tuchʼ vitxhiʼoʼl tuulbʼal uvaʼs yeʼich ootzaqimal Tiuxh taʼn, poro aʼ itzʼamich taʼn quBʼaal Tiuxh uvaʼ yeʼl iyaʼebʼal imotxebʼal laʼ motx titzʼeʼv inqʼa taanxelal vatz quBʼaal Tiuxh.

Uvaʼs talt Luʼ uvaʼ laʼ ilotxh tibʼ inqʼa niman tetz Jesuus tuchʼ kam uvaʼ nik itxʼol ibʼanax taʼn quBʼaal Tiuxh

7Tan il vet imotxebʼal jankʼal inqʼa kam tzitza vatz txʼavaʼ aalemal inaqbʼixeʼ. Echetz s-tiʼile bʼaxoqxh etitzʼabʼal sevatz, tiʼ uvaʼ sebʼtoq kuxh ex tiʼ inatxhax Tiuxh. 8Tul aʼxh ebʼan yaʼl ibʼanaxeʼ uvaʼ atoqxh etaanima setiʼ sevatzaq. Tan tiʼ uvaʼ sibʼxh etaanima tiʼ vemol, tul laʼ etxʼolvat ikuyux vemol tiʼ inqʼa kantxhaq uvaʼ laʼ tulbʼe ex.#Proveervios 10.12 9Tul laʼ ekuy tatin ka emol tetotzotz. Tul yeʼ laʼ motx tal tibʼ yol setiʼ sevatzaq. 10Tul jununil niman tetz Jesuus aʼ la ibʼan kam uvaʼ nik itxʼol ibʼanax taʼn quBʼaal Tiuxh. Echetz laʼ telaʼpe tibʼaʼnil jatvatzul inqʼa aqʼon aqʼel sete taʼn quBʼaal Tiuxh. 11Echetz jankʼal ex, uvaʼ nik etxʼol yol xoʼl vemol, tul aʼ laʼ ebʼane uvaʼ aʼxh viyolbʼal quBʼaal Tiuxh laʼ etala. Atz jaʼletz ex, uvaʼ, aʼ nik etxʼol lotxhoʼm, tul lotxhonoqetz ex tiʼ jankʼal uvaʼ nik taqʼ quBʼaal Tiuxh sete. Echetz tiʼ jankʼal uvaʼ laʼ motx ebʼana, tul aʼ u quBʼaal Tiuxh laʼ oksal iqʼij s-tiʼ. Tan aʼ u quBʼaal JesuKriisto nik lotxhon ex. Echetz s-tiʼile bʼenamen laʼ qoksat iqʼij u quBʼaal Tiuxh, tul laʼ ibʼan iqʼesalil s-qiibʼa tinjattant inqʼa yaʼbʼ uvaʼ bʼenaʼl kuxh ibʼen toq tuleʼ. Tul echxhte.

Uvaʼs taqʼt Luʼ itial inqʼa niman tetz Jesuus, kʼuxh nik ipal tu tiila vatz itzaʼlal tiʼ inimal quBʼaal Jesuus

12Jankʼal ex, uvaʼ at vaanima setiʼ, yeʼ kuxh sotz ekʼuul te u tiila vatz itzaʼlal uvaʼ nik palk ex. Tan aʼ itxaʼk uvaʼ laʼ ilixi uvaʼ kʼuqlel ekʼuul tiʼ quBʼaal Tiuxh, eche tilix itzʼeʼ vaʼq kam taʼn xamal. Echetz yeʼ kuxh el etaanima tiʼ vitzaʼlal uvaʼ nik palk ex.

13Pet chiibʼoq kuxh ex kʼuxh nik epal t-vitzaʼlal. Tan oq ech laʼ epal t-vitzaʼlal, eche uvaʼ palk quBʼaal JesuKriisto, tul eelaetz vet laʼ enatxht vet u mam chiibʼichil tuchʼ quBʼaal JesuKriisto uvaʼs laʼ tul inpaqte tuchʼ u nimla tatineʼ. 14Oqetz nik eyolox taʼn inqʼa xaol tiʼ venimat Jesuus, tul atetz vibʼaʼnil quBʼaal Tiuxhe setiibʼa. Atz atetze u loqʼola iTiuxhil Tiuxh sekʼatza. Tan qatat yoqʼox u quBʼaal JesuKriisto. Pet aʼetz vet oʼ, nik oksan iqʼij.

15Pet jitetz aʼ nik val uvaʼ at vibʼaʼnil quBʼaal Tiuxh sekʼatza, tiʼ uvaʼ laʼ kʼaxbʼisal ex tiʼ yatzʼoʼm, tiʼ elaqʼ, tiʼ ibʼanax vaʼtoʼq kam uvaʼ yeʼbʼaʼn, atz tiʼ etoksat etibʼ xoʼl yol inqʼa yeʼl etokebʼal s-tiʼ. 16Pet oqetz, tiʼ uvaʼ, ex vet niman tetz Jesuus laʼ kʼaxbʼisalik ex, atzoq laʼ pal ex t-vitzaʼlal, tul yeʼletz ex laʼ chʼixv ex s-te, pet aʼl laʼ etoksat iqʼij quBʼaal Tiuxh s-tiʼ. 17Tan ile aalemal topooneʼ uvaʼ toq xeʼtoq vet quBʼaal Tiuxh tiʼ tilix inuqul inqʼa nik qubʼaneʼ. Tan aʼ, oʼ bʼaxa toq tilt quBʼaal Tiuxh vinuqul s-qiʼ, aʼetz kol yeʼ laʼ taqʼvat quBʼaal Tiuxh inqʼa kʼaxkʼo tiʼ inqʼa yeʼ nik niman inqʼa bʼaʼnla txhaq yol tiʼ Jesuus uvaʼ een tzajnaʼq kʼatz quBʼaal Tiuxh. 18Tan ech val u yol tzʼibʼamal ka t-viyolbʼal quBʼaal Tiuxh s-eche:

—Palnalxh inqʼa xaol

titzaʼlal,

inqʼa qat bʼen s-bʼaʼn

vatz quBʼaal Tiuxh

tuulbʼal uvaʼ

yeʼnaq chitpoq el

t-inqʼa itzaʼlal tzitza

vatz txʼavaʼ.

Aʼetz kol yeʼ laʼ pal titzaʼlal

inqʼa xaol,

inqʼa bʼanol tetz yeʼbʼaʼn,

atz inqʼa aj paʼvom.

Tan laʼ motx kʼaxbʼisal

taʼn quBʼaal Tiuxh,

—chich u yol.#Proveervios 11.31

19Echetz aʼ nik elkaʼpun u yole tiʼ jankʼal ex, uvaʼ nik epal titzaʼlal uvaʼ quBʼaal Tiuxh nik kuyun epal s-tuul, tul aʼletz etoksat etibʼ vatz quBʼaal Tiuxh tuchʼ vetaanxelal, u quBʼaal uvaʼ kʼuqlebʼxh kʼuul, atz u viinqixsan etetz. Tul yeʼ etanbʼa ibʼanax u bʼaʼn.

Currently Selected:

1 Luʼ 4: ixlC

Highlight

Copy

Compare