1 Luʼ 1

1 LUʼ

Uvaʼs taqʼt bʼen Luʼ bʼaʼnil ikʼuul inqʼa niman tetz Jesuus

1In Luʼ, vaʼl te inqʼa iapoostol JesuKriisto.

Niketz intzʼibʼa opoon val u uʼ sete, ex inqʼa niman tetz Jesuus, ex inqʼa elnaʼql bʼen ex tu qutenam; tul paxnaʼql el ex tuulbʼal Poonto, Galaasia, Kapadoosia, Aasia, Vitiinia,{*}#1.1 U yol uvaʼ: —...elnaʼql bʼen ex tu qutenam, —chiche. Aʼ nik tiqʼo tzaan Luʼ uvaʼs ipaxit el tibʼ inqʼa tij imam Israeel s-naʼya uvaʼs tokebʼelaq taʼn inqʼa sol tetz Asiiria tuchʼ inqʼa sol tetz Vaviloonia, inqʼa jit tij imam Israeel, inqʼa yeʼ ootzaqin tetz Tiuxh. Aʼ nik ibʼan Luʼ eela u tojqeʼlal inqʼa niman tetz Jesuus tu tenam Jerusaleen taʼn inqʼa iqʼesal uqʼeʼybʼal xoʼl inqʼa tij imam Israeel, inqʼa jit niman tetz Jesuus. 2ex inqʼa chʼexelxh vet ex taʼn quBʼaal Tiuxh, tiʼ uvaʼ echichxh vet itzʼamal tzaane taʼn quBʼaal Tiuxh setiʼ. Tan tootzaqle uvaʼ laʼich jetxhonsal ok ex tiʼ inimal quBʼaal JesuKriisto taʼn viTiuxhil. Tul ant ex qat toksa ex quBʼaal Tiuxh s-tuul taʼn u quBʼaal JesuKriisto tiʼ ijeqbʼat viyol setuchʼ tiʼ u tel vikaqal uvaʼs ikameʼ. Eche uvaʼs ijeqbʼat quBʼaal Tiuxh viyol uvaʼ tal Moisees uvaʼs itzikut ok Moisees vikaqal inqʼa txoo tiʼ inqʼa tij imam Israeel s-naʼya.

Tul aʼ vibʼaʼnil quBʼaal Tiuxh laʼ kuyun ex; tul laʼ atin vibʼaʼnil tetaanima txhaqpaq.

Uvaʼs inatxht Luʼ Tiuxh tiʼ taqʼax taʼntiuxh te quBʼaal Tiuxh tiʼ u quBʼaal Jesuus

3Niketz vaqʼ taʼntiuxh te quBʼaal Tiuxh, viBʼaal u quBʼaal JesuKriisto, tan qat itxum quvatz, tul qat taqʼ qʼij qusaq uvaʼ yeʼl iyaʼebʼal imotxebʼal. Echetz s-tiʼil at vet qokebʼal tiʼ qutxʼebʼt u qʼij qusaq uvaʼ yeʼl iyaʼebʼal imotxebʼal uvaʼ bʼen qukʼul s-kʼatza. Atetz vet qokebʼal tiʼ qutxʼebʼt u qʼij saq, tan, tiʼ uvaʼ itzʼeʼv u quBʼaal JesuKriisto inpaqte, kʼuxh maʼtich ikameʼ. 4Tul at qokebʼal tiʼ ikʼulux val u mam bʼaʼnil uvaʼ yeʼl iqʼaebʼal, atz tira yeʼxhkam invaʼq laʼ bʼoqon s-tzʼilbʼichil, atz yeʼl isotzebʼal. Tul il u mam bʼaʼnil at vet tu amlikaʼ uvaʼ kolel vet setetz taʼn quBʼaal Tiuxh. 5Tul nikat vaqʼ taʼntiuxh te quBʼaal Tiuxh uvaʼ il ex kolel ex taʼn u tiqleʼm tiʼ vekʼuqbʼat ekʼuul tiʼ quBʼaal JesuKriisto. Echetz laʼ topoon vete u qʼij tiʼ ichitt ex t-inqʼa itzaʼlal tzitza vatz txʼavaʼ. Tan txʼebʼoʼm kuxh vet u chitpichil taʼn quBʼaal Tiuxh uvaʼs laʼ topoon vikʼutxhtaʼ t-vimotxebʼal qʼij saq.

6Aʼetz vechitpeʼl t-vitzaʼlal laʼ chiibʼ ex s-tiʼ, kʼuxh ile nik ikuy quBʼaal Tiuxh uvaʼ nik etulbʼel taʼn inqʼa kalabʼaq itzaʼlal uvaʼ nik palk ex tuulbʼal bʼiil vatz qʼij esaq. 7Tan aʼ isaʼ quBʼaal Tiuxh tiltaʼ oq nuqxh nik qal tiʼ qukʼuqbʼat qukʼuul tiʼ quBʼaal JesuKriisto, tan ech nik ibʼan tiʼ qilix, eche nik itzʼeʼsal el tzʼil tiʼ u ooro uvaʼ nik ipalsal t-xamal. Tul kʼuxh ooroxhtuʼ, tan at isotzebʼal. Pet u kʼuqlebʼ kʼuul tiʼ quBʼaal JesuKriisto, tan sibʼ tokebʼal viʼ u ooro. Tul ant koq kuxh kʼuqlel ekʼuul uvaʼs laʼ tul quBʼaal JesuKriisto inpaqte. Tul echetz laʼ toksal eqʼije, atz laʼ aqʼax bʼen ex s-nim, atz laʼ aqʼax etiqleʼm. 8Tan toq uloq u quBʼaal JesuKriisto uvaʼ tira at etaanima s-tiʼ kʼuxh yeʼx inpaqxoʼq etila, u quBʼaal JesuKriisto uvaʼ nik eqejeʼ, kʼuxh yeʼ naʼl tilix sevatz s-txheel, tul nik echiibʼ s-tiʼ. Tul mam chiibʼichil nik ebʼaneʼ uvaʼ tetaanxelalxh nik tzaj ka, atz nik ebʼitzle tuchʼ etaanxelal. 9Tan ile nik etil ibʼaʼnil vekʼuqbʼat ekʼuul tiʼ quBʼaal Tiuxh, aʼe vichitp vetaanxelal tiʼ yeʼ ibʼen tu kʼaxkʼo tiʼ inqʼa epaʼv.

10Poro motxetzxh tal ka inqʼa qʼexsan tetz viyol quBʼaal Tiuxh vibʼaʼnil quBʼaal Tiuxh tiʼ ikuyux inqʼa paʼv uvaʼ yaʼn laʼich ikʼutxh sete. Tan motxxh tabʼi s-bʼaʼn kam talaxich u chitpichil uvaʼ tal ka quBʼaal Tiuxh tiʼ yeʼ ebʼen tu kʼaxkʼo tiʼ inqʼa epaʼv. Tul motxxh itxhʼoti inuqul u yol s-bʼaʼn s-tiʼ. 11Tul motxxh ibʼan yaʼl tiʼ tabʼil te viTiuxhil u Kriisto kam laʼich ulbʼel tilix vitxumbʼal u Kriisto uvaʼs laʼich tuleʼ, atz tiʼ tootzaqileʼ jatu laʼich ul u Kriisto. Aʼetz vet nikich tal ka viTiuxhil u Kriisto te inqʼa qʼexsanich tetz viyol quBʼaal Tiuxh uvaʼ tetxhal laʼich pal u Kriisto t-inqʼa kʼaxbʼichil, tul xamtel laʼich ul vet inqʼa mam bʼaʼnil tetz chitpichil s-tiibʼa. 12Tul tira alax inuqul te inqʼa qʼexsanich tetz viyol quBʼaal Tiuxh uvaʼ tiʼ koq invaʼq ipaʼv u Kriisto laʼich kʼaxbʼisali ka; pet tiʼ inqʼa qupaʼv laʼich kʼaxbʼisali ka. Tul ikʼam kuxh quBʼaal Tiuxh inqʼa qʼexsan tetz viyol tiʼ talax inqʼa yol tiʼ u Kriisto uvaʼ, aʼ vet oʼ laʼich abʼin inqʼa yol. Aʼetz vet inqʼa bʼaʼnla txhaq yole tiʼ JesuKriisto uvaʼ nik ipaxsal s-quxoʼl s-txheel taʼn inqʼa nik paxsan viyolbʼal quBʼaal Tiuxh. Tul aʼetz viTiuxhil Tiuxh uvaʼ tzajnaʼq t-amlikaʼ kʼatz quBʼaal Tiuxh txhaqon tiʼ ipaxsal vet inqʼa bʼaʼnla txhaq yol. Jankʼaletzxh inqʼa motx ibʼan u Kriisto, tul tira nik tatxhva inqʼa aanxel uvaʼ ant koq motx ilon kame uvaʼ ibʼan u Kriisto tiʼ toleʼv tiʼ ijeqbʼal ka u chitpichil.

Uvaʼs talt Luʼ uvaʼ tira laʼ ijetxheʼl tibʼ inqʼa niman tetz Jesuus kʼatz inqʼa paʼv

13Echetz txhabʼavaqxh itxakeʼv vetitzʼabʼal kʼatz quBʼaal Tiuxh. Atz bʼaxoqxh etitzʼabʼal sevatz laʼ ebʼana. Tul aʼ kuxh vet atoq ok tetitzʼabʼal u mam bʼaʼnil uvaʼ nik etxʼebʼeʼ uvaʼ laʼ aqʼax sete uvaʼs laʼ tul vet u quBʼaal JesuKriisto inpaqte. 14Tul laʼetz eqej u quBʼaal Tiuxh, eche inqʼa nitxaʼ, uvaʼ nik qeon ibʼaal. Pet jit aʼ laʼ ebʼan inqʼa tatxhaʼv vetxhiʼoʼl, eche uvaʼ nikich ebʼan s-naʼya uvaʼs yeʼnaqich etootzaqit JesuKriisto. 15Pet aʼ ebʼan veteʼ uvaʼ tira ejetxh vet el etibʼ kʼatz inqʼa paʼv tiʼ jankʼal vetatin laʼ ebʼan tzitza vatz txʼavaʼ. Echatetzxh ebʼan, eche vitxumbʼal u quBʼaal Tiuxh uvaʼ qat saʼon ex, tan tira jetxhel el tibʼ kʼatz paʼv. 16Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:

—Ex yeʼ laʼ bʼanon u paʼv,

tan yeʼl paʼv nik inbʼaneʼ,

in veBʼaal Tiuxh,

—chich u yol.#Leviitiko 11.44-45; 19.2

17Echetz tuulbʼal bʼiil vatziʼ toq atinoq oʼ vatz txʼavaʼ, tul quxoʼva qupaʼvineʼ bʼaj. Tan: —inBʼaal Tiuxh, —chichetz oʼ te quBʼaal Tiuxh. Tan aʼ u quBʼaal Tiuxh toq aqʼon kuʼ yol tinuqul s-qiʼ, tiʼ kam inqʼa nik qubʼaneʼ. Tul yeʼl nim, atz yeʼl txhʼoj vatz quBʼaal Tiuxh. 18Tul jetxhvaq el etibʼ kʼatz u paʼv, tan etootzaqle uvaʼ txhoel vet eteleʼl s-tuul taʼn quBʼaal Tiuxh. Tan kʼuxh nikich motx ebʼan inqʼa paʼv, poro yeʼxhkam qat taqʼ sete, inqʼa kʼutxhel ka sete taʼn inqʼa kʼuy emam. Tul jitetz kuxh tuchʼ invaʼq kam uvaʼ at isotzebʼal itxhojvat quBʼaal Tiuxh inqʼa epaʼv, eche ooro, atz eche plaata. 19Pet aʼ qat itxhojvat tuchʼ u tel vikaqal quBʼaal JesuKriisto, uvaʼ yeʼl invaʼq kam laʼ ibʼan eela vijaʼmil s-tuchʼ. Tan ech ulbʼel tel vikaqal quBʼaal JesuKriisto, eche tel ikaqal invaʼq chelem karneʼl uvaʼ yeʼl invaʼq iyaabʼil, atz yeʼxhkam bʼeeq bʼanon. 20Tan chʼexichxh vet JesuKriisto uvaʼs yeʼnaqich xeʼtoq tzaan u qʼij saq tzitza vatz u txʼavaʼ, pet yaʼnetz vet qat taqʼl quBʼaal Tiuxh etootzaqi t-inqʼa imotxebʼal qʼij saq atil oʼ s-txheel. Qatetz taqʼ quBʼaal Tiuxh qootzaqi, tan tiʼ uvaʼ at taanima s-qiʼ. 21Echetz tiʼ vet quBʼaal JesuKriisto nik eqejvat u quBʼaal Tiuxh. Tan itzʼeʼv quBʼaal JesuKriisto inpaqte taʼn quBʼaal Tiuxh kʼuxh maʼtich ikam quBʼaal JesuKriisto. Tul aqʼax nimla tatin quBʼaal JesuKriisto taʼn quBʼaal Tiuxh. Echetz s-tiʼile kʼuqlel vet qukʼuul, tiʼ uvaʼ nik qutxʼebʼeʼ kam uvaʼ toq taqʼ quBʼaal Tiuxh s-qe.

22Tan tiʼ venimat vinuqul viyolbʼal quBʼaal Tiuxh, tul nik txʼajpik vetaanxelal t-inqʼa paʼv. Tan aʼ viyolbʼal quBʼaal Tiuxh nik kʼutxhun sete jabʼistee inqʼa paʼv. Echetz nuqxhtuʼ uvaʼ atoqxh etaanima sevatzaqil, eche vetaanima tiʼ etitzʼin etatzik. Pet jit kam vaʼq s-tiʼil, tul at etaanima sevatzaq. 23Echetz atoqxh etaanima sevatzaq, tan qat jalpiy vet ex, eche vaʼq neʼ uvaʼ yaʼn alaliya. Tan qat itzʼeʼvy ex vatz quBʼaal Tiuxh tiʼ inimal viyolbʼal. Aloq jit aʼ qat itzʼeʼvk ex taʼn vaʼq iiya uvaʼ qʼajchil nik taqʼeʼ; pet aʼ qat itzʼeʼvik ex taʼn val u iiya uvaʼ yeʼl qʼajchil nik taqʼeʼ. Aʼe viyolbʼal quBʼaal Tiuxh uvaʼ nik aqʼon qʼij esaq, atz uvaʼ yeʼl iyaʼebʼal imotxebʼal tatineʼ. 24Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:

—Tan ech kuxh laʼ isotz

vitxhiʼoʼl inqʼa xaol,

eche inqʼa tzeʼ nik titzʼ

vatz txʼavaʼ.

Atz echat kuxh laʼ ipal

u nimla tatin inqʼa xaole,

eche nik ipal vijosqʼilal

invaʼq xuʼm uvaʼ atoʼk

tiʼ itzeʼil.

Tan nik itzaq vitzeʼil,

tul nik itojp vixuʼm.

25Pet viyolbʼal quBʼaal Tiuxh,

tan yeʼl iyaʼebʼal imotxebʼal

u tatineʼ,

—chich u yol.#Isaiias 40.6-8

Aʼetz inqʼa yole uvaʼ alax sete tuulbʼal uvaʼs qat ipaxsal inqʼa bʼaʼnla txhaq yol tiʼ quBʼaal JesuKriisto sexoʼl uvaʼs yeʼl iyaʼebʼal imotxebʼal u tatineʼ.

Currently Selected:

1 Luʼ 1: ixlC

Highlight

Copy

Compare