1 Tìmɔ̀té 1

1Èmi, Kpɔ́lù adzítsɛ́-Yèésù† Kírísítò ní wà tse ìwé yèé bɛ́ fú ìwɔ Tìmɔ̀té#ɛ́. Ɔ̀ɖáyé Agbanɛlà-wa òŋu Yèésù† Kírísítò†, ɛnɛ yèé àa módzú si nɔ́ɔ̀nà si fú#ɛ́, àŋa ní mú itsɛ́-adzítsɛ́#ɛ́ bɔwɔ́-mi#ɛ́. 2Ìwɔ Tìmɔ̀té, ǹ wà kíɛ. Ò wà fú mi kíbí ɔma-mi bíbí bɛ́, iŋɛ́ yèé tse#ɛ́, ǹ wíìnyɛ̀ fɛ́ɛ, tsí ò gba Yèésù gbɔ́. Ɔ̀ɖáyé Boba-wa òŋu Yèésù Kírísítò Ɔlá-wa méèdzì ká rí ànyínɔ́ fɛ́ɛ, tsí ká tse ore-ɔ̀fɛ́ gbo fɛ́ɛ, tsí ká fɛ́ɛ ńtútùúrɔ̀ gbo.

Tìmɔ̀té kó kɔ̀ fú ɛnɛ yèé wà tsɛ̀kɔ́-òɖòbò ŋa#á

3Kíbí ǹ wíi fɛ́ɛ ńǹwèrè yèé ǹ làkóò ńlɛ̀-Màkɛ̀ɖónìyà#á ní o gbé ńǹlú-Èfɛ́sì#ɛ́, nà gbé bɛ̀ si. Ɔ̀nyà kã̀ŋa wà bɛ̀, tsí wà tsɛ̀kɔ́-òɖòbò fú ɔ̀nyà ŋa, ɛ̀kɔ́ yèé kò ɖé bá ti Yèésù#ɛ́. Ó ɖi, nà kɔ̀ɔ́ fú ŋa, 4tsí nà wí fú ŋa ní ká sɛ̃̀ náànyì-ɛ̀rɔ́-òɖòbò ŋa òŋu àrã́dzìnyà ti nára-ɛ́kɔ-gbágbóǹgbàgbò ŋa gbo. Afɔ̀ nyɛ̀ŋɛ̀ ŋa náa wà múnɛ dzìnyà nóògbóòró gé ni. À kà mú ètò-Ɔ̀ɖáyé lɔ ńwádzú. Ètò#ɛ́, ó wà ní ká gba Ɔ̀ɖáyé gbɔ́ tã́ná ká màá.

5Ǹ wà wí afɔ̀ yèé fɛ́ɛ, àtóoríi e nɛ́ àmúɖɔ̃̀ fúnɛ. Sídzó sídzó-kã̀ kó máa wà nɛ́ɛ̀ɖɔ̃̀-ŋɛ́, tsí ìsérè-ŋɛ́ gbo kó wà ńǹtá-Ɔ̀ɖáyé òŋu níìkã̀ntso, tsí e nɛ́ àkaralé si ńǹtá-Yèésù gbo inɔ́ tã̀ã́, ànyì tã̀ã́. Àmúɖɔ̃̀#ɛ́ kó wà ti ńnɔ́-iŋɛ́ nyɛ̀ŋɛ̀ ŋa. 6Ó ɖi, ɔ̀nyà kã̀ŋa kɔ ɔ̀nà nyɛ̀ŋɛ̀ dzɔ̀ɔ́, tsí nɔ̀ gbà nɔ́ɔ̀nà-òmírɛ̃̀, ɔ̀nà-afɔ̀-ògbóòró ŋa, 7tsí à wà wò ní àŋa kó dzɛ́ akɔ́nɛ nɛ́kpa-Ɔ̀ɖáyé† ŋa. Tsí afɔ̀ yèé à náa wà le oŋù si ńnɛ̀, tsí wà fɔ̀ fúnɛ#ɛ́, àŋa ká-ŋa, à kà tì wà gbɔ́ òkpì‐ɛ̀ gìɖì gbo.

8Fee, ɛkpa-Ɔ̀ɖáyé†#ɛ́, àa mà ní ó sã̀. Ó ɖi, ó wà ní ká lòó si nɔ́ɔ̀nà-ire. 9Tsí ká mà gbo ní Ɔ̀ɖáyé kò ɖá ɛkpa fú atsòtítɔ́ ŋa. Ɛnɛ yèé ŋa nya ɛkpa#á kãdzú, tsí à kò wà rɛ̃̀ si ńnɛ̀#ɛ́ ní ó ɖá ɛkpa fú#ɛ́. Adzàbi ŋa, ɛnɛ yèé ŋa kà rí Ɔ̀ɖáyé sá#á, àŋa ní ó ɖá ɛkpa#á fú#ɛ́. Ɛnɛ yèé ŋa wà si fú iŋɛ́-ayé ŋa gé, tsí à kò wà sɛ̃ Ɔ̀ɖáyé#ɛ́, ó ɖá ɛkpa#á fú ŋa. Ɛnɛ yèé ŋa náa kpa boba-ŋa nàmí ìnà-ŋa nóòkú#ɛ́ òŋu akpanɛ nóòkú ɔ̀kã̀lɔ́ɔ̀kã̀, ó ɖá ɛkpa#á fú àŋa gbo. 10Ɔ̀nyà-àlòwá ŋa gbo, ɔnɔkɛ̃̀ɛ̃ yèé náa wà sũ̀ bá ɔnɔkɛ̃̀ɛ̃ ŋa#á òŋu ɔnɔbɛ̃̀ɛ̃ yèé náa wà sũ̀ bá ɔnɔbɛ̃̀ɛ̃ ŋa#á gbo, ó ɖá ɛkpa#á fú àŋa gbo. Atsole-ɔ̀nyà tà ŋa gbo, atsòɖòbò ŋa òŋu ɔ̀nyà ɔ̀kã̀lɔ́ɔ̀kã̀ yèé náa wà tse iŋɛ́ yèé kò ɖé bá ɛ̀kɔ́-òtítɔ́#ɛ́ gbo, ó ɖá ɛkpa#á fú àŋa gbo. Àtsùgbé-ɔ̀nyà-ìrɔ́ nyɛ̀ŋɛ̀ ŋa#á ní Ɔ̀ɖáyé ɖá ɛkpa#á wá#á. 11Ɛ̀kɔ́-òtítɔ́#ɛ́, ó ɖé bá ikɔ̀ ɖíɖɔ̃̀-Ɔ̀ɖáyé, tsí ó ń bɔwɔ́-mi ní èmi kó dzɛ́ɛ fú ɔ̀nyà ŋa. Ikɔ̀#ɛ́ wà ɖíre iyì-Ɔ̀ɖáyé, Ɔ̀ɖáyé olí-kùsɛ̀ɛ̀ ɔ̀kã̀lɔ́ɔ̀kã̀.

Ɔ̀ɖáyé rí ànyínɔ́ fú Kpɔ́lù

12Ǹ wà ɖɔ́kpɛ́ fú Yèésù Kírísítò Ɔlá-wa. Òŋu ní fú mi ńkpá ní n ń tsitsɛ́ yèé ó ɖá fú mi#ɛ́. Tsí ǹ wà ɖɔ́kpɛ́ fúu ró ní ó nɛ́ àkaralé si ńǹtá-mi, tsí ó tsã̀ mí ní n dzɛ́ adzítsɛ́‐ɛ̀. 13Dzɔ̀ɔ́ dzɔ̀ɔ́#ɛ́, mà gbɛ̃ɛ̃́rĩ́ ɛ́kɔ-Ɔ̀ɖáyé, tsí mà tsoró bá olí-Yèésù ŋa, tsí mà bú ŋa gbo. Ńǹwèrè nyɛ̀ŋɛ̀#ɛ́, ǹ kò gba Yèésù gbɔ́, tsí ǹ kò ma iŋɛ́ yèé ǹ wà tse#ɛ́ gbo. Ńnɛ̀ ní Ɔ̀ɖáyé rí ànyínɔ́ fú mi#ɛ́. 14Ìɖéǹɖè, Yèésù Kírísítò Ɔlá-wa tse ore-ɔ̀fɛ́ fú mi kpíkpɔ̀ héŋú. Ó tse tsí ǹ nɛ́ àkaralé si ńǹtá‐ɛ̀, tsí ó tse tsí ǹ wà nɛ́ àmúɖɔ̃̀ gbo fúnɛ kíbí ó tse ɔ̀kã̀ntso bá mi si#ɛ́.

15Yèésù Kírísítò wá ńǹtalɛ̀ bí, tsí kó wáa gba adzàbi ŋa là ni. Afɔ̀ nyɛ̀ŋɛ̀#ɛ́, àkaralé wà ńnɛ̀, tsí ó dzɔ ní ɔ̀nyà kpó kó gbàá gbɔ́. Tsí náàŋírĩ-adzàbi ŋa kpó#ɛ́, èmi ní dzɛ́ adzàbi lárè#ɛ́. 16Àtsùgbée bɛ́ɛ̀ gìɖì ní Ɔ̀ɖáyé rí ànyínɔ́ fú mi#ɛ́. Ó tse bɛ́ɛ̀, tsí Yèésù Kírísítò kó nya kíbí náa nɛ́ àtɛ̀si tó#ɛ́ ɖíre fú ɔ̀nyà ŋa. Tsí èmi yèé dzɛ́ adzàbi lárè#ɛ́, kíbí Ɔ̀ɖáyé gbà mí là#á, ǹ ɖi ɔ̀nyà ká rí tse fú ɔ̀nyà kpó, fú ɛnɛ yèé ŋa nákó wáa gba Yèésù gbɔ́, tsí rí àyɛ̀-àrìtã́#á.

17Ɔ̀ɖáyé, ìwɔ ní wà dzoyè títí lɔ náàrìtã́#á. Ìwɔ ní dzɛ́ Ɔ̀ɖáyé ɔ̀kã̀ntso, tsí ò kà kú láyé, tsí odzú gbo kà ríɛ#ɛ́. Ǹ wà kíɛ, tsí ǹ wà wúùre ní ɔ̀nyà kpó kó sɛ̃̀ɛ̃́, tsí ɔ̀nyà kpó kó wà nyɛ̀ɛ́ títí lɔ náàrìtã́. Ɛ̀tsɛ.

18Tìmɔ̀té, ɔma-mi, ǹ bòkó mú ɛ̀kɔ́-kã̀ bɔwɔ́-ɛ̀ɛ. Dzɔ̀ɔ́ dzɔ̀ɔ́#ɛ́, agbáfɔ̀-Ɔ̀ɖáyé fɔ̀†-kã̀ fɔ afɔ̀-kã̀ ti nára-ɛ̀ɛ, tsí ɛ̀kɔ́#ɛ́ ɖé bá afɔ̀#ɛ́. Ńbɛ̀ɛ́, nà tsáki afɔ̀ ŋa#á banɛ́ si kũkũ, tsí o ń dzogu rere. 19Tsí o mú àkaralé-ɛ̀ɛ gbo si ńǹtá-Yèésù rere, tsí ɛ̀ɖɔ̃̀-ɛ̀ɛ gbo kó dzokó si. Ó ɖi, ɔ̀nyà kã̀ŋa kɔ̀ ní àŋa kàkó rɛ̃tígbè-iŋɛ́ yèé ɛ̀ɖɔ̃̀-ŋa wà wí fú ŋa#á, tsí ó tse tsí àkaralé yèé à nɛ́ si ńǹtá-Yèésù#ɛ́ ra kpó. 20Hùmɛ́nì òŋu Àlɛ̀kìsã́nɖè gbo wà náàŋírĩ-ɛnɛ nyɛ̀ŋɛ̀ ŋa#á, tsí ǹ mú ŋa bɔwɔ́-Ètsù†,#1:20 È káà kã Ìwé 1 Kòríntì ŋa 3:14 òŋu afɔ̀ yèé à ń nya òkpì‐ɛ̀ ńǹsàlɛ̀-odzú-ìwé#ɛ́. tsí ká mà ní à kà gbɛ̃ɛ̃́rĩ́ ɛ́kɔ-Ɔ̀ɖáyé.

Currently Selected:

1 Tìmɔ̀té 1: ngl

Highlight

Copy

Compare