Galatia 6

Faŋ bàw viŋ gaŋtə yiŋwaa yiŋ, viŋ viŋ

1Vaŋ-nshwi vaŋ, viŋ kɨ luu fàynə viŋ vɨ wə faŋ ŋwə yɨ̀ nu bwə, bàw viŋ gaŋtə wə ghɔ́ laa ŋwə kiasə gù wuu jəə. Kaꞌ viŋ yɨ̀sə nɨniŋ faŋ viŋ kìi Zwitə Ley Nwi taa fwisə viŋ. Bàw viŋ yɨ̀ nɨniŋ, kɨ yɨsə fɨ taa bwaŋnə, baa ndeynə yiŋwaa yiŋ buꞌ məmɔŋ mɔ́ꞌ taa ŋii viŋ nɨzi. 2Viŋ gaŋtə wə nə wə, shàꞌ ŋɨꞌ wə nə wə. Viŋ yɨ̀ nɨniŋ, buu ŋkə də̀ laa nshinə Kristo lùu maa viŋ. 3Wə kɨ luu kɨ bɨꞌtə laa yi lùu nu, faŋ ŋwə lùu wuu dayday, buu ŋwə bweꞌsə ŋwaa wi. 4Bàw wə nə wə kɨ mɔŋ sheꞌ ŋgwinə faꞌ faŋ ŋwə faꞌ, laa ŋwə lùu jəə mu? Ŋwə taa luu jəə, buu ŋwə taa ŋaytə maa faꞌ ŋgwə faŋ ŋwə faꞌ. Luu nə, bàw ŋwə yɨ nɨniŋ sheꞌ ŋgɨɨ-ŋwə, kee kɨ fɨꞌ maa nu wə dɨday me, 5buꞌ laa wə tɨ̀ me wə kii ŋgwinə faꞌ, faŋ Nwi kɔ̀ tɨ́ ŋwə maa məfaꞌ ŋgɨɨ-ŋwə.

6Bàw laa wə tɨ̀ me wə faŋ ŋwə zwetə nu Nwi fɨ ghɔ wə, kɨ gaasə vətɔ vi, kɔ tɨ́ wə ntɨə faŋ ŋwə deesə ŋwə nə. 7Kɨ viŋ bweꞌsə yiŋwaa yiŋ me, Nwi kee bìŋ laa wə taw yi me. Fa ŋkɨə faŋ wə sɔ, luu ŋkə faŋ ŋwə ndɔ shwi. 8Wə ntɨə faŋ ŋwə yɨsə vənu sheꞌ maa nshɨ-tɔ wi, ŋwə ndɔ ndi. Gə fɨ maa wə ntɨə faŋ ŋwə yɨsə vənu buꞌ Zwitə Nwi, ŋwə ndɔ zɨ məbwey vəlwaŋ faŋ ŋwə ndɔ̀ fɨ maa Zwitə Nwi. 9Nɨniŋ, bàw nsiŋ kɨ yɨ vənu vəjəəvə ghee nshə, kee bwa me. Nsiŋ kɨ luu kee bə̀ŋ nə yiba me, buu nsiŋ ndɔ ye ŋkee nu jəə ŋkɨə faŋ ŋkə fuu fɨ maa faꞌ ŋwaa-nsiŋ ghɔ́ maa yighee njyə faŋ Nwi tə̀. 10Yighee kɨ bii maa məyɨ nu jəə ndwə. Bàw nsiŋ gaŋtə vɨɨ ghee nshə, gàŋtə vaŋ-nshwi vaŋ-nsiŋ vɨɨ Nwi fɨ taa nwaa vɨɨ Yeso Kristo.

Faŋ Pɔɔl nə mètə ŋwaꞌlə wi maa nshɨ-tɔ wi, fàynə vənu vəweꞌvə fɨ taa ŋwaꞌlə ŋwə̀

11Mə kəə metə ŋwaꞌlə ŋwə̀ ŋgɨɨ-mə, ŋkee nə ghɔ kaŋ. Maa viŋ ye sɨ ŋwaꞌlə kwalə faŋ mə nyɔ̀ꞌ nə. 12Viŋ kɔꞌ kɨɨ laa vɨɨ mbɨə faŋ vəŋ dɔ̀ɔ laa vɨ sɨɨtə viŋ nə, lùu vɨɨ faŋ vəŋ kəə laa vɨɨ kaw vəŋ, biŋ vəŋ. Vəŋ kəə laa vɨ sɨɨtə viŋ sheꞌ maa məyɨ jəə sɨ vɨɨ Jus, laa kɨ vɨ kɔ ŋɨꞌ tɨ́ vəŋ buꞌ ntɔŋ yijəə Nwi kɔ̀ŋ fəŋkɔꞌ fə ŋkɨꞌsə fə Kristo me. 13Vɨɨ vɔ́ faŋ vəŋ sɨɨtə vɨɨ nə, nshɨ-tɔ vəŋ kee bee zɔnə ntɨsə vɨɨ Jus sənshə me. Vəŋ kəə sheꞌ laa viŋ biŋ vɨ sɨɨtə viŋ, tɨ́ kaꞌ vəŋ kɨ koꞌsə yiŋwaa, laa viŋ suꞌsə yiŋwaa yiŋ nsi. 14Gə fɨ maa mə, luu sheꞌ fa kəmuꞌ faŋ kaꞌ ŋkə yɨsə mə koꞌsə ŋwaa; fa kɔ́ lùu fəŋkɔꞌ fə ŋkɨꞌsə fə tii ŋwaa-nsiŋ Yeso Kristo, faŋ ŋkə yɨsə laa vənu və mbi nyə̀ kukə sɨ mə. Mə kee shi mbi buꞌ vənu vɔ́ me. 15Faŋ vɨ sɨ̀ɨtə wə, faŋ vɨ kee sɨ̀ɨtə wə me, ŋkwiinə kee lùu shɔ me. Nu kwalə luu sheꞌ laa Nwi yɨsə nsiŋ luu vɨɨ finə. 16Mənɔŋ-bwaŋnə Nwi nə gəŋsə Nwi tɔ vɨɨ mbɨə faŋ vəŋ beꞌsə nshinə yifi yɔ́, nə taa ŋwaa vɨɨ yinsəŋ Nwi! 17Maa məndwə, kɨ vɨɨ baa kɨ kɔ ŋɨꞌ shee me, buꞌ laa təfɨɨ tə vədɨꞌ ntɨə faŋ ntə lùu maa mə, də̀ laa mə beꞌsə Yeso. 18Vaŋ-nshwi vaŋ, tɨta ŋwaa-nsiŋ Yeso Kristo tu mənɔŋ-bwaŋnə tɔ viŋ vənshə! Ŋkə gòꞌsə nɨniŋ.

Currently Selected:

Galatia 6: bav

Highlight

Copy

Compare